ଭୁବନେଶ୍ବର: ଆସନ୍ତା ଜୁଲାଇ 29ରେ ଓଡିଶା ଆସିବେ ନେପାଳର ପୂର୍ବତନ ପ୍ରଧାନମନ୍ତ୍ରୀ । ଶନିବାର ନେପାଳର ପୂର୍ବତନ ପ୍ରଧାନମନ୍ତ୍ରୀ ଲୋକେନ୍ଦ୍ର ବାହାଦୂର ଚାନ୍ଦ ତିନିଦିନିଆ ଓଡିଶା ଗସ୍ତ ଆସିବା ନେଇ ଓଡିଶା ଇଣ୍ଟରନ୍ୟାସନାଲ ସେଣ୍ଟର ପକ୍ଷରୁ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି ।
ଆସନ୍ତା 29 ତାରିଖ ଅପରାହ୍ନ 11ଟା ସମୟରେ ଶ୍ରୀ ଚାନ୍ଦଙ୍କ ସମେତ ତାଙ୍କ ପୁତ୍ର ଓ 7ଜଣିଆ ସଦସ୍ୟ ଏହି ଗସ୍ତରେ ଭୁବନେଶ୍ବର ବିମାନବନ୍ଦରରେ ପହଞ୍ଚିବେ । ସେଠାରୁ ତାଙ୍କୁ ସ୍ବାଗତ କରାଯିବା ପରେ ସେମାନଙ୍କୁ ଭୁବନେଶ୍ୱର ଥିବା ମେଫେୟାର ହୋଟେଲରେ ଅବସ୍ଥାନ କରିବେ ବୋଲି ସୂଚନା ଦିଆଯାଇଛି । ଏହାପରେ ସେ ତାଙ୍କ ଗୁରୁ ସନ୍ଥ ସ୍ବାମୀ ଦିବ୍ୟାନନ୍ଦ ଗିରି ମହାରାଜଙ୍କୁ ଅପରାହ୍ନରେ ଭେଟିବା ପାଇଁ ଯିବେ । ତା ପରଦିନ ସକାଳୁ ଅର୍ଥାତ 30 ତାରିଖ ଦିନ ଭୁବନେଶ୍ବର ଉପକଣ୍ଠରେ ଥିବା ହୀରାପୁରସ୍ଥିତ ଚୌଷଠି ଯୋଗିନୀ ମନ୍ଦିରରେ ଦର୍ଶନ କରିବା ସହିତ ସେଠାରେ ପୂଜାପାଠ କଟିବେ ବୋଲି ସୂଚନା ମିଳିଛି ।
ଏହାପରେ ସେଠାରୁ କାର୍ଯ୍ୟ ଶେଷ କରି କୋଣାର୍କ ମନ୍ଦିର ଦର୍ଶନ କରିବେ ଏବଂ ପୁରୀରେ ରାତ୍ରିଯାପନ କରିବେ । ଏହାପରେ 31 ତାରିଖ ଦିନ ସକାଳୁ ମହାପ୍ରଭୁ ଜଗନ୍ନାଥଙ୍କ ଦର୍ଶନ କରିବା ପରେ ପୁରୀରେ ବିଶିଷ୍ଟ ସାଧୁସନ୍ଥଙ୍କ ସହିତ ସାକ୍ଷାତ କରିବାର କାର୍ଯ୍ୟକ୍ରମ ରହିଛି । ତେବେ ନେପାଳର ପୂର୍ବ ପ୍ରଧାନମନ୍ତ୍ରୀ ଶ୍ରୀ ଚାନ୍ଦଙ୍କ ଏହା ପ୍ରଥମ ଓଡିଶା ଗସ୍ତ ଅଟେ ।
ଶ୍ରୀ ଚାନ୍ଦଙ୍କ ଏହି ଗସ୍ତର ଆୟୋଜନ ଦାୟିତ୍ବରେ ଥିବା ଓଡିଶା ଇଣ୍ଟର ନ୍ୟାସନାଲ ସେଣ୍ଟରର ସଭାପତି ପରେଶ ନାୟକ, ଉପସଭାପତି ଏସକେ ତାମୋଟିଆ ଓ ଶିଳ୍ପପତି ଉଦୟନାଥ ସାହୁ ପ୍ରମୁଖ ଏହି ସାମ୍ବାଦିକ ସମ୍ମିଳନୀରେ ଉପସ୍ଥିତ ରହି ତାଙ୍କର କାର୍ଯ୍ୟକ୍ରମ ସମ୍ପର୍କରେ ସୂଚନା ପ୍ରଦାନ କରିଛନ୍ତି ।
ଭୁବନେଶ୍ୱରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
