ଭୁବନେଶ୍ବର: ପୂର୍ବତଟ ରେଳପଥ ମୁଖ୍ୟାଳୟ ରେଳ ସଦନ ଠାରେ ଭୁବନେଶ୍ୱର ମହାନଗର ଅଧୀନରେ ପ୍ରଥମ କାର୍ଯ୍ୟାଳୟ କୋଭିଡ ଟିକା କେନ୍ଦ୍ର । ପ୍ରଧାନମନ୍ତ୍ରୀଙ୍କ ଆହ୍ୱାନ ଅନୁଯାୟୀ ଦେଶସାରା ଟିକା ଉତ୍ସବ ପାଳନ କରାଯାଉଛି ।
ମାନ୍ୟବର ପ୍ରଧାନମନ୍ତ୍ରୀଙ୍କ ଆହ୍ବାନକୁ ସମ୍ମାନିତ କରିବା ପାଇଁ ଏପ୍ରିଲ 11 ରୁ 14 ତାରିଖ ପର୍ଯ୍ୟନ୍ତ ପାଳନ କରାଯାଉଥିବା ଟିକା ଉତ୍ସବର ପ୍ରଥମ ଦିବସ ଅର୍ଥାତ 11 ଏପ୍ରିଲରେ ପୂର୍ବତଟ ରେଳପଥର ୮୩ ଜଣ କର୍ମଚାରୀଙ୍କୁ ଭୁବନେଶ୍ୱର ମ୍ୟୁନିସିପାଲିଟି କର୍ପୋରେସନ୍ (ବିଏମସି) ଅଧୀନରେ ପରିଚାଳିତ ପ୍ରଥମ କାର୍ଯ୍ୟକ୍ଷେତ୍ର ଟୀକାକରଣ କେନ୍ଦ୍ର ରେଳସଦନ ଠାରେ ଟୀକାକରଣ କରାଯାଇଛି ।
ପୂର୍ବତଟ ରେଳପଥର ମୁଖ୍ୟାଳୟ ରେଳ ସଦନକୁ ଭୁବନେଶ୍ୱର ମ୍ୟୁନିସିପାଲିଟି କର୍ପୋରେସନ୍ (ବିଏମସି) ଅଧୀନରେ ପ୍ରଥମ କାର୍ଯ୍ୟକ୍ଷେତ୍ର ଟୀକାକରଣ ସ୍ଥାନ ପାଇଁ ମନୋନୀତ କରାଯାଇଥିଲା । ବିଏମସିର ଅର୍ବାନ ଟାସ୍କ ଫୋର୍ସ ରେଳ ସଦନ ସହିତ ଅନ୍ୟ ଦୁଇଟି ସ୍ଥାନ ଯାଞ୍ଚ କରି ପୂର୍ବତଟ ରେଳ ମୁଖ୍ୟାଳୟରେ କାର୍ଯ୍ୟକ୍ଷେତ୍ର ଟୀକାକରଣ କେନ୍ଦ୍ର ପାଇଁ ଅସ୍ଥାୟୀ ଭାବରେ ଅନୁମୋଦନ କରିଥିଲା ।
ଏହା କେବଳ କର୍ମଚାରୀଙ୍କ ପାଇଁ ପ୍ରଥମ କାର୍ଯ୍ୟକ୍ଷେତ୍ର ଟୀକାକରଣ କେନ୍ଦ୍ର ଅଟେ। 45 ବର୍ଷରୁ ଅଧିକ ବୟସର ସମସ୍ତ କର୍ମଚାରୀ ଯେଉଁମାନେ ଆଂଶିକ ଟୀକାକରଣ କରିଛନ୍ତି କିମ୍ବା ଟୀକାକରଣ କରିନାହାଁନ୍ତି । ସେମାନେ ରେଳ ସଦନର ଉଦୟଗିରି ହଲରେ ଟୀକାକରଣ ଶିବିରରେ ଭାଗନେଇ ଏହି ଉତ୍ସବକୁ ସଫଳ କରାଇଛନ୍ତି ।
ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ନିର୍ଦ୍ଦେଶ ଅନୁଯାୟୀ ପୂର୍ବତଟ ରେଳପଥର ମହାପ୍ରବନ୍ଧକ ଶ୍ରୀ ବିଦ୍ୟା ଭୂଷଣ ଏହି ଟିକା ପରିଚାଳନା ପାଇଁ ଯଥେଷ୍ଟ ସତର୍କତା ଏବଂ ଯତ୍ନଶୀଳ ହେବାକୁ ରେଳବାଇ ମେଡିକାଲ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲେ । ପୂର୍ବତଟ ରେଳପଥର ପ୍ରମୁଖ ଚିକିତ୍ସା ନିର୍ଦ୍ଦେଶକ ଡକ୍ଟର କେସି ସାହୁ ଏହି କାର୍ଯ୍ୟକ୍ରମକୁ ସଂଯୋଜନା କରିଥିଲେ ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
