ଭୁବନେଶ୍ବର: ବାତ୍ୟାକୁ ନେଇ ନଗର ଉନ୍ନୟନ ବିଭାଗ ପକ୍ଷରୁ ଜାେରଦାର ପ୍ରସ୍ତୁତି । ଏନେଇ 12ଟି ଜିଲ୍ଲାରେ ସମ୍ଭାବ୍ୟ ବାତ୍ୟା ପ୍ରଭାବିତ ହେବା ନେଇ ସହାରଞ୍ଚଳ ପାଇଁ ସ୍ଵତନ୍ତ୍ର ଗାଇଡଲାଇନ ଜାରି କରିଛି ବିଭାଗ । ସମସ୍ତ ମ୍ୟୁନିସପାଲିଟି ଓ ଏନ୍ଏସି ମାନଙ୍କୁ ଯୁଦ୍ଧ କାଳୀନ ଭିତ୍ତିରେ ପ୍ରସ୍ତୁତ ରହିବା ପାଇଁ ନିର୍ଦ୍ଦେଶ ଦିଆଯାଇଛି । ଏହି ଗାଇଡଲାଇନ ଅନୁସାରେ ଭଦ୍ରକ, ବାଲେଶ୍ଵର, ମୟୂରଭଞ୍ଜ, ଯାଜପୁର, କେନ୍ଦ୍ରାପଡା, ଜଗତସିଂହପୁର, କଟକ, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ ଓ ଗଜପତି ଜିଲ୍ଲା ପାଇଁ ଜାରି ହୋଇଛି ।
ନଗର ଉନ୍ନୟନ ବିଭାଗ ପକ୍ଷରୁ ଜାରି ହୋଇଥିବା ଏହି ଗାଇଡଲାଇନ ମୁତାବକ ଏହି ସବୁ ଜିଲ୍ଲାରେ ଥିବା ମ୍ୟୁନିସପାଲିଟ୍ ଅଞ୍ଚଳରେ ବାତ୍ୟା ଆଶ୍ରୟସ୍ଥଳୀର ଚିହ୍ନଟ ଏବଂ ବ୍ୟବସ୍ଥା କରିବା ପାଇଁ ନିର୍ଦ୍ଦେଶ ଦିଆଯାଇଛି । ଏହାସହ ବୟସ୍କ, ଶିଶୁ, ଗର୍ଭବତୀ ମହିଳା, ଦିବ୍ୟାଙ୍ଗ ମାନଙ୍କ ପାଇଁ ସ୍ଵତନ୍ତ୍ର ବ୍ୟବସ୍ଥା କରିବା ସହ ମେଡିସିନ ମହଜୁଦ ରଖିବା ପାଇଁ କୁହାଯାଇଛି । ଏହାସହ ବାତ୍ୟା ଆଶ୍ରୟସ୍ଥଳୀକୁ ସାନିଟାଇଜ କରିବା ସହ ଆଶ୍ରୟସ୍ଥଳୀ ଗୁଡିକରେ ସାନିଟାଇଜର ଓ ସାବୁନ ଆଦି ମହଜୁଦ ରଖିବା ଉପରେ ଗୁରୁତ୍ୱ ଦିଆଯାଇଛି ।
ଏବଂ ମହିଳା ମାନେ ରହୁଥିବା ଆଶ୍ରୟସ୍ଥଳୀରେ ମହିଳା ହୋମଗାର୍ଡ ମୁତୟନ କରିବା ପାଇଁ କୁହାଯାଇଛି । ଏହାସହ ରନ୍ଧାଖାଦ୍ୟ, ପ୍ଲେଟ ଓ ଗ୍ଲାସ ମହଜୁଦ ରଖିବ ପାଇଁ ନିର୍ଦ୍ଦେଶ, କୋଭିଡ୍ କଟକଣାକୁ କଡାକଡି ପାଳନ କରିବା ପାଇଁ ମଧ୍ୟ ନିର୍ଦ୍ଦେଶ । ସେଲଟର ହୋମ ରେ ଲାଇଟ୍ ଓ ଡିଜି ମେସିନ ମହଜୁଦ ରଖିବା ପାଇଁ କୁହାଯାଇଛି । ଜଳ ଯୋଗାଣ ପାଇଁ ଏକ ୨୪ ଘଣ୍ଟିଆ କଣ୍ଟ୍ରୋଲ ରୁମ ବ୍ୟବସ୍ଥା କରିବା ପାଇଁ କୁହାଯାଇଛି । ଏଥିପାଇଁ ଏକ ହ୍ଵାଟ୍ସଆପ ଗ୍ରୁପ କରିବା ପାଇଁ ନିର୍ଦ୍ଦେଶ ନିଆଯାଇଛି । ଏହାସହ ଗଛକାଟା ମେସିନ, ଡ୍ରେନେଜରେ ପାଣି ଜମିବା ଏବଂ ବ୍ଲକେଜ ମରାମତି ପାଇଁ ପ୍ରସ୍ତୁତ ରହିବାକୁ କୁହାଯାଇଛି । ଜଳ ନିଷ୍କାସନ ପାଇଁ ଉଚ୍ଚ କ୍ଷମତା ସମ୍ପନ୍ନ ପମ୍ପ ବ୍ୟବସ୍ଥା କରାଯାଇଛି । ଏନେଇ ନଗର ଉନ୍ନୟନ ବିଭାଗ ପକ୍ଷରୁ ସମସ୍ତ ମ୍ୟୁନିସପାଲିଟକୁ ନିର୍ଦ୍ଦେଶ ଦିଆଯାଇଛି ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
