ଭୁବନେଶ୍ବର: ରାଜ୍ୟରେ ଅସୁରକ୍ଷିତ ମହିଳା । ଘରୁ ବାହାରିଲେ ପାଦେ ପାଦେ ରହିଛି ବିପଦ । ମହିଳାଙ୍କ ଉପରେ ଅପରାଧ ମାମଲାରେ ସାରା ଦେଶରେ ଓଡିଶା ରହିଛି ତୃତୀୟ ସ୍ଥାନରେ । ପ୍ରଥମେ ଆସାମ ଦ୍ବିତୀୟରେ ତେଲେଙ୍ଗାନା ପରେ ଓଡିଶା ତୃତୀୟ ସ୍ଥାନରେ ରହିଛି ।
ରାଜ୍ୟରେ ୨୦୧୫ ମସିହାରେ ୧୭,୨୦୦ ଜଣ, ୨୦୧୬ରେ ୧୭୮୩୭ଜଣ, ୨୦୧୭ରେ ୨୦୦୯୮ଜଣ କ୍ଷେତ୍ରରେ ଅପରାଧ ଘଟିଛି । ଯାହାକି ଦେଶର ଅପରାଧ ତୁଳନାରେ ୫.୬ ପ୍ରତିଶତ ରହିଛି । ସେହିପରି ଦୁଷ୍କର୍ମ ଶିକାର କ୍ଷେତ୍ରରେ ସାରା ଦେଶରେ 5ମ ସ୍ଥାନରେ ରହିଛି ଓଡିଶା ।
ଦୁଷ୍କର୍ମ ମାମଲାରେ ୨୦୧୬ରେ କ୍ରାଇମ ରେଟ୍ ୯.୫ ପ୍ରତିଶତ ଥିବା ବେଳେ ୨୦୧୭ରେ ତାହା ୯.୭ ପ୍ରତିଶତ ଥିଲା । ମୋଟ ୨୦୭୦ଟି ଦୁଷ୍କର୍ମ ମାମଲା ହୋଇଛି । ଯେଉଁଥିରେ 2016ରେ ୭୮୫ ଓ 2017ରେ ୧୨୮୫ଜଣଙ୍କୁ ଦୁଷ୍କର୍ମ ହୋଇଛି । ଯେଉଁ ମାନଙ୍କ ମଧ୍ୟରେ ୬୨.୭ ପ୍ରତିଶତ ଯୁବତୀ ୧୮ରୁ ବର୍ଷରୁ କମ୍ରୁ ଅଟନ୍ତି ।
ଆଶ୍ଚର୍ଯ୍ୟର ବିଷୟ ଯୌତୁକ ଜନିତ ନିର୍ଯାତନା କ୍ଷେତ୍ରରେ ଓଡିଶା ଦେଶର ଷଷ୍ଠ ସ୍ଥାନରେ ରହିଛି । ଯେଉଁଥିରୁ ୨୫୨୬ ପ୍ରତିଶତ ମହିଳା ସ୍ବାମୀ ଓ ପରିବାରର ନିର୍ଯାତନାର ଶିକାର ହେଉଛନ୍ତି । ସେହିପରି ୨୦୧୭ରେ ୨୭୭୩ଜଣ ମହିଳା ଅପହରଣ ହୋଇଛନ୍ତି । ଅପହରଣ କ୍ଷେତ୍ରରେ ମଧ୍ୟ ରାଜ୍ୟ ଷଷ୍ଠ ସ୍ଥାନରେ ରହିଛି । ଅର୍ଥାତ୍ ପ୍ରତି ଲକ୍ଷେ ମହିଳାଙ୍କ ମଧ୍ୟରୁ 13 ଜଣଙ୍କୁ ଅପହରଣ କରାଯାଉଛି । ନ୍ୟାସନାଲ କ୍ରାଇମ ରେକର୍ଡ ବ୍ୟୁରୋର ୨୦୧୭ ଅପରାଧର ତାଲିକା ଏହି ତଥ୍ୟ କହୁଛି ।
ତୁରନ୍ତ ଅଭିଯୋଗର ଶୁଣାଣି କରି ଶିଘ୍ର ଦଣ୍ଡ ବିଧାନ କଲେ ଅପରାଧିଙ୍କ ମଧ୍ୟରେ ଭୟ ରହିବ । ଆଉ ପୋଲିସର ମ୍ୟାନ ପାୱାର ବଢିବା ଦ୍ବାରା ମହିଳା ଅପରାଧ ଉପରେ ରୋକ୍ ଲଗାଯାଇ ପାରନ୍ତା ବୋଲି ପୂର୍ବତନ ଡିଜି କହିଛନ୍ତି । ସେହିପରି ରାଜ୍ୟ ଗୃହମନ୍ତ୍ରୀ କହିଛନ୍ତି, ଓଡିଶା ଶାନ୍ତି ପ୍ରିୟ ରାଜ୍ୟ । ମହିଳାଙ୍କ କ୍ଷେତ୍ରରେ ହେଉଥିବା ଅପରାଧ ରୋକିବାକୁ ସ୍ବତନ୍ତ୍ର ପଦକ୍ଷେପ ନେଉଛି ଓଡିଶା ପୋଲିସ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
