ଭୁବନେଶ୍ବର: ମୁଖ୍ୟ ଶାସନ ସଚିବ ଭାବେ ଦାୟିତ୍ବ ନେଲେ ସୁରେଶ ମହାପାତ୍ର । ଆଜି ନୂଆବର୍ଷରେ ସେ ମୁଖ୍ୟ ଶାସନ ସଚିବ ଭାବେ କାର୍ଯ୍ୟରେ ଯୋଗ ଦେଇଛନ୍ତି । 14 ମାସ ଅର୍ଥାତ 2022 ଫେବୃଆରୀ ପର୍ଯ୍ୟନ୍ତ ସୁରେଶଙ୍କ କାର୍ଯ୍ୟକାଳ ରହିଛି । ସେହିପରି ପ୍ରଦୀପ ଜେନା ଉନ୍ନୟନ କମିଶନର ଭାବେ ଦାୟିତ୍ବ ନେଇଛନ୍ତି ।
ଏହି ଅବସରରେ ନୂତନ ଜୀବିକା ଉପାୟ ସୃଷ୍ଟି ଏବଂ ଦ୍ରୁତ ଆର୍ଥିକ ପ୍ରଗତି ଉପରେ ଗୁରୁତ୍ତ୍ବ ଦିଆଯିବ ବୋଲି ନୂଆ ମୁଖ୍ୟ ଶାସନ ସଚିବ ସୁରେଶ ମହାପାତ୍ର କହିଛନ୍ତି । ସୁରେଶ ମହାପାତ୍ର 1986 ବ୍ୟାଚର ଆଇଏଏସ୍ ଅଫିସର ହୋଇ ଥିବାବେଳେ ସେ ରାଜ୍ୟ ସରକାରଙ୍କ ଅନେକ ଗୁରୁତ୍ବପୂର୍ଣ୍ଣ ବିଭାଗରେ ନିଜର ଦାୟିତ୍ବ ସମ୍ପାଦନା କରିଛନ୍ତି । ନୂଆପଡା ଜିଲ୍ଲାରୁ ନିଜର ଚାକିରି ଜୀବନ ଆରମ୍ଭ କରିଥିଲେ ସୁରେଶ । 1996 ନବକଳେବର ସମୟରେ ପୁରୀ ଜିଲ୍ଲାପାଳ ଓ 2015 ମସିହାରେ ଶ୍ରୀମନ୍ଦିର ମୁଖ୍ୟ ପ୍ରଶାସନ ଦାୟିତ୍ତ୍ବ ମଧ୍ୟ ତୁଲାଇଛନ୍ତି ।
ତେବେ ଗୁରୁବାର ପୂର୍ବତନ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ ଅବସର ଗ୍ରହଣ କରିଥିଲେ । ଅସିତ୍ଙ୍କ ଅବସର ପୂର୍ବରୁ ସରକାର ସୁରେଶ ମହାପାତ୍ରଙ୍କୁ ମୁଖ୍ୟ ଶାସନ ସଚିବ ଭାବେ ନିଯୁକ୍ତି ଦେଇଥିଲେ । ଏନେଇ ଡିସେମ୍ବର 25 ତାରିଖରେ ସରକାର ଏହା ଉପରେ ମୋହର ମାରିଥିଲେ । ସେହିପରି ଅସିତ୍ ତ୍ରିପାଠୀଙ୍କୁ ପଶ୍ଚିମ ଓଡିଶା ବିକାଶ ପରିଷଦ ଅଧ୍ୟକ୍ଷ ଭାବେ ନିଯୁକ୍ତି ଦେଇଥିଲେ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
