ଭୁବନେଶ୍ବର/ଭଦ୍ରକ: ରାଜ୍ୟ ବାହାରେ ଥାଇପାରେ ଶର୍ମିଷ୍ଠା । ବହୁ ଚର୍ଚ୍ଚିତ କ୍ୟାମେରାମ୍ୟାନ ମାନସ ସ୍ୱାଇଁ ହତ୍ୟା ମାମଲାର ମୁଖ୍ୟ ଅଭିଯୁକ୍ତ କୁହାଯାଉଥିବା ୱେବ ପୋର୍ଟାଲ ମାଲିକାଣୀ ଶର୍ମିଷ୍ଠା ରାଉତ ରାଜ୍ୟ ବାହାରେ ଥାଇପାରେ ବୋଲି ସନ୍ଦେହ କରୁଛି କ୍ରାଇମବ୍ରାଞ୍ଚ । ଏନେଇ ୨ ଟିମ ତଦନ୍ତ ଗଠନ କରାଯାଇ ତଦନ୍ତ କରାଯିବ କହିଛନ୍ତି କ୍ରାଇମବ୍ରାଞ୍ଚ ଏଡିଜି ସଞ୍ଜୀବ ପଣ୍ଡା ।
ଏଡିଜି କହିଛନ୍ତି ଯେ, ଗଠନ ହେବାକୁ ଥିବା ୨ଟି ଟିମ୍ ମଧ୍ୟରୁ ଗୋଟିଏ ରାଜ୍ୟ ବାହାରକୁ ପଠାଯିବ ଏବଂ ଅନ୍ୟଟି ଘଟଣାର ତଦନ୍ତ ଓ ପ୍ରମାଣ ଯୋଗାଡ କରିବ । ଜଣେ ଡିଏସପିଙ୍କ ନେତୃତ୍ବରେ ଟିମ ଗଠନ କରାଯାଇ ତଦନ୍ତ କରୁଛି କ୍ରାଇମବ୍ରାଞ୍ଚ୍ । ଏନେଇ ସମସ୍ତ ଟେକ୍ନିକାଲ ଦିଗ ଉପରେ ଧ୍ୟାନ ଦିଆଯାଇ ତଦନ୍ତ କରାଯିବ ବୋଲି କହିଛନ୍ତି କ୍ରାଇମବ୍ରାଞ୍ଚ ଏଡିଜି ସଞ୍ଜୀବ ପଣ୍ଡା ।
ସେପଟେ ହତ୍ୟାକାଣ୍ଡ ପରେ ଫେରାର୍ ଥିବା ଶର୍ମିଷ୍ଠାଙ୍କ ଆକାଉଣ୍ଟକୁ ଭାଇ ପରମେଶ୍ବର ଟଙ୍କା ପଠାଉଥିବା ଜାଣିବାକୁ ପାଇଛି ପୋଲିସ । ଶର୍ମିଷ୍ଠାଙ୍କ ଆକାଉଣ୍ଟକୁ 10 ହଜାର ଟଙ୍କା ଭାଇ ପରମେଶ୍ୱର ପଠାଇଥିବା ବିଶ୍ୱସ୍ତ ସୂତ୍ରରୁ ସୂଚନା । ଅନ୍ୟପଟେ ବିଜୟୱାଡାରୁ ପରମେଶ୍ୱରକୁ କଡା ସୁରକ୍ଷା ବଳୟ ମଧ୍ୟରେ ଚାନ୍ଦବାଲି ଥାନାରେ ପହଞ୍ଚାଇଛି ପୋଲିସ । ଆଜି(ବୁଧବାର) କୋର୍ଟରେ ହାଜର ହେବ ପରମେଶ୍ବର ।
ଭୁବନେଶ୍ବରରୁ ତାପସ ପରିଡା ଏବଂ ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
