ଭୁବନେଶ୍ବର: ଓଟିଡିସି ପକ୍ଷରୁ ଲୋକଙ୍କୁ ବିଦେଶ ଭ୍ରମଣର ସୁବିଧା ଦେବାକୁ ଆରମ୍ଭ କରାଯାଇଛି ନୂଆ ପ୍ୟାକେଜ । ଯାହାର ନାମ ରଖାଯାଇଛି ‘ଗୋ ଗ୍ଲୋବାଲ’ । ଏହା ମାଧ୍ୟମରେ ପର୍ଯ୍ୟଟକଙ୍କୁ ଥାଇଲାଣ୍ଡ, ମାଲେସିଆ, ସିଙ୍ଗାପୁର, ଇଣ୍ଡୋନେସିଆ ଓ ଦୁବାଇ ଭଳି 5ଟି ଦେଶ ଭ୍ରମଣର ସୁବିଧା ମିଳିପାରିବ ବୋଲି ଓଟିଡିସି ପକ୍ଷରୁ କୁହାଯାଇଛି । ଯେଉଁଥିପାଇଁ ଓଟିଡିସି ଯାତ୍ରୀମାନଙ୍କ ବିମାନ ଟିକେଟ ସହ ଭିଜା, 3 ଷ୍ଟାର ହୋଟେଲରେ ରହଣୀ, ଟ୍ରାଭେଲ ବୀମା, ଜଳଖିଆ ଓ ରାତ୍ରି ଭୋଜନ ସହିତ ନିର୍ଦିଷ୍ଟ ପର୍ଯ୍ୟଟନ କ୍ଷେତ୍ର ପରିଦର୍ଶନ ପାଇଁ ଟିକେଟ ବ୍ୟବସ୍ଥା ମଧ୍ୟ କରାଯିବ ।
ଆଜି ସ୍ଥାନୀୟ ପାନ୍ଥନିବାସ ସମ୍ମିଳନୀ କକ୍ଷରେ ଆୟୋଜିତ ସାମ୍ବାଦିକ ସମ୍ମିଳନୀରେ ଓଟିଡିସି ଅଧକ୍ଷା ଶ୍ରୀମୟୀ ମିଶ୍ର ସୂଚନା ଦେବା ସହିତ ରାଜ୍ୟସରକାର ଲୋକଙ୍କ ମନରେ ବିଦେଶ ଭ୍ରମଣ ପାଇଁ ଥିବା ଆଗ୍ରହକୁ ଫଳବତୀ କରିଛନ୍ତି ବୋଲି କହିଛନ୍ତି । ଏହି ଅବସରରେ ଓଟିଡିସି ଏମଡି ହେମକାନ୍ତ ସାଏ ବିଭିନ୍ନ ଟୁରର ଅବଧି ଓ ଧାର୍ଯ୍ୟ ଫି ବିଷୟରେ ଅବଗତ କରାଇଥିଲେ । ତେବେ ଏହି ପ୍ୟାକେଜ ଆଜି ଠାରୁ ଲୋକମାନେ ଉପଲବ୍ଧ କରି ପାରିବେ ବୋଲି ମଧ୍ୟ ସେ ପ୍ରକାଶ କରିଛନ୍ତି । ଯାହାକି ବର୍ଷ ତମାମ ଜାରି ରହିବ । ତେବେ ଏହା ବ୍ୟତୀତ ୟୁରୋପ ଦେଶ ଭ୍ରମଣ ପାଇଁ ଓଟିଡିସି ପକ୍ଷରୁ ବର୍ଷକୁ ଥରୁଟିଏ ଥିବା ଟୁର ଗୋଟିଏ ଦିନ ପାଇଁ ଥିଲାବେଳେ ଏହା କେବଳ ମେ 27 ରୁ ବାହାରିଥାଏ ବୋଲି ଜଣାପଡିଛି ।
ତେବେ ଆଜି ଘୋଷଣା ହୋଇଥିବା ପ୍ୟାକେଜ ଅନୁସାରେ ଥାଇଲାଣ୍ଡ ଟୁର 3 ରାତି 4 ଦିନ ପାଇଁ ହୋଇଥିବାବେଳେ ଏହା ପାଇଁ ଜଣକୁ 24 ହଜାର 9ଶହ 90 ଟଙ୍କା ଅତି କମରେ ଦେବାକୁ ହେବ । ସେହିପରି ମାଲେସିଆ 3ରାତି 4 ଦିନ ପାଇଁ 29 ହଜାର 9ଶହ 90ଟଙ୍କା, ସିଙ୍ଗାପୁର 3ରାତି 4 ଦିନ ପାଇଁ 39 ହଜାର 9ଶହ 90ଟଙ୍କା, ଇଣ୍ଡୋନେସିଆ(ବାଲି) 4ରାତି 5ଦିନ ପାଇଁ 34 ହଜାର 9ଶହ 90 ଟଙ୍କା ଏବଂ ଦୁବାଇ 4ରାତି 5 ଦିନ ପାଇଁ 53 ହଜାର 9ଶହ 90 ଟଙ୍କା ଜଣ ପିଛା ଖର୍ଚ୍ଚ କରିବାକୁ ହେବ ବୋଲି ସେ କହିଛନ୍ତି। ଏଥିରେ ଅନ୍ୟ ସମସ୍ତ ସୁବିଧା ଅନ୍ତର୍ଭୁକ୍ତ ଥିବାବେଳେ ମଧ୍ୟାହ୍ନ ଭୋଜନ ଓ ଏଥିରେ ନଥିବା ଅନ୍ୟ ସ୍ଥାନ ଭ୍ରମଣ ପାଇଁ ଗାଇଡ଼ ଖର୍ଚ୍ଚ ଏବଂ ନିଜର ଅନ୍ୟାନ୍ୟ ଖର୍ଚ୍ଚ ଯାତ୍ରୀମାନେ ବହନ କରିବେ ବୋଲି ଜଣାପଡିଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
