ଭୁବନେଶ୍ବର: ବିନା ସିବିଏସଇ ସ୍ବୀକୃତି ଏବଂ ଏନଓସି ରେ ବେଆଇନ ଭାବେ ପରିଚାଳନା ହେଉଥିବା ସନସାଇନ ସ୍କୁଲର ଦାୟିତ୍ବ ଜିଲ୍ଲାପାଳ ନିଅନ୍ତୁ । ଅନ୍ୟ ବେଆଇନ ସ୍କୁଲ ଗୁଡିକୁ ସରକାର ତୁରନ୍ତ ବନ୍ଦ କରନ୍ତୁ ଓ ଅଷ୍ଟମ ଶ୍ରେଣୀ ଛାତ୍ରୀ ରାଜେଶ୍ବରୀ ନାୟକ ହତ୍ୟାର ସ୍ବତନ୍ତ୍ର ତଦନ୍ତ କରନ୍ତୁ ବୋଲି ଓଡିଶା ଅଭିଭାବକ ମହାସଂଘ ଆଜି (ମଙ୍ଗଳବାର) ଦାବି କରିଛି।
କଳାହାଣ୍ଡିର ବହୁଚର୍ଚ୍ଚିତ ସନସାଇନ ସ୍କୁଲର କାର୍ଯ୍ୟକାରୀ ଅଧକ୍ଷ୍ୟା ମମିତା ମେହେର ହତ୍ୟା ମାମଲା ବର୍ତ୍ତମାନ ରାଜ୍ୟରେ ହଇଚଇ ସୃଷ୍ଟି କରିଛି l ଘଟଣା ପରଠାରୁ ଉକ୍ତ ଶିକ୍ଷାନୁଷ୍ଠାନ ଚର୍ଚ୍ଚାରେ ଅଛି । ଯାହାକୁ ନେଇ ଆଜି ରାଜ୍ୟ ସରକାରଙ୍କ ଉପରେ ବର୍ଷିଛି ଅଭିଭାବକ ସଂଘ । ସଂଘ ଅଭିଯୋଗ କରିଛି, ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଲା ଯେ ସନ ସାଇନ ପବ୍ଲିକ ସ୍କୁଲଟି ସିବିଏସଇର ବିନା ସ୍ବୀକୃତି, ସରକାରଙ୍କ ବିନା ଏନଓସିରେ ବେଆଇନ ଭାବେ ଚାଲୁଥିଲା l ଓଡିଶା ଅଭିଭାବକ ମହାସଂଘ ଦୀର୍ଘ ବର୍ଷ ହେଲା ଯେଉଁ ଅଭିଯୋଗ କରିଆସୁଛନ୍ତି ରାଜ୍ୟରେ ବିନା ସ୍ବୀକୃତିରେ ହଜାର ହଜାର ବେଆଇନ ସ୍କୁଲ ଚାଲୁଛି । ତାହା ଆଜି ସତ୍ୟ ହୋଇଛି । ସରକାର ସମସ୍ତ ବେଆଇନ ସ୍କୁଲକୁ କାର୍ଯ୍ୟାନୁଷ୍ଠାନ ନେଇ ବନ୍ଦ କରନ୍ତୁ l ସରକାର କେବଳ ଚିଠି ଲେଖି ଚୁପ ବସିଥିବା ସଂଘ ଅଭିଯୋଗ କରିଛି ।
ଯାହାର ସୁଯୋଗ ନେଇ ରାଜ୍ୟରେ ଶହ ଶହ ଗୋବିନ୍ଦ ସାହୁ ଏଭଳି ବେଆଇନ ସ୍କୁଲ ଚଳାଉଛନ୍ତି । ହଜାର ହଜାର ଶିକ୍ଷୟତ୍ରୀ ଓ ଛାତ୍ରୀ ମାନଙ୍କୁ ଶୋଷଣ କରୁଛନ୍ତି l ସେମାନେ ରାଜ୍ୟରେ ହଜାର ହଜାର ଛାତ୍ର ଛାତ୍ରୀ, ଅଭିଭାବକ ମାନଙ୍କୁ ମଧ୍ୟ ଅଯଥାରେ ଶୋଷଣ ସହ ହଇରାଣ ହରକତ କରୁଛନ୍ତି l କଳାହାଣ୍ଡିର ସନସାଇନ ସ୍କୁଲ ଭାତ ହାଣ୍ଡିରୁ ଭାତ ଚିପିଲା ଭଳି ଗୋଟିଏ l ଏଥିରୁ ସରକାର ଶିକ୍ଷା ଲାଭ କରି ତୁରନ୍ତ କାର୍ଯ୍ୟାନୁଷ୍ଠାନ ନିଅନ୍ତୁ l ଛାତ୍ର ଛାତ୍ରୀଙ୍କ ସ୍ବାର୍ଥ ପାଇଁ ସନସାଇନ ସ୍କୁଲର ପରିଚାଳନା ଦାୟିତ୍ବ ବର୍ତ୍ତମାନ ଜିଲ୍ଲାପାଳ ନିଅନ୍ତୁ ବୋଲି ଅଭିଭାବକ ସଂଘ ଦାବି କରିଛି ।
ସେହିପରି 2000 ମସିହାରେ ଅଷ୍ଟମ ଶ୍ରେଣୀ ଛାତ୍ରୀ ରାଜେଶ୍ବରୀ ନାୟକକୁ ଟ୍ରାକଟର ଚଢାଇ ହତ୍ୟା ମାମଲାର ମଧ୍ୟ ସ୍ବତନ୍ତ୍ର ତଦନ୍ତ କରାଯାଉ ବୋଲି ମହାସଂଘ ଦାବି କରିଛି । ସାମ୍ବାଦିକ ସମ୍ମିଳନୀରେ ଅଧକ୍ଷ୍ୟ ବାସୁଦେବ ଭଟ୍ଟ, ସହ ଅଧକ୍ଷ ଭୁମୋହନ ପଟ୍ଟନାୟକ, ପ୍ରସନ୍ନ ବିଶୋୟୀ, କାର୍ତ୍ତିକ ସାହୁ, ସ୍ବପ୍ନେନ୍ଦୁ ସାମନ୍ତରାୟ, ସତ୍ୟଜିତ ଦାଶ ଓ ସୂର୍ଯ୍ୟନାରାୟଣ ଜେନା ଉପସ୍ଥିତ ଥିଲେ l
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
