ଭୁବନେଶ୍ବର: ଆଗକୁ ପୌର ନିର୍ବାଚନ । ଚଳିତ ବର୍ଷ ନିର୍ବାଚନ ହେବାକୁ ଥିଲେ ମଧ୍ୟ ଏହା କ୍ଷୀଣ । କାରଣ ସଂଶୋଧିତ ପୌର ପରିଷଦ ଆଇନ ବିଲ ବର୍ତ୍ତମାନ ଯାଏଁ ବିଧାନସଭାକୁ ଆସି ନାହିଁ । ଫଳରେ ନିର୍ବାଚନ ନୂତନ ବର୍ଷରେ ହେବା ଏକ ପ୍ରକାର ସ୍ପଷ୍ଟ । ତେବେ ଏବେ ଚାଲିଛି ରାଜନୈତିକ ଦଳଙ୍କ ପୁର୍ନବିନ୍ୟାସ କାର୍ଯ୍ୟ । ତିନି ପ୍ରମୁଖ ଦଳ ବିଜେଡି, ବିଜେପିଓ କଂଗ୍ରେସ ଏବେ ଦଳର ସାଂଗଠନିକ କାର୍ଯ୍ୟ ଆରମ୍ଭ କରିଦେଇଛନ୍ତି । ଉଭୟ ବିଜେପିଓ ବିଜେଡି ସଂଗଠନ କାମରେ ଆଗରେ ଥିବା ବେଳେ କଂଗ୍ରେସ ଏପର୍ଯ୍ୟନ୍ତ ପରାଜୟ ଯନ୍ତ୍ରଣାରୁ ମୁକୁଳି ପାରିନାହିଁ ।
ବିଜେପି ତାର ସଭ୍ୟ ସଂଗ୍ରହ ଅଭିଯାନକୁ ତ୍ବରାନିତ କରିଥିବା ବେଳେ ଏହା ଶେଷ ପର୍ଯ୍ୟାୟରେ ପହଞ୍ଚିଛି । ଦଳର ସଦସ୍ୟତା ଗ୍ରହଣ ଶେଷ ହେଲେ ବିଜେପି ଦଳୀୟ ନିର୍ବାଚନକୁ ଓହ୍ଲାଇବ । ପ୍ରଥମେ ବ୍ଲକ , ମଣ୍ଡଳଓ ପରେ ଜିଲ୍ଲା ସଭାପତି ନିର୍ବାଚନ ହେବ । ଏହାପରେ ରାଜ୍ୟ ସଭାପତି ମଧ୍ୟ ପରିବର୍ତ୍ତନ ହେବ । କାରଣ ଦଳର ନିୟମ ଅନୁସାରେ ଏକ ବ୍ୟକ୍ତି ଏକ ଦାୟିତ୍ବ ଅନୁସାରେ ବର୍ତ୍ତମାନର ସଭାପତି ଲୋକସଭାକୁ ନିର୍ବାଚିତ ହୋଇସାରିଛନ୍ତି । ସେହି ଦୃଷ୍ଟିରୁ ସଭାପତି ମଧ୍ୟ ବର୍ଷ ଶେଷ ସୁଦ୍ଧା ଦଳକୁ ମିଳିବ । ଏଥିପାଇଁ ନିର୍ବାଚନ ଅଧିକାରୀ ମଧ୍ୟ ନିଯୁକ୍ତ ହୋଇସାରିଛନ୍ତି ।
ଅନ୍ୟପଟେ ବିଜେଡି ମଧ୍ୟ ତାର ସଂଗଠନ ପୁନର୍ଗଠନ କାମ ଆରମ୍ଭ କରିଛି । ଏହାରି ଭିତରେ ଦଳ ନିର୍ବାଚନରେ ଟିକେଟ ପାଇନଥିବା ନେତାଙ୍କୁ ଥଇଥାନ କରିସାରିଛି । ଏହାସହ ସମସ୍ତ ମୋର୍ଚ୍ଚାର ମୁଖ୍ୟଙ୍କୁ ମଧ୍ୟ ଦଳ ଖୁବଶିଘ୍ର ନିଯୁକ୍ତି ଦେବାକୁ ଯାଉଛି ।
ସେପଟେ କଂଗ୍ରେସ ମଧ୍ୟ ନିଜ ଦଳ ସଜାଡିବା ସ୍ଥିତିକୁ ଆସି ନାହିଁ । ପରାଜୟ ଗ୍ଲାନିରେ ଦଳ ଏବେବି ଝୁଣ୍ଟୁଛି । ଯଦିଓ କିଛିଦିନ ତଳେ ଏଆଇସିସିର କାର୍ଯ୍ୟକାରୀ ସଭାପତି ନିଯୁକ୍ତି ହୋଇଛନ୍ତି । ଏହାପରେ ଦଳର ସମସ୍ତ ରାଜ୍ୟର ନିର୍ବାଚନ ଅନୁଷ୍ଠିତ ହେବ । ରାଜ୍ୟ କଂଗ୍ରେସ ଆଶା ରଖିଛି ଦଳ ବର୍ଷ ଶେଷ ଶୁଦ୍ଧା ନୂଆ ସଭାପତି ଆସିବେ । ଏହାପରେ ଦଳ ପୌର ପରିଷଦ ନିର୍ବାଚନ ପାଇଁ ପ୍ରସ୍ତୁତି ହେବ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
