ଭୁବନେଶ୍ବର: ୧୯୭୧ ମସିହାରେ ଭାରତ ଓ ପାକିସ୍ତାନ ମଧ୍ୟରେ ଅନୁଷ୍ଠିତ ଯୁଦ୍ଧର ୫୦ ବର୍ଷ ପୂର୍ତ୍ତି ଉପଲକ୍ଷେ ଯାତ୍ରା କରୁଥିବା ଭାରତର ବିଜୟ ଗୌରବ ପାଳନର ସ୍ମାରକୀ ସ୍ଵର୍ଣ୍ଣିମ ବିଜୟ ମଶାଲକୁ ଆଜି ସକାଳେ ଭୁବନେଶ୍ବର ସୈନିକ ସ୍କୁଲରେ ସ୍ଵାଗତ ଓ ସମ୍ମାନ ପ୍ରଦର୍ଶନ କରାଯାଇଛି । ବିଜୟ ମଶାଲର ଏହି ଗରିମାମୟ ଉପସ୍ଥିତିରେ ପ୍ରଥମ କରି ଚଳିତବର୍ଷ ନାମ ଲେଖାଇଥିବା ଛାତ୍ରୀଙ୍କୁ ସ୍ଵାଗତ କରାଯାଇଛି ।
ବିଜୟ ମଶାଲକୁ ସ୍କୁଲ ଅଡିଟୋରିଅମ୍ ବିବେକାନନ୍ଦ ହଲକୁ ମଧ୍ୟ ନିଆଯାଇଥିଲା । ସେଠାରେ ନବମ ଶ୍ରେଣୀରୁ ଦ୍ବାଦଶ ଶ୍ରେଣୀ ପର୍ଯ୍ୟନ୍ତ କ୍ୟାଡେଟ୍ ଏବଂ ନୂଆକରି ନାମ ଲେଖାଇଥିବା ଛାତ୍ରୀ କ୍ୟାଡେଟ୍ ମାନଙ୍କ ଉପସ୍ଥିତିରେ ଦେଶାତ୍ମବୋଧ ସାଂସ୍କୃତିକ କାର୍ଯ୍ୟକ୍ରମ ପ୍ରଦର୍ଶନ କରାଯାଇଥିଲା । ଏହି ଉତ୍ସବରେ ଓଡିଶା ବିଦ୍ୟାଳୟ ଓ ଗଣଶିକ୍ଷା ବିଭାଗ ପ୍ରମୁଖ ଶାସନ ସଚିବ ସତ୍ୟବ୍ରତ ସାହୁ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ।
ପ୍ରଥମଥର ପାଇଁ ସୈନିକ ସ୍କୁଲରେ ନାମ ଲେଖାଇଥିବା ବାଳିକା ଶିକ୍ଷାର୍ଥୀମାନଙ୍କୁ ମଧ୍ୟ ସ୍ବାଗତ କରାଯାଇଥିଲା । ଶିକ୍ଷାର୍ଥୀମାନେ ଏଠାରେ ଉପଲବ୍ଧ ସମସ୍ତ ସୁବିଧାସୁଯୋଗ ଓ ସମୟର ସଦୁପଯୋଗ କରି ଭବିଷ୍ୟତରେ ନିଜକୁ ସୁନାଗରିକ କରି ଗଢିତୋଳିବା ପାଇଁ ପ୍ରମୁଖ ଶାସନ ସଚିବ ସାହୁ ଦିଗଦର୍ଶନ ଦେଇଥିଲେ । ରାଜ୍ୟ ସରକାରଙ୍କ ତରଫରୁ ଏହି ଅନୁଷ୍ଠାନକୁ ଆବଶ୍ୟକ ସବୁପ୍ରକାର ସାହାଯ୍ୟ ସହଯୋଗ ଦିଆଯାଉଥିବା ଓ ଆଗାମୀ ଦିନରେ ସହାୟତା ପ୍ରଦାନ କରିବାର ପ୍ରତିଶ୍ରୁତି ଦେଇଥିଲେ । ଏହି ଉତ୍ସବରେ ଏୟାର୍ ମାର୍ଶାଲ ଜେ.ଏନ୍. ବର୍ମା, ଏୟାର ଜମୋଡର ଟି.କେ.ରଥ, ବ୍ରିଗେଡିଅର ଏଲ.ସି.ପଟ୍ଟନାୟକ, କ୍ୟାପ୍ଟେନ୍ ସୁଭାଷଚନ୍ଦ୍ର ଦାସ, ଗ୍ରୁପ୍ କ୍ୟାପ୍ଟେନ୍ ସଚିନ ଗୁପ୍ତା ପ୍ରମୁଖ ଉପସ୍ଥିତ ଥିଲେ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
