ଭୁବନେଶ୍ବର: ମହାପ୍ରଭୁଙ୍କ ୟେସ ବ୍ୟାଙ୍କରେ 545 କୋଟି ଟଙ୍କା ରଖିବା ପ୍ରସଙ୍ଗରେ ବିରୋଧୀ ଆଣିଥିବା ମୁଲତବୀ ନୋଟିସ ଉପରେ ଆଜି ବିଧାନସଭାରେ ଆଲୋଚନା ହୋଇଛି । ଏ ପ୍ରସଙ୍ଗରେ ସରକାରଙ୍କ ପକ୍ଷରୁ ଅର୍ଥମନ୍ତ୍ରୀ ନିରଞ୍ଜନ ପୁଜାରୀ ଉତ୍ତର ରଖିଛନ୍ତି । ଅର୍ଥମନ୍ତ୍ରୀ କହିଛନ୍ତି ଅଧିକ ସୁଧ ପାଇଁ ଶ୍ରୀମନ୍ଦିର ପ୍ରଶାସନ ବର୍ଷକ ପାଇଁ ୟେସ ବ୍ୟାଙ୍କରେ ଟଙ୍କା ରଖିଥିଲା । ୟେସ ବ୍ୟାଙ୍କ ସର୍ବାଧିକ 8.61 ପ୍ରତିଶତ ସୁଧ ଦେଇଥାନ୍ତା । ଏଣୁ ଶ୍ରୀମନ୍ଦିର ପ୍ରଶାସନ ୟେସ ବ୍ୟାଙ୍କରେ ଅର୍ଥ ରଖିଥିଲା ।
ମନ୍ତ୍ରୀ ଆହୁରି କହିଛନ୍ତି ମହାପ୍ରଭୁଙ୍କ ଟଙ୍କା କେଉଁଠି ରହିବ, ତାହା ସମ୍ପୂର୍ଣ୍ଣ ଭାବେ ଶ୍ରୀମନ୍ଦିର ପ୍ରଶାସନର ନିଜସ୍ବ ନିଷ୍ପତ୍ତି । ସେଥିରେ ସରକାର କୌଣସି ହସ୍ତକ୍ଷେପ କରନ୍ତି ନାହିଁ । ଶ୍ରୀମନ୍ଦିର ପ୍ରଶାସନ ଏହାର ତଦାରଖ କରିଥାନ୍ତି । 2019 ଅକ୍ଟୋବରରେ ରାଜ୍ୟ ସରକାର ଏକ ବିଜ୍ଞପ୍ତି ପ୍ରକାଶ କରିଥିଲେ । ଯେଉଁଥିରେ ଘରୋଇ ବ୍ୟାଙ୍କରେ ସରକାରୀ ଅର୍ଥ ନରଖିବାକୁ । କିନ୍ତୁ ଏହାକୁ ରିର୍ଜଭ ବ୍ୟାଙ୍କର ଅଧିକାରୀ ନାପସନ୍ଦ କରିଥିଲେ । ଏହାସହ ଘରୋଇ ବ୍ୟାଙ୍କ ଉପରେ ରିର୍ଜଭ ବ୍ୟାଙ୍କର ନଜର ଥିବା ଥିବା କୁହାଯାଇଥିଲା । ଫଳରେ ଶ୍ରୀମନ୍ଦିର ପ୍ରଶାସନ 12ଟି ବ୍ୟାଙ୍କକୁ କୋଟେସନ ମାଗିଥିଲା । ଯେଉଁଥିରେ ୟେସ ବ୍ୟାଙ୍କ ଟେଣ୍ଡର ପାଇଥିଲା । ସେହି ଅନୁସାରେ ସ୍ବଛତାର ସହ ୟେସ ବ୍ୟାଙ୍କରେ ଟଙ୍କା ଜମା କରିଥିଲେ ଶ୍ରୀମନ୍ଦିର ପ୍ରଶାସନ ବୋଲି ଅର୍ଥମନ୍ତ୍ରୀ କହିଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
