ଭୁବନେଶ୍ବର: ମହାପ୍ରଭୁ ଶ୍ରୀଜଗନ୍ନାଥ ହେଉଛନ୍ତି କୋଟି କୋଟି ହିନ୍ଦୁଙ୍କ ଆରଧ୍ୟ ଦେବତା । ଶ୍ରୀକ୍ଷେତ୍ର ହେଉଛି ଚାରିଧାମରୁ ଏକ ଧାମ । ସାରା ବିଶ୍ବରେ ରହୁଥିବା କୋଟି କୋଟି ଜଗନ୍ନାଥ ପ୍ରେମୀଙ୍କ ବିଶ୍ବାସର ପ୍ରାଣକେନ୍ଦ୍ର ହେଉଛି ଦାରୁବ୍ରହ୍ମଙ୍କ ବଡଦାଣ୍ଡ । ସେ ବିଶ୍ବର ନାଥ ଜଗନ୍ନାଥ । ଯେଉଁଥିପାଇଁ ମହାବାହୁ ବର୍ଷକୁ ଥରେ ଓହ୍ଲାଇ ଆସନ୍ତି ବଡ ଦାଣ୍ଡକୁ । ହେଲେ ଏବେ ସେହି ବଡ ଦାଣ୍ଡ ହୋଇପଡିଛି ଅପବିତ୍ର । ବଡଦାଣ୍ଡର ବିଭିନ୍ନ ସ୍ଥାନରେ ବିକ୍ରି ହେଉଛି ଆମିଷ, ମଦ ଯାହା ସମଗ୍ର ହିନ୍ଦୁ ସମାଜକୁ ଆଘାତ ଦେଉଛି । ଏହାକୁ ନେଇ ଉଦବେଗ ପ୍ରକାଶ କରିଛନ୍ତି ବିରୋଧୀ ଦଳ ନେତା ।
ଏପ୍ରସଙ୍ଗରେ ବିରୋଧୀ ଦଳନେତା ପ୍ରଦୀପ୍ତ ନାୟକ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖି ଉଦବେଗ ଜଣାଇବା ସହ ବଡଦାଣ୍ଡକୁ ଆମିଷ ମୁକ୍ତ କରିବାକୁ ଦାବି କରିଛନ୍ତି । ବିରୋଧୀ ଦଳନେତା ନିଜ ଚିଠିରେ ଦର୍ଶାଇଛନ୍ତି ବଦଦାଣ୍ଡରେ ଥିବା ଅନେକ ହୋଟେଲ ଓ ରେଷ୍ଟୁରାଣ୍ଟରେ ମଦ, ଆମିଷ ବିକ୍ରି କରାଯାଉଛି । ବିଳମ୍ବିତ ରାତ୍ରିରେ ଏପରିକି ଦିନବେଳା ମଧ୍ୟ ମଦ ପିଇ ବଡଦାଣ୍ଡରେ ବିଶୃଙ୍ଖଳା କରାଯାଉଛି ।
ଏହିସବୁ ହେବା ଦ୍ବାରା ବାହାରୁ ଆସୁଥିବା ପର୍ଯ୍ୟଟକମାନଙ୍କ ମନରେ ଓଡିଶା ପ୍ରତି ଏକ ନକରାତ୍ମକ ଭାବନା ଆସୁଛି । ଏହାକୁ ତୁରନ୍ତ ବନ୍ଦ କରିବା ଦରକାର । ନକରାତ୍ମକ ଭାବନା ଆସୁଛି । ଏହାକୁ ତୁରନ୍ତ ବନ୍ଦ କରିବା ଦରକାର । ଆଗରୁ ଅନେକ ସାଧୁସନ୍ଥ ମଧ୍ୟ ଏହି ଦାବି କରିଛନ୍ତି । ରାଜ୍ୟ ସରକାର ଶ୍ରୀ ଜଗନ୍ନାଥ ମନ୍ଦିର ଚାରିପଟକୁ ସୁନ୍ଦର ଓ ସୁରକ୍ଷିତ କରିବା ପାଇଁ ଅନେକ ପଦକ୍ଷେପ ନେଉଛନ୍ତି ଯାହା ସ୍ବାଗତଯୋଗ୍ୟ । ଏହା ସହିତ ବଡଦାଣ୍ଡକୁ ମଦମୁକ୍ତ ଓ ଆମିଷମୁକ୍ତ କରିବାର ବି ଆବଶ୍ୟକତା ଅଛି ବୋଲି ପ୍ରଦୀପ୍ତ କହିଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
