ଭୁବନେଶ୍ବର: ନବରାତ୍ରିରେ ପୂଜାର୍ଚ୍ଚନା ସହ ନାଚଗୀତରେ ମସଗୁଲ ରହିବ ପଲ୍ଲୀ ଠାରୁ ଦିଲ୍ଲୀ । ରାଜଧାନୀ ଭୁବନେଶ୍ବରରେ ଜମି ଆସିଲାଣି ପୂଜା ପରିବେଶ । ପୂଜା ପରିବେଶକୁ ରଙ୍ଗିନ କରିବାକୁ ବିଭିନ୍ନ ସ୍ଥାନରେ ଆୟୋଜନ ହୋଇଛି ନବରାତ୍ରିର ସ୍ବତନ୍ତ୍ର କାର୍ଯ୍ୟକ୍ରମ । ଗୁଜୁରାଟର ପାରମ୍ପରିକ ଦାଣ୍ଡିଆ ନୃତ୍ୟରେ ଦୁଲୁକିବ ରାଜଧାନୀ । ମେ' ଫେୟାର ପକ୍ଷରୁ ଗତ କିଛି ବର୍ଷ ହେଲା ‘ଦାଣ୍ଡିଆ ରାସ’ ପାଳନ କରାଯାଉଛି । ଚଳିତ ବର୍ଷ ମଧ୍ୟ ମେ ଫେୟାର ପକ୍ଷରୁ ରାଜଧାନୀରେ ‘ଦାଣ୍ଡିଆ ରାସ ୨୦୧୯ ’ ପାଳନ କରାଯିବ ।
ସେପ୍ଟେମ୍ବର ୨୯ ରୁ ଅକ୍ଟୋବର ୮ ପର୍ଯ୍ୟନ୍ତ ଚାଲିବ ଦାଣ୍ଡିଆ ରାସ । ମେ ଫେୟାରରେ ୧୦୦୦ ଲୋକ ଦାଣ୍ଡିଆ ଖେଳିବାର ବ୍ୟବସ୍ଥା କରାଯାଇଛି । ଏହାସହ ଭିଡକୁ ସୁରକ୍ଷା ଦେବା ପାଇଁ ଆବଶ୍ୟକୀୟ ସୁରକ୍ଷା ବ୍ୟବସ୍ଥା କରିଛନ୍ତି କର୍ତ୍ତୃପକ୍ଷ ।
ଏହି ଦାଣ୍ଡଆ କାର୍ଯ୍ୟକ୍ରମରେ ହିନ୍ଦୀ ଓ ଓଡ଼ିଆ କଳାକାରଙ୍କ ନାଚଗୀତରେ ଝୁମିବେ ଦର୍ଶକ । ଏହା ସହ ଛୋଟ ପିଲାଙ୍କ ପାଇଁ ବିଭିନ୍ନ ଖେଳ ଓ କାର୍ଯ୍ୟକ୍ରମ ରହିଛି । ସେଲ୍ଫି ଯୋନ, ବିଭିନ୍ନ ହାତତିଆରି ଅଳଙ୍କାର ପ୍ରଦର୍ଶନୀ କାର୍ଯ୍ୟକ୍ରମ ରହିଯାଇଛି।
ଦାଣ୍ଡିଆ ରାସରେ ଭାଗ ନେବା ପାଇଁ ପ୍ରାପ୍ତ ବୟସ୍କ ଯୁବକଯୁବତୀଙ୍କ ପାଇଁ ୧୨୦୦ ଟଙ୍କା ରଖାଯାଇଥିବା ବେଳେ ୬ ବର୍ଷ ରୁ୧୨ ବର୍ଷ ବୟସ ଭିତରେ ୬୦୦ ଟଙ୍କା ରଖାଯାଇଛି । ଏହି କାର୍ଯ୍ୟକ୍ରମ ୪ ଟାରୁ ରାତି ୭ ଟା ପର୍ଯ୍ୟନ୍ତ ବିଭିନ୍ନ ଖେଳ କାର୍ଯ୍ୟକ୍ରମ ରହିଥିବା ବେଳେ ରାତି ୭ ଟା ପରେ ଦାଣ୍ଡିଆ ରାସ ଆରମ୍ଭ ହେବବୋଲି ସୂଚନା ମିଳିଛି ।
ଏତଦବ୍ୟତୀତ ସବୁଠାରୁ ଖାସ କଥା ହେଲା ଏହି କାର୍ଯ୍ୟକ୍ରମରେ ସ୍କୁଲ ପିଲାଙ୍କ ପାଇଁ ବିଭିନ୍ନ ପ୍ରକାରର ମନୋରଞ୍ଜନ ସହ ପ୍ରତିଯୋଗିତାର ବ୍ୟବସ୍ଥା କରାଯାଇଛି । ପ୍ରତିଯୋଗିତା ମାଧ୍ୟମରେ କୃତି ପ୍ରତିଯୋଗୀଙ୍କୁ ପୁରସ୍କୃତ କରାଯିବା ବ୍ୟବସ୍ଥା ରହିଛି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
