ଭୁବନେଶ୍ବର: ଭାରତୀୟ ଯୁବ ଫୁଟବଲ ଦଳକୁ 3-0 ଗୋଲରେ ହରାଇ ସିଏଜି ଫୁଟବଲ ଦଳ ବିଜୟୀ । ଭାରତର ମହାଲେଖା ନିୟନ୍ତ୍ରକ ଓ ମହାପରୀକ୍ଷକଙ୍କ ଆନୁକୂଲ୍ୟରେ ଭାରତୀୟ ଫୁଟବଲ ମହାସଂଘ ସହଯୋଗରେ ସିଏଜି ଓ ଭାରତୀୟ ଯୁବ ଫୁଟବଲ ଦଳ ମଧ୍ୟରେ ଏହି ବନ୍ଧୁତାପୂର୍ଣ୍ଣ ଦିବାରାତ୍ର ଫୁଟବଲ ମ୍ୟାଚ୍ ସ୍ଥାନୀୟ 3 ନମ୍ବର କ୍ୟାପିଟାଲ ହାଇସ୍କୁଲ ପଡିଆରେ ଅନୁଷ୍ଠିତ ହୋଇଥିଲା । ଏହି ମ୍ୟାଚକୁ ପ୍ରଧାନ ମହାଲେଖାକାର ରାଜ କୁମାର ମୁଖ୍ୟ ଅତିଥି, ମହାଲେଖାକାର ବିଶ୍ବନାଥ ସିଂହ ଜାଡୋନ, ଭାରତୀୟ ଫୁଟବଲ ମହାସଂଘର ବୈଷୟିକ ନିର୍ଦେଶକ ଦୀପଙ୍କର ବିଶ୍ବାସ ସମ୍ମାନିତ ଅତିଥି ଭାବେ ଯୋଗ ଦେଇ ଟୁର୍ନାମେଣ୍ଟକୁ ଉଦଘାଟନ କରିଥିଲେ ।
ସିଏଜି ଦଳରେ ଓଡିଶା ଏ. ଜି ର ଅର୍ପଣ ଲାକ୍ରା ଓ ଗୌରବ ନେଗୀ ରକ୍ଷଣ ଭାଗ ଖେଳାଳି ଭାବେ ପ୍ରତିନିଧିତ୍ବ କରୁଛନ୍ତି । ଖେଳର ପ୍ରଥମାର୍ଦ୍ଧରେ ଗୋଲ ଶୂନ୍ୟ ରହିଥିଲା । ଖେଳର ଦ୍ବିତୀୟାର୍ଦ୍ଧରେ ସିଏଜି ଦଳ 3ଟି ଗୋଲ ଦେଇ ବିଜୟୀ ହୋଇଥିଲେ । ଓଡିଶା ଏ. ଜି ତଥା ସିଏଜି ଦଳର ସ୍ଥାନୀୟ ପରିଚାଳକ ବରୁଣ ପ୍ରସନ୍ନ ମାଝି ଖେଳ ପରିଚାଳନା କରିଥିଲେ ।
