ଭୁବନେଶ୍ବର: ରାଜ୍ୟରେ ଆଇନ ଶୃଙ୍ଖଳା ବ୍ୟବସ୍ଥା ଠିକ୍ ରହିଛି । ଏଭଳି ଡିଣ୍ଡିମ ପିଟୁଥିବା ରାଜ୍ୟ ସରକାରଙ୍କ ମୁଖା ଖୋଲିଛି ସଦ୍ୟ ପ୍ରକାଶିତ ନ୍ୟାସନାଲ୍ କ୍ରାଇମ ରେକର୍ଡ ବ୍ୟୁରୋ (ଏନସିଆରବି) ପକ୍ଷରୁ ପ୍ରକାଶିତ ରିପୋର୍ଟ । ସମଗ୍ର ଦେଶରେ ଗୁଣି ଗାରେଡି ଜନିତ ହତ୍ୟାକାଣ୍ଡରେ ଓଡିଶା, ସମଗ୍ର ଦେଶର ତୃତୀୟ ସ୍ଥାନରେ ରହିଛି।
ଗତ ସୋମବାର ଏନସିଆରବି ରିପୋର୍ଟ-2017 ପ୍ରକାଶ ଏନେଇ ତଥ୍ୟ ପ୍ରକାଶ ପାଇଛି । ପ୍ରକାଶିତ ରିପୋର୍ଟରୁ ଏହା ଜଣାପଡିଛି ଯେ, ଗୁଣି ଗାରେଡି ଜନିତ ହତ୍ୟାକାଣ୍ଡ ଝାଡଖଣ୍ଡ ପ୍ରଥମ, ମଧ୍ୟପ୍ରଦେଶ ଦ୍ବିତୀୟ ଏବଂ ଓଡ଼ିଶାର ସ୍ଥାନ ତୃତୀୟ ଥିବା ଉଲ୍ଲେଖ ରହିଛି। ଗୁଣି ଗାରେଡି ସନ୍ଦେହରେ ଝାଡଖଣ୍ଡରେ 19ଜଣଙ୍କୁ ହତ୍ୟା କରାଯାଇଥିବାବେଳେ ମଧ୍ୟପ୍ରଦେଶରେ 13 ଏବଂ ଓଡିଶାରେ 9 ଜଣଙ୍କୁ ହତ୍ୟା କରାଯାଇଛି।
ଏନସିଆରବି ପକ୍ଷରୁ ପ୍ରକାଶିତ ରିପୋର୍ଟ ଉପରେ ପ୍ରତିକ୍ରିୟା ରଖିଛନ୍ତି ପୂର୍ବତନ ପୋଲିସ ଡିଜି । ଗୁଣି ଗାରେଡି ନିରୋଧ ଆଇନ (ୱିଚ୍ ପ୍ରୋଭିସନ ଆକ୍ଟ) ଲାଗୁ ହେବା ସତ୍ତ୍ବେ ସଚେତନତା ଓ ବୈଜ୍ଞାନିକ ଚିନ୍ତାଧାରା ଅଭାବରୁ ରାଜ୍ୟରେ ଏଭଳି ଅଘଟଣ ଘଟୁଛି। ଏପରି ସ୍ଥିତିରେ ତୃଣମୂଳସ୍ତରକୁ ଯାଇ ଲୋକଙ୍କୁ ସଚେତନ କରାଗଲେ ଏ ସମସ୍ୟା ଦୂର ହୋଇପାରିବ।
ଅପରପକ୍ଷରେ ଏହା ଉପରେ ମତ ରଖି ହେତୁବାଦୀ ପ୍ରଫୁଲ୍ଲ ରଥ କହିଛନ୍ତି ଯେ, ଲୋକଙ୍କ ମନରେ ଅନ୍ଧ ବିଶ୍ବାସ ଏବଂ ସଚେତନତା ଅଭାବର ଫାଇଦା ଉଠାଉଛନ୍ତି ଖଳ ପ୍ରବୃତ୍ତିର ଲୋକ । ଅର୍ଥାତ ବର୍ତ୍ତମାନର ଡିଜିଟାଲ ଯୁଗରେ ମଧ୍ୟ ଲୋକଙ୍କର ଗୁଣି ଗାରେଡି ଉପରେ ବିଶ୍ବାସ ରହିଛି । ଆଉ ଯେଉଁଠି ଲୋକେ ଥରେ ଏହା ଉପରେ ବିଶ୍ବାସ କରିଯାଏ, ସେଠି ଏହି ବିଶ୍ବାସ ଜାରି ରହିଥାଏ । ହେଲେ ଯେଉଁମାନଙ୍କ ପାଖରେ ଗୁଣି ଗାରେଡିର ଜ୍ଞାନ ନଥାଇ ନିଜକୁ ପ୍ରମାଣିତ କରିବାକୁ ଚେଷ୍ଟା କରନ୍ତି ସେମାନେ ହିଁ ଏଭଳି ଅମାନବୀୟ ହତ୍ୟାକାଣ୍ଡ ଘଟାଉଛନ୍ତି।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
