ଭୁବନେଶ୍ବର: ଦିନକୁ ଦିନ ସାଙ୍ଘାତିକ ହେବାରେ ଲାଗୁଛି ସାଂସଦ ଅନୁଭବ ମହାନ୍ତିଙ୍କ ବିରୋଧରେ ମହିଳା ସାମ୍ବାଦିକ ଆଣିଥିବା ଦୁର୍ବ୍ୟବହାର ଅଭିଯୋଗ । ଏବେ ନ୍ୟାୟ ପାଇଁ ସାମ୍ବାଦିକା ସସ୍ମିତା ଆଚାର୍ଯ୍ୟ ଗୁରୁବାର ନବୀନ ନିବାସ ସମ୍ମୁଖରେରେ ଧାରଣା ଦେଇଛନ୍ତି । ଘଟଣାସ୍ଥଳରେ ପୋଲିସ ପହଞ୍ଚି ସସ୍ମିତାଙ୍କୁ କଟକସ୍ଥିତ ମହିଳା ଥାନାକୁ ନେଇଛନ୍ତି ।
ଏଠାରେ ସୂଚନାଯୋଗ୍ୟ ଯେ କଟକ ଝାଞ୍ଜିରୀମଙ୍ଗଳା ଅଞ୍ଚଳର ମହିଳା ସାମ୍ବାଦିକା ସସ୍ମିତା ଆଚାର୍ଯ୍ୟ ପୁରୀଘାଟ ଥାନାରେ ଅନୁଭବ ଓ ତାଙ୍କ ଭାଇଙ୍କ ନାଁରେ ଏତଲା ଦେଇଥିଲେ । ଅଭିଯୋଗକାରିଣୀ ସସ୍ମିତା ଆଚାର୍ଯ୍ୟଙ୍କ ଅଭିଯୋଗ ଅନୁଯାୟୀ, ଅନୁଭବଙ୍କ ଭାଇ ଅନୁପ୍ରାସ ତାଙ୍କୁ ଦୀର୍ଘଦିନ ଧରି କମେଣ୍ଟ ମାରିବା ସହ ହଇରାଣ କରି ଆସୁଥିଲେ ।
ଏନେଇ ଗତ ୧୨ ତାରିଖ ରାତିରେ ସେ ସାଂସଦ ଅନୁଭବଙ୍କ ଘରକୁ କଥା ନେଇ ଯାଇଥିଲେ । ହେଲେ ସେଠାରେ ସେ ନିରାଶ ହେବା ସହ ଦୁର୍ବ୍ୟବହାରର ଶିକାର ହୋଇଥିଲେ । ଖୋଦ୍ ସାଂସଦ ଅନୁଭବ ମଧ୍ୟ ତାଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ଛେପ ପକାଇ ଧକ୍କା ମାରିଥିବା ସସ୍ମିତା ଅଭିଯୋଗ କରିଛନ୍ତି ।
ଏହାପରେ ସାଂସଦ ଅନୁଭବ ମଧ୍ୟ ପାଲଟା ଏତଲା ଦେଇଥିଲେ । ଏବେ ଏହି ଘଟଣାରେ ପୋଲିସ ହାତବାନ୍ଧି ବସିଛି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
