ଭୁବନେଶ୍ବର: ଶନିବାର ରାଜ୍ୟ ପଞ୍ଚାୟତରାଜ ମନ୍ତ୍ରୀ ପ୍ରତାପ ଜେନାଙ୍କ ପକ୍କାଘର ବୟାନକୁ ନେଇ ତାତିଛି ବିଜେପି । ରବିବାର ଦଳୀୟ କାର୍ଯ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳଳୀରେ ରାଜ୍ୟ ସରକାରଙ୍କ ଉପରେ ଏହି ପ୍ରସଙ୍ଗରେ ଜୋରଦାର ବର୍ଷିଛି ।
ଦଳୀୟ ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ କହିଛନ୍ତି ବିଜୁବାବୁଙ୍କ ନାଁରେ 365 ଦିନ ଉତ୍ସବ ପାଳନ କରନ୍ତୁ ଆପତ୍ତି ନାହିଁ । କିନ୍ତୁ ଗରିବଙ୍କ ଦାବିକୁ ଗୋଇଠା ମାରି ଉତ୍ସବକୁ ବରଦାସ୍ତ କରାଯିବନି । 2022 ସୁଦ୍ଧା ଦେଶର ସମସ୍ତ ଗରିବଙ୍କୁ ପକ୍କାଘର ଯୋଗାଇ ଦେବାପାଇଁ କେନ୍ଦ୍ର ସରକାର ମହତକାଂକ୍ଷୀ ଯୋଜନା ଆରମ୍ଭ କରିଛନ୍ତି । ହେଲେ ରାଜ୍ୟ ସରକାର ନିଜର ରାଜନୈତିକ ସ୍ବାର୍ଥ ହାସଲ ପାଇଁ ସରକାରୀ ଆବାସ ବଣ୍ଟନ ଦଳୀୟ କର୍ମୀ ଭିତ୍ତିରେ ହେଉଛି । ପ୍ରଧାନମନ୍ତ୍ରୀ ଆବାସ ଯୋଜନାକୁ ହାଇଜାକ କରି ବିଜୁ ପକ୍କାଘରରେ ପରିବର୍ତ୍ତନକୁ ନେଇ ମଧ୍ୟ ଦଳ ପ୍ରଶ୍ନ ଉଠାଇଛି । ଦଳ ଅଭିଯୋଗ କରିଛି ରାଜ୍ୟ ସରକାରଙ୍କ ସମସ୍ତ ଯୋଜନାରେ ବିଜୁ ଟ୍ୟାଗ ଲାଗିଛି । ସେହି ସବୁ ଯୋଜନାର ବର୍ତ୍ତମାନ ସ୍ଥିତି କଣ ବୋଲି ବିଜେପି ପ୍ରଶ୍ନ ଉଠାଇଛି ? ଦଳ ତଥ୍ୟଦେଇ ଅଭିଯୋଗ କରିଛି 2016ରେ 10 ଲକ୍ଷ ବିଜୁ ପକ୍କାଘର କରିଛୁ ବୋଲି କହିଥିଲେ ମୁଖ୍ୟମନ୍ତ୍ରୀ । କିନ୍ତୁ ବିଧାନସଭାରେ ଦର୍ଶାଇଥିଲେ 57538 ବିଜୁପକ୍କା ଘର ହୋଇଛି।
ପକ୍କା ଘର ପାଇବାକୁ ଥିବା ରାଜ୍ୟ ସରକାର ବର୍ତ୍ତମାନ ପର୍ଯ୍ୟନ୍ତ ଯୋଗ୍ୟ ହିତାଧିକାରୀ ତାଲିକା ପ୍ରକାଶ କରିପାରିଲେ ନାହିଁ । ଅନ୍ୟ ରାଜ୍ୟରେ ସେଠାକାର ସରକାର କାର୍ଯ୍ୟାଦେଶ ଦେଲେଣି । ରାଜ୍ୟ ପ୍ରକାଶ କରିଥିବା ତାଲିକାରେ କଟକର 87671 ହିତାଧିକାରୀଙ୍କୁ ଚୟନ କରିଥିଲେ । ଏବେ ଏହା କମି 34000 ପହଁଚିଛି । ସାରା ରାଜ୍ୟରେ 60 ପ୍ରତିଶତ ଅଯୋଗ୍ୟଙ୍କୁ ଯୋଡିଥିଲେ ସରକାର। ବିଜେପି ଦାବି କରିଛି ସରକାର ଯୋଗ୍ୟ ହିତାଧିକାରୀଙ୍କ ତାଳିକା ଜାନୁୟାରୀ 15 ସୁଦ୍ଧା ପ୍ରକାଶ କରିବେ କିନ୍ତୁ ଫେବୃୟାରୀ 15 ହେବାକୁ ବସିଲାଣି । ଏହାସହ ପଞ୍ଚାୟତ ଅଫିସରେ ମଧ୍ୟ ତାଳିକା ଲାଗିବ ବୋଲି କହିଥିଲେ , ସେଥିରେ ମଧ୍ୟ ଫେଲ ମାରିଛନ୍ତି । ରାଜ୍ୟ ସରକାର ଜବାବ ଦିଅନ୍ତୁ କେବେ ଯୋଗ୍ୟ ହିତାଧିକାରୀ ତାଲିକା ପ୍ରକାଶ କରିବେ ।
ବିଜେପି ଅଭିଯୋଗର ଜବାବ ରଖିଛନ୍ତି ବିଜେଡି ମୁଖପାତ୍ର ତଥା ବିଧାୟକ ପ୍ରତାପ ଦେବ । ସେ କହିଛନ୍ତି ପାଞ୍ଚ ବର୍ଷ ହେବ ବିଜେପି ନେତା ଏଭଳି କହୁଛନ୍ତି। ୨୦୧୯ ନିର୍ବାଚନରେ ଲୋକେ ଯେଉଁ ବାର୍ତ୍ତା ଦେଇଛନ୍ତି ସେଥିରୁ ବିଜେପି ବୁଦ୍ଧି ଶିଖିନାହିଁ । ବିଜେପି ପାଲଟା ଆକ୍ରମଣ କରି କହିଛନ୍ତି ରାଜ୍ୟ ବିଜେପି କେନ୍ଦ୍ରର ଯେଉଁ ଡିଣ୍ଡିମ ପିଟୁଛି ସେମାନେ ଜାଣିବା ଦରକାର ଆବାସ ଯୋଜନାରେ କେନ୍ଦ୍ରର କେତେ ଅର୍ଥ ଏବଂ ରାଜ୍ୟର କେତେ ଅର୍ଥ । କେନ୍ଦ୍ରୀୟ ଯୋଜନା ପୂର୍ବରୁ 90:10 ଥିଲା ତାକୁ କାଟି 60:40 କରିଛନ୍ତି। ଅନ୍ୟାନ୍ୟ ଆନୁଷଙ୍ଗିକ ହିସାବ କଲେ ରାଜ୍ୟର ଭାଗ ପୁରା 50 ପ୍ରତିଶତ ହେଉଛି । ଏଥିରେ ରାଜ୍ୟ ବିଜେପି ବିତର୍କ କରୁ ବୋଲି ସେ ଆହ୍ବାନ କରିଛନ୍ତି । ହିତାଧିକାରୀ ଚୟନରେ ଅନିୟମିତତା ୨୦ ବର୍ଷ ହେବ ଶୁଣୁଛୁ। ବିଜେପି ପ୍ରବକ୍ତା ମାନେ ତଥ୍ୟହୀନ ମନ୍ତବ୍ୟ ଦେଉଛନ୍ତି। ଯଦି ଅନିୟମିତତା ହୋଇଛି ବିଜେପି ୨୦୧୪ରେ ଏହାକୁ କେମିତି ପ୍ରସଙ୍ଗ କରିଥିଲା। କିନ୍ତୁ କ୍ଷମତାକୁ ଆସିବା ପରେ ଯେଉଁ ତାଲିକାକୁ ବିରୋଧ କରୁଥିଲେ ସେହି ତାଲିକାକୁ ଅନୁମୋଦନ ଦେଲେ କେମିତି ?
ସୂଚନାଯୋଗ୍ୟଯେ ଶନିବାର ବିଭାଗୀୟ ମନ୍ତ୍ରୀ ପ୍ରତାପ ଜେନା ଆସନ୍ତା 3 ବର୍ଷ ମଧ୍ୟରେ ରାଜ୍ୟରେ କୌଣସି କଚ୍ଚା ଘର ରହିବ ନାହିଁ ବୋଲି କହିଥିଲେ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
