ଭୁବନେଶ୍ବର : ବିଧାନସଭାରେ ବାଚସ୍ପତିଙ୍କ ଦୁଇଟି ଗୁରୁତ୍ବପୂର୍ଣ୍ଣ ରୁଲିଂ। ମହାତ୍ମା ଗାନ୍ଧୀଙ୍କ ହତ୍ୟାକାରୀ ପ୍ରସଙ୍ଗକୁ ନେଇ ବିରୋଧୀ ଦଳ ଉପନେତା ବିଷ୍ଣୁଚରଣ ସେଠୀ ଜାତୀୟ ସ୍ତରର ଦୁଇ କଂଗ୍ରେସ ନେତାଙ୍କ ନାମ ନେଇଥିବାରୁ ଏହାକୁ ବିଧାନସଭା ବିବରଣୀରୁ ବାଦ୍ ଦେବାକୁ ବାଚସ୍ପତି ରୁଲିଂ ଦେଇଛନ୍ତି । ଏହା ସହ ସବୁ ବିଶ୍ବବିଦ୍ୟାଳୟର ବାର୍ଷିକ ରିପୋର୍ଟ ସହ ଅଡିଟ ରିପୋର୍ଟ ଗୃହରେ ଉପସ୍ଥାପନ କରିବାକୁ ମଧ୍ୟ ବାଚସ୍ପତି କହିଛନ୍ତି ।
ଗତ ଦୁଇଦିନ ଧରି ମହାତ୍ମା ଗାନ୍ଧୀଙ୍କ ହତ୍ୟାକାରୀ ପ୍ରସଙ୍ଗକୁ ନେଇ ବିଜେପି ଓ କଂଗ୍ରେସ କଥାକଟାକଟି ହୋଇଥିଲେ। ଏପରିକି କଥା ଛଳରେ ବିରୋଧୀ ଦଳର ଉପନେତା ଦୁଇ ଜାତୀୟ ସ୍ତରର କଂଗ୍ରେସ ନେତାଙ୍କ ନାମ ନେଇଥିଲେ । ତେବେ ବିଧାନସଭାରେ ବାହାର ନେତାଙ୍କୁ ନେଇ ଗୃହରେ ଚର୍ଚ୍ଚା ହୋଇପାରିବ ନାହିଁ ବୋଲି ନିୟମ ରହିଥିବାରୁ ବାଚସ୍ପତି ଏହାକୁ ଅନୁଧ୍ୟାନ କରି ବିବରଣୀରୁ ବାଦ୍ ଦେବା ପାଇଁ ରୁଲିଂ ଦେଇଛନ୍ତି।
ସେହିପରି ରାଜ୍ୟରେ ଥିବା ସବୁ ବିଶ୍ବବିଦ୍ୟାଳୟର ବାର୍ଷିକ ଅଡିଟ ରିପୋର୍ଟ ଗୃହରେ ଉପସ୍ଥାପନ ହେବା କଥା ହେଲେ ହେଉନଥିବା କହି ଗତ 20 ତାରିଖରେ ଏହା ଉଠାଇଥିଲେ କଂଗ୍ରେସ ଦଳନେତା ନରସିଂହ ମିଶ୍ର । ତେବେ ଏହାକୁ ଅନୁଧ୍ୟାନ କରିବା ପରେ ଗୃହରେ ବାଚସ୍ପତି ରୁଲିଂ ଦେଇଛନ୍ତି। ବାର୍ଷିକ ରିପୋର୍ଟ ସହ ଅଡିଟ୍ ରିପୋର୍ଟ ଉପସ୍ଥାପନ କରିବାକୁ ସେ କହିଛନ୍ତି।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
