ଭୁବନେଶ୍ବର: କଂଗ୍ରେସ ଭବନ ଗଣ୍ଡଗୋଳରେ ସାମିଲ ହୋଇଥିଲେ ସାଲିଆସାହି ଯୁବକ। ଖଣ୍ଡା ଧରି ଉତ୍ପାତ କରୁଥିବା ବେଳେ ଗିରଫ କରିଛି କମିସନରେଟ ପୋଲିସ । ଖଣ୍ଡା ବୁଲାଉଥିବା ଯୁବକ ନିଳାଞ୍ଚଳ ବେହେରାକୁ ଗିରଫ ସହ ଖଣ୍ଡାକୁ ଜବତ କରିଛି ।
ତେବେ ଗିରଫ ଅଭିଯୁକ୍ତ ଜଣଙ୍କ ଗଞ୍ଜାମ ଜିଲ୍ଲାର ହୋଇଥିବା ବେଳେ ସାଲିଆ ସାହିରେ ରହୁଥିବା ଜଣାପଡ଼ିଛି । ଗଣ୍ଡଗୋଳ ପାଇଁ ତାଙ୍କ ସହ ଆଉ କିଛି ଯୁବକଙ୍କୁ ଅଣାଯାଇଥିଲା ବୋଲି କମିସନରେଟ ପୋଲିସ ଜାଣିବାକୁ ପାଇଛି। ତେବେ ଯୁବ ଛାତ୍ର ନେତା ଚୟନ ନେଇ ଏଭଳି ଗଣ୍ଡଗୋଳ ହୋଇଥିବା ବେଳେ କିଛି ଗୋଷ୍ଠୀ ବିରୋଧ କରି କଂଗ୍ରସ ଭବନରେ ଧସେଇ ପସିବା ସହ କଂଗ୍ରେସ ଭବନ ସମ୍ମୁଖରେ ଗଣ୍ଡଗୋଳ କରିଥିଲେ।
ଗିରଫ ହୋଇଥିବା ଅଭିଯୁକ୍ତ ଭଳି ଅନେକ ଯୁବକ ଏହି ଗଣ୍ଡଗୋଳରେ ସାମିଲ ଥିଲେ। ଅଭିଯୁକ୍ତକୁ ଆପିସିର ଧାରା ୧୪୭,୧୪୮, ୨୯୪, ୩୨୩, ୩୫୩, ୩୦୭, ୫୦୬,୧୪୯ ଓ ଆର୍ମସ ଆକ୍ଟରେ ଗିରଫ କରିଛି ପୋଲିସ । ତେବେ ଏହା ପଛର ମାଷ୍ଟରମାଇଣ୍ଡ କିଏ ? କିଏ ଆଣିଥିଲା ଏଭଳି ଅସାମାଜିକ ଯୁବକଙ୍କୁ ଗଣ୍ଡଗୋଳ ପାଇଁ ? ଏହାକୁ ନେଇ ଉଭୟ ପୋଲିସ ଓ କଂଗ୍ରେସ ଦଳର ବରିଷ୍ଠ ନେତା ମଧ୍ୟ ଚଳାଇଛନ୍ତି ଖୋଳତାଡ଼ ।
ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ
