ଭୁବନେଶ୍ବର: ବଢୁଛି ଆତ୍ମହତ୍ୟା ! ମାନସିକ ଚାପ ନେଉଛି ଯୁବପୀଢିଙ୍କ ଜୀବନ । ଚାପଗ୍ରସ୍ତ ହୋଇ ନେଉଛନ୍ତି ଚରମ ନିଷ୍ପତ୍ତି । ଏଭଳି ଚମକାଇ ଦେଲା ଭଳି ତଥ୍ୟ ପ୍ରକାଶ ପାଇଛି ନ୍ୟାସନାଲ୍ କ୍ରାଇମ ରେକର୍ଡ ବ୍ୟୁରୋ (ଏନସିଆରବି) ରିପୋର୍ଟରେ । ତଥ୍ୟ କହୁଛି 2017 ଅପେକ୍ଷା 2018ରେ 3.6 ପ୍ରତିଶତ ବୃଦ୍ଧି ପାଇଛି ଆତ୍ମହତ୍ୟା । ସୁଇସାଇଡ କରିଛନ୍ତି 1,34,516 ଜଣ ।
ଏମାନଙ୍କ ମଧ୍ୟରେ ପ୍ରାୟ ସମସ୍ତେ 18ରୁ 30 ବର୍ଷର ଯୁବପୀଢି । ତେବେ ପ୍ରେମ ସମ୍ପର୍କ ପାଇଁ 3503 ଜଣ, ବେକାରୀ ସମସ୍ୟା ପାଇଁ 1420, ବିବାହ ପାଇଁ 4442, ପରୀକ୍ଷାରେ ଖରାପ ପାଇଁ 1034 ଓ ପାରିବାରିକ ସମସ୍ୟା ଲାଗି 14396 ଜଣ ଜୀବନ ହାରିଛନ୍ତି ।
ସେହିପରି ଚାଷ ସହ ଜଡିତ 10349 ଜଣ ବ୍ୟକ୍ତି ଆତ୍ମହତ୍ୟା କରିଥିବାବେଳେ ସେମାନଙ୍କ ମଧ୍ୟରୁ 5763 ଜଣ କୃଷକ ଓ 4586 ଜଣ ଶ୍ରମିକ ବୋଲି ଜଣାପଡିଛି । ଏମାନଙ୍କ ମଧ୍ୟରୁ 51.1 ପ୍ରତିଶତ ବେକରେ ଓଢଣି, ଲୁଗା ବା ରଶି ଲଗାଇ ଆତ୍ମହତ୍ୟା କରିଛନ୍ତି ।
ଏହାକୁ ରୋକିବାକୁ କାଉନସେଲିଂର ଆବଶ୍ୟକତା ରହିଛି । ମାନସିକ ଚାପରେ ରହୁଥିବା ଲୋକର ମନକୁ ବୁଝିବାର ଅଛି । ପରିବାର ଓ ସମ୍ପର୍କିୟ ଏଥିପ୍ରତି ଧ୍ୟାନ ଦେବା ଉଚିତ ବୋଲି ମତ ପ୍ରକାଶ ପାଇଛି ।
ସେପଟେ ଯୁବପୀଢିଙ୍କ ଆତ୍ମହତ୍ୟା କ୍ଷେତ୍ରରେ ଓଡିଶା ମଧ୍ୟ ପଛରେ ନାହିଁ । ଓଡିଶାରୁ 2018ରେ 1460 ଜଣ ଜୀବନ ହାରିଛନ୍ତି । ଯାହା ବର୍ତ୍ତମାନର ଯୁବସମାଜ ପାଇଁ ଏକ ସତର୍କ ଘଣ୍ଟି ସାଜିଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
