ଭୁବନେଶ୍ବର: ଗାଡିଚାଳକ ସାବଧାନ । ଗୋଟିଏ ନମ୍ବରରେ ମାର୍କେଟରେ ବୁଲିଛି ଦୁଇ ଦୁଇଟି ଗାଡି । ଆପଣ ନିୟମ ଉଲଙ୍ଘନ କରନ୍ତୁ କି ନକରନ୍ତୁ , କିନ୍ତୁ ଆପଣଙ୍କ ଘରେ ଟ୍ରାଫିକ ନିୟମ ଉଲଙ୍ଘନ କରିଥିବା ନେଇ ଆପଣଙ୍କ ଗାଡି ନମ୍ବରରେ ପହଞ୍ଚିବ ଚାଲାଣ । ନିୟମ ନଭାଙ୍ଗି ଆପଣ ଏଭଳି ସମସ୍ୟାର ସମ୍ମୁଖୀନ ହୋଇପାରନ୍ତି । ଗତକାଲି ଏଭଳି ଏକ ଘଟଣା କଟକ ହଂସପାଳ ଅଞ୍ଚଳରେ ସାମ୍ମାକୁ ଆସିଛି । ଜଣେ ମୃତ ବ୍ୟକ୍ତିଙ୍କ ନାଁରେ ଆସିଛି ଟ୍ରାଫିକ ଚାଲାଣ । ଏଥି ସହ ନିୟମ ଉଲଙ୍ଘନ ସମୟରେ ଉଠାଯାଇଥିବା ଫଟୋ ମଧ୍ୟ ଆସିଛି । କିନ୍ତୁ ଟ୍ରାଫିକ ନିୟମ ଉଲଙ୍ଘନ ସମୟରେ ଉଠାଯାଇଥିବା ଫଟୋ ମୃତ ବ୍ୟକ୍ତି ନୁହଁନ୍ତି ବୋଲି ଜଣାପଡିଛି ।
ମୃତ ବ୍ୟକ୍ତିଙ୍କ ଗାଡି ୟାମାହା ମୋପେଡ ଗାଡି କିନ୍ତୁ ଚାଲାଣରେ ଆସିଛି ୟୁନିକନ ବାଇକ ନାଁରେ । ଯାହାକୁ ଜଣେ ଯୁବକ ଓ ଯୁବତୀ ବ୍ୟବହାର କରୁଛନ୍ତି । ଯେଉଁଥିରେ ଯୁବକ ଜଣଙ୍କ ଡ୍ରାଇଭ କରୁଥିବା ବେଳେ ଯୁବତୀ ଜଣକ ବିନା ହେଲମେଟରେ ପଛରେ ବସିଛନ୍ତି । ଯାହାର ଫଟୋକୁ ଆଧାର କରି ଏଭଳି ଏକ ଟ୍ରାଫିକ ଚାଲାଣ ଇସୁ କରାଯାଇଛି । କିନ୍ତୁ ଚାଲାଣ କାଟିଥିବା ଅଧିକାରି ଗାଡିର ମଡେଲ ଯାଞ୍ଚ ନ କରି ବା ଗାଡିର ନମ୍ବର ସହ ଫଟୋକୁ ମ୍ୟାଚ ନକରି କିଭଳି ଏପରି ଚାଲାଣ ଇସୁ କରୁଛନ୍ତି ତାକୁ ନେଇ ପ୍ରଶ୍ନ କରିଛନ୍ତି ଚାଲାଣ ଆସିଥିବା ମୃତ ବ୍ୟକ୍ତିଙ୍କ ପୁଅ ପ୍ରଭାତ ପ୍ରଧାନ।
ସୁଚନା ମୁତାବକ ତମାଣ୍ଡୋ ଗ୍ରାମର ମୃତ ସୁଦାମ ପ୍ରଧାନ ମୃତ୍ୟୁ ପୁର୍ବରୁ ଅସୁସ୍ଥ ହୋଇ ଘରେ ପଡିଥିଲେ । ଏନେଇ ତାଙ୍କର ଗାଡିଟି ମଧ୍ୟ ଏକ ବର୍ଷ ହେବ ଭଙ୍ଗା ଦଦରା ହୋଇ ଘରେ ପଡିରହିଛି। ଯାହାର ନଂ OD 02V5725 ରହିଛି । ତେବେ କଟକ ହଂସପାଳ ଅଞ୍ଚଳରେ ସେହି ସମାନ ନମ୍ବର ଗାଡିରେ ଯୁବକ ଯୁବତୀ ବୁଲୁଥିବା ବେଳେ ଟ୍ରାଫିକ ନିୟମ ଉଲଙ୍ଘନ କରିଥିଲେ । ଏହା ପରେ ଚାଲାଣଟି ମୃତ ବ୍ୟକ୍ତିଙ୍କ ଘରେ ପହଞ୍ଚିଥିଲା । ଏନେଇ ଅଭିଯୋଗ କରାଗଲେ ତଦନ୍ତ କରାଯିବ ବୋଲି କହିଛି କମିସନରେଟ ପୋଲିସ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
