ଭୁବନେଶ୍ବର: ବିପିୟୁଟି କର୍ତ୍ତୃପକ୍ଷଙ୍କ ପକ୍ଷରୁ ଫାଇନାଲ୍ ସେମିଷ୍ଟାରର ପରୀକ୍ଷା ଜୁନ୍ ଶେଷ କିମ୍ବା ଜୁଲାଇ ପ୍ରଥମ ସପ୍ତାହରେ କରିବା ପାଇଁ ଗାଇଡଲାଇନ ପ୍ରସ୍ତୁତ କରାଯାଇଛି । ଯାହାକୁ ନେଇ ଛାତ୍ରଛାତ୍ରୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି । ତେଣୁ ଏହି ନିଷ୍ପତ୍ତିର ପୁନଃବିଚାର କରିବା ପାଇଁ ସେମାନଙ୍କ ପକ୍ଷରୁ ସରକାରଙ୍କ ନିକଟରେ ଦାବି କରାଯାଇଛି ।
ସୂଚନାଯୋଗ୍ୟ, କୋରୋନା ମହାମାରୀ ସମୟରେ ବିପିୟୁଟି କର୍ତ୍ତୃପକ୍ଷ ଛାତ୍ରଛାତ୍ରୀଙ୍କ ଜୀବନକୁ ବିପଦରେ ପକାଇ ପରୀକ୍ଷା କରିବାକୁ ନିଷ୍ପତ୍ତି ନେଇଥିବା ସେମାନେ କହିଛନ୍ତି । ତେବେ ଛାତ୍ରଛାତ୍ରୀମାନେ ପରୀକ୍ଷା ଦେବାକୁ ମନା କରି ନାହାନ୍ତି ବରଂ କୋରୋନାର ଭୟବହାତା ଦୃଷ୍ଟିରୁ ଏହା ଦ୍ବାରା ଛାତ୍ରଛାତ୍ରୀମାନେ ସଂକ୍ରମଣ ହେବାର ବହୁତ ସମ୍ଭାବନା ଥିବା କହିଛନ୍ତି ।
ତେଣୁ ସେମାନେ ପରୀକ୍ଷା ଅପେକ୍ଷା ଜୀବନକୁ ଅଧିକ ମୂଲ୍ୟବାନ ଭାବୁଥିବାବେଳେ ସରକାର ତାହାକୁ ହୃଦୟଙ୍ଗମ କରିବା ସହ ଏହି ନିଷ୍ପତ୍ତିରେ ପରିବର୍ତ୍ତନ କରିବାକୁ ଦାବି କରିଛନ୍ତି । ନଚେତ ଆଗାମୀ ଦିନରେ ଛାତ୍ରଛାତ୍ରୀମାନେ ଏହାକୁ ନେଇ ଦୃଢ଼ ପ୍ରତିବାଦ କରିବେ ବୋଲି ଚେତାବନୀ ଦେଇଛନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
