ଭୁବନେଶ୍ବର: ଓଡ଼ିଶା ମାଇନିଂ କର୍ପୋରେସନ-ଓଏମ୍ସିକୁ ମିଳିଛି ଅନ୍ତର୍ଜାତୀୟ ସମ୍ମାନ । ‘ବେଷ୍ଟ ଇନ ମ୍ୟାନେଜିଂ ହେଲ୍ଥ ଆଟ୍ ୱାର୍କ’ ପୁରସ୍କାର ପାଇଛି ଓଏମସି । ୧୯ତମ ଏସିଆନ୍ ଲିଡରସିପ୍ ଆଓ୍ବାର୍ଡ ପ୍ରଦାନ କାର୍ଯ୍ୟକ୍ରମରେ ଓଏମ୍ସି ଏହି ପୁରସ୍କାର ପାଇଛି । ସ୍ବାସ୍ଥ୍ୟସେବା କ୍ଷେତ୍ରରେ ସୁରକ୍ଷିତ ଓ ସଚେତନତାମୂଳକ କାର୍ଯ୍ୟକ୍ରମକୁ ପ୍ରୋତ୍ସାହନ ଦେଉଛି ଓଏମ୍ସି । ଓଏମସି ପକ୍ଷରୁ ବିଭିନ୍ନ ଖଣି ଅଞ୍ଚଳରେ କୋଭିଡ଼ ନିରାକରଣ ଲାଗି ବିଭିନ୍ନ କାର୍ଯ୍ୟକ୍ରମ ହାତକୁ ନେଇଛି । ଏହା ପୂର୍ବରୁ ରାଜ୍ୟ ସରକାରଙ୍କ ସହଯୋଗରେ ବିଭିନ୍ନ ଜିଲ୍ଲାରେ କୋଭିଡ଼ ହସ୍ପିଟାଲ ଖୋଲିଛି ।
ଏହା ସହ ଖଣିରେ କାର୍ଯ୍ୟ କରୁଥିବା କର୍ମଚାରୀ, ତାଙ୍କ ସମ୍ପର୍କୀୟ ଏବଂ ଖଣି ପାରିପାର୍ଶ୍ବିକ ଅଞ୍ଚଳର ଲୋକମାନଙ୍କ ପାଇଁ କୋଭିଡ ଟିକାକରଣ କାର୍ଯ୍ୟକ୍ରମ ଆରମ୍ଭ କରିଛି ଓଏମସି । ଏକ ଦାୟିତ୍ୱବାନ ଉଦ୍ୟୋଗ ଭାବେ କର୍ମସ୍ଥଳୀ ତଥା ପାରିପାର୍ଶ୍ବିକ ଅଞ୍ଚଳକୁ କୋଭିଡମୁକ୍ତ କରିବା ପାଇଁ ଓଏମସି ସର୍ବଦା ଚେଷ୍ଟିତ ବୋଲି କହିଛି । ଏହି ପୁରସ୍କାର ଆଗକୁ ପ୍ରେରଣା ଯୋଗାଇବ ବୋଲି ଓଏମସି ପକ୍ଷରୁ କୁହାଯାଇଛି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
