ଭୁବନେଶ୍ବର: ସାଧାରଣତନ୍ତ୍ର ଦିବସ ପାଇଁ ରାଜଧାନୀରେ ଚାଲିଛି ପରେଡ଼ ପ୍ରସ୍ତୁତି । ଏଥର ଦିଲ୍ଲୀ ଢାଞ୍ଚାରେ ହେବ ଫାଇଲ ମାର୍ଚ୍ଚ ପାରେଡ଼ । ଏନେଇ ସୂଚନା ଦେଇଛନ୍ତି ପୋଲିସ କମିଶନର । 50 ପ୍ଲାଟୁନ ଟ୍ରୁପ, 6ଟି ସାଂସ୍କୃତିକ ଦଳ, 3ଟି ଯାନ ଓ 2ଟି ଡେୟାର ଡେଭିଲ ଦଳ ଏହି ପରେଡରେ ଭାଗ ନେବେ ।
ଭୁବନେଶ୍ବର ମହାତ୍ମା ଗାନ୍ଧୀ ମାର୍ଗରେ ପାଳିତ ହେବ ସାଧାରଣତନ୍ତ୍ର ଦିବସ ଉତ୍ସବ। ଏନେଇ ସ୍ବତନ୍ତ୍ର ସୁରକ୍ଷା ବ୍ୟବସ୍ଥା ହୋଇଛି । ଏଥର ମୁଖ୍ୟମନ୍ତ୍ରୀ ପରେଡ଼କୁ ଅଧିକ ସୁବ୍ୟବସ୍ଥିତ ଏବଂ ସୁନ୍ଦର କରିବାକୁ ଇଚ୍ଛା ପ୍ରକାଶ କରିଛନ୍ତି। ପ୍ରଥମକରି ଏଥର କଲମ ମାର୍ଚ୍ଚ ପାଷ୍ଟ କରାଯିବ ବୋଲି ପୋଲିସ କମିଶନର ସୁଧାଂଶୁ ଷଡଙ୍ଗୀ କହିଛନ୍ତି। ଜନସାଧାରଣଙ୍କ ଗମନାଗମନ ସୁବିଧା ପାଇଁ ସ୍ବତନ୍ତ୍ର ଟ୍ରାଫିକ ବ୍ୟବସ୍ଥା କରାଯାଉଛି। ଏନେଇ ନିର୍ଦ୍ଦେଶନାମା ଜାରି କରାଯାଇଛି।
ଗାଡି ମୋଟର ଚଳାଚଳ ଶୃଙ୍ଖଳିତ ହେବ ବୋଲି ଟ୍ରାଫିକ ଡିସିପି ସାଗରିକା ନାଥ କହିଛନ୍ତି। ଏଥର ରାଜ୍ୟବାସୀ ସାଧାରଣତନ୍ତ୍ର ଦିବସରେ ଆଦିବାସୀ ନୃତ୍ୟର ଝଲକ ଦେଖିବେ। ଗଞ୍ଜାମର ଯୋଡି ଶଙ୍ଖ ନୃତ୍ୟ ମନ ମୋହିବ । ଦେଶାତ୍ମବୋଧକ ସଂଗୀତରେ ଘରୋଇ ସ୍କୁଲର ଛାତ୍ରଛାତ୍ରୀ ମାନେ ଆକର୍ଷଣୀୟ ଏବଂ ମନମୁଗ୍ଧକର ନୃତ୍ୟ ପରିବେଷଣ କରିବାର କାର୍ଯ୍ୟକ୍ରମ ରହିଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
