ଭୁବନେଶ୍ବର: ଦେଶରେ ତଥା ରାଜ୍ୟରେ କୋରୋନା କଟକଣା ଯୋଗୁଁ ସର୍ବସାଧାରଣ ଏକତ୍ରିତ ହେଉଥିବା ସ୍ଥାନ ଓ ଧାର୍ମିକ ଅନୁଷ୍ଠାନ ମାନ ବନ୍ଦ ରଖିବାକୁ ନିର୍ଦେଶ ଥିଲେ । ଇତି ମଧ୍ୟରେ କେନ୍ଦ୍ର ସରକାର କଟକଣା ମଧ୍ୟରେ ମନ୍ଦିର ଓ ଅନ୍ୟ ଧାର୍ମିକ ଅନୁଷ୍ଠାନ ଖୋଲିବାକୁ ନିର୍ଦେଶ ଦେଇଥିବା ବେଳେ ଏପର୍ଯ୍ୟନ୍ତ ଓଡ଼ିଶାରେ ତାହା କାର୍ଯ୍ୟକାରୀ କରାଯାଇନାହିଁ । ଦୀର୍ଘ 4 ମାସ ରୁ ଉର୍ଦ୍ଧ୍ବ ସମୟ ଧରି ମନ୍ଦିର ମାନ ବନ୍ଦ ରହିବାରୁ ମନ୍ଦିରରେ ପୂଜା କାର୍ଯ୍ୟ ଆଦି କରି ନିଜର ଜୀବନ ଜୀବିକା ନିର୍ବାହ କରୁଥିବା ସେବାୟତମାନେ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି ।
ମନ୍ଦିରକୁ ଶ୍ରଦ୍ଧାଳୁମାନଙ୍କ ଆସିବା ବନ୍ଦ ଥିବାରୁ ସେମାନଙ୍କ ଉପାର୍ଜନର ପନ୍ଥା ମଧ୍ୟ ବନ୍ଦ ହୋଇ ଯାଇଛି । ତେଣୁ ସେମାନେ ବର୍ତ୍ତମାନ ବହୁ ଦୟନୀୟ ଅବସ୍ଥାରେ ଜୀବନ ଯାପନ କରୁଥିବାବେଳେ ସରକାର ଯଥାଶୀଘ୍ର ହାଇକୋର୍ଟଙ୍କ ଗାଇଡ଼ଲାଇନ ଅନୁଯାୟୀ ମନ୍ଦିର ଖୋଲିବାକୁ ଓଡିଶା ମନ୍ଦିର ସେବାୟତ ସଙ୍ଘ ପକ୍ଷରୁ ଦାବି କରାଯାଇଛି । ବୁଧବାର ଏନେଇ ଏକ ସ୍ମାରକପତ୍ର ଦେବୋତ୍ତର କମିଶନଙ୍କ ନିକଟରେ ଦାଖଲ କରିବା ସହ ଯଦି ମନ୍ଦିର ନ ଖୋଲାଯିବ ତେବେ ରାଜ୍ୟରେ ଥିବା ମନ୍ଦିରମାନଙ୍କରେ କାର୍ଯ୍ୟରତ ସେବାୟତମାନଙ୍କୁ ମାସିକ 15 ହଜାର ଟଙ୍କା ଦେବାକୁ ସଂଘ ପକ୍ଷରୁ ଦାବି କରାଯାଇଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
