ଭୁବନେଶ୍ବର: ପ୍ରଧାନମନ୍ତ୍ରୀ ଫସଲ ବୀମା ଯୋଜନା ପ୍ରସଙ୍ଗକୁ ନେଇ ଆଜି(ଶୁକ୍ରବାର) ସାମ୍ବାଦିକ ସମ୍ମିଳନୀ କରିଛି ବିଜେପି । ଏହି ଯୋଜନାରେ ବିଜେଡ଼ି ଆଣିଥିବା ଅଭିଯୋଗର କୌଣସି ବାସ୍ତବତା ନାହିଁ ବୋଲି କହିଛି ବିଜେପି । କେଵଳ ଲୋକଙ୍କ ମଧ୍ୟରେ ଭ୍ରମ ସୃଷ୍ଟି କରିବାକୁ ବିଜେଡି଼ ସବୁବେଳେ ଉଦ୍ୟମ କରୁଛି । ଲୋକଙ୍କୁ ଭୂଆଁ ବୁଲାଇବା ସହିତ କେନ୍ଦ୍ରକୁ ଟାର୍ଗେଟ କରିବା ବିଜେଡି଼ର ମୁଖ୍ୟ ଲକ୍ଷ୍ୟ ବୋଲି ବିଜେପିର ଲୋଇସିଙ୍ଘା ବିଧାୟକ ମୁକେଶ ମହାଲିଙ୍ଗ କହିଛନ୍ତି ।
ବିଜେଡି ଅଭିଯୋଗ କରିଛି ଯେ, ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ଓଡ଼ିଆ ଚାଷୀ କ୍ଷତିଗ୍ରସ୍ତ । ବାସ୍ତବତା କିନ୍ତୁ ଅଲଗା । ଗତ ୨୦୧୬ ଜାନୁଆରୀ ୧୩ ତାରିଖରେ ଆରମ୍ଭ ହୋଇଥିଲା ଏହି ଯୋଜନା । ଏହାଦ୍ବାରା ଦେଶରେ ୨୩ କୋଟିରୁ ଊର୍ଦ୍ଧ୍ବ ଚାଷୀ ଲାଭବାନ ହୋଇଛନ୍ତି । ଚାଷୀ ଖରିଫ ଋତୁରେ ୨ ପ୍ରତିଶତ, ରବି ୠତୁରେ ୧.୫ ପ୍ରତିଶତ ଓ ଉଦ୍ୟାନ କୃଷିରେ ୫ ପ୍ରତିଶତ ପ୍ରିମିୟମ ଦେଇ ସୁବିଧା ପାଉଛନ୍ତି ।
ଓଡ଼ିଶାରେ ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ପ୍ରାୟ ୧.୭ କୋଟି ଚାଷୀ ୬୦ ହେକ୍ଟର ଚାଷ ପାଇଁ ୩୫,୫୨୬ କୋଟିର ବୀମା କରିଛନ୍ତି । ଓଡ଼ିଶାର ଚାଷୀଙ୍କ ଦ୍ବାରା ଏହି ଯୋଜନାରେ ୭୦୨ କୋଟି ବୀମା ଦେଇଛନ୍ତି । ଏହାଦ୍ବାରା ୨୭.୮୮ ଲକ୍ଷ ଚାଷୀ ଉପକୃତ ହୋଇଛନ୍ତି । ସେମାନଙ୍କୁ ମୋଟ ୪୦ ହଜାର ୬୦୦ କୋଟି ଅର୍ଥ ଏ ବାବଦରେ ମିଳିଛି । ତେଣୁ ବିଜେଡି ଅଭିଯୋଗ ତଥ୍ୟ ଆଧାରିତ ନୁହେଁ ବୋଲି କହିଛନ୍ତି ମହାଲିଙ୍ଗ ।
ବୀମା କମ୍ପାନୀ ଚୟନ ପ୍ରକ୍ରିୟା ବିଡିଂ ମାଧ୍ୟମରେ ଓଡି଼ଶା ସରକାର ହିଁ କରିଥାନ୍ତି । ଏଥିରେ ରାଜ୍ୟ ସରକାରଙ୍କ ୩ଟି ବିଭାଗ ଅନ୍ତର୍ଭୁକ୍ତ ହୋଇଥାନ୍ତି । ବିଜେଡି ବୀମା କମ୍ପାନୀକୁ ନିଯୁକ୍ତି କରୁଛନ୍ତି ଓ ଚାଷୀଙ୍କୁ ଭୂଆଁ ବୁଲାଇବାକୁ ଚେଷ୍ଟା କରୁଛି ବୋଲି ସେ ଅଭିଯୋଗ ଆଣିଛନ୍ତି । ଏହାସହିତ ଚାଷୀଙ୍କ ପ୍ରକୃତ ବନ୍ଧୁ ବିଜେପି ବୋଲି ସେ କହିଛନ୍ତି ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ
