ଭୁବନେଶ୍ବର: ବର୍ଷ ବର୍ଷ ଧରି ଫ୍ୟାଶନ ଡିଜାଇନିଂ ଓ ଇଣ୍ଟରିୟର ଡିଜାଇନିଂ ଶିକ୍ଷା ଗ୍ରହଣ କରିଥିବା ଜେଡି ଇନଷ୍ଟିଚ୍ୟୁଟର ଛାତ୍ରଛାତ୍ରୀ ସେମାନଙ୍କ ଡ଼ିଜାଇନିଂ ଜ୍ଞାନକୁ ଲୋକଙ୍କ ସମ୍ମୁଖରେ ପ୍ରଦର୍ଶନ କରିଛନ୍ତି । ଯେଉଁଥିରେ ଛାତ୍ରଛାତ୍ରୀଙ୍କୁ ବେଶ ସାବାସୀ ମିଳିଛି । ଛାତ୍ରଛାତ୍ରୀଙ୍କ ଦ୍ବାରା ଡିଜାଇନ ହୋଇଥିବା ଗାର୍ମେଣ୍ଟକୁ 12ଟି ସିକ୍ୟୁଏନ୍ସ ମାଧ୍ୟମରେ ମଡେଲମାନେ ପ୍ରଦର୍ଶିତ କରିଥିଲେ ।
ଫ୍ୟାସନ ଏପରି ଏକ ବିଷୟ ଯାହା ସମସ୍ତଙ୍କୁ ଆକୃଷ୍ଟ କରିଥାଏ । ଯାହା ମାଧ୍ୟମରେ ଦୈନନ୍ଦିନ ଜୀବନରେ ସାଧାରଣ ମଣିଷ ନିଜକୁ ଅନ୍ୟ ସମ୍ମୁଖରେ ପ୍ରଦର୍ଶିତ କରିବା ସହିତ ପ୍ରଶଂସା ଶୁଣିବାକୁ ଚେଷ୍ଟା କରିଥାଏ । ଦୀର୍ଘ 5 ବର୍ଷ ଧରି ଓଡ଼ିଶାରେ ଫ୍ୟାସନ ଶିକ୍ଷା କ୍ଷେତ୍ରରେ ପ୍ରବେଶ କରିଥିବା ଜେଡି ଅନୁଷ୍ଠାନ ଆଗାମୀ ଦିନରେ ଗ୍ଲୋବାଲ ସିଟିଜେନ ଅଧିକ ମାତ୍ରାରେ ତିଆରି କରିବା ଲକ୍ଷ୍ୟ ରଖିଥିବା କହିଛନ୍ତି ଏହାର କାର୍ଯ୍ୟନିର୍ବାହୀ ନିର୍ଦ୍ଦେଶକ ରୂପଲ ଦଲାଲ । ଏହି ଲକ୍ଷ ନେଇ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଅନୁଷ୍ଠାନ ପକ୍ଷରୁ ସ୍ଥାନୀୟ ଏକ ହୋଟେଲରେ ବାର୍ଷିକ ଡିଜାଇନ ପୁରସ୍କାର ଓ ଫ୍ୟାଶନ ଶୋ ଅନୁଷ୍ଠିତ ହୋଇଥିଲା ।
ଚଳିତ ବର୍ଷର ଥିମ ସ୍ବିଚକୁ ନେଇ ଅନୁଷ୍ଠିତ ଏହି ଶୋରେ 125 ପ୍ରକାର କଲେକ୍ସନ ପ୍ରଦର୍ଶିତ ହୋଇଥିଲା । ଯାହାକୁ ସ୍ଥାନୀୟ ମଡେଲଙ୍କ ସହିତ ଆନ୍ତର୍ଜାତିକ ଖ୍ୟାତିସମ୍ପନ୍ନ କ୍ରୋଏସିଆର ନାମୀ ମଡେଲ ଡାରିଆ ଫାକର୍ସ ପରିଧାନ କରି ରାମ୍ପରେ ଚାଲିଥିଲେ । ଏହା ସହିତ ପ୍ରତିବର୍ଷ ଭଳି ସାମାଜିକ ଓ ଫ୍ୟାଶନ କ୍ଷେତ୍ରରେ ଅବହେଳିତ ହେଉଥିବା ଭିନ୍ନକ୍ଷମ ଶିଶୁଙ୍କୁ ରାମ୍ପରେ ଚଲାଇ ନୂତନ ବାର୍ତ୍ତା ଦେବାକୁ ଚେଷ୍ଟା କରିଥିଲେ । ଆଜିର ଏହି ଉତ୍ସବକୁ କାର୍ଯ୍ୟବାହୀ ନିର୍ଦ୍ଦେଶିକା ରୂପଲ ଦଲାଲ, ଭୁବନେଶ୍ବର ସେଣ୍ଟରର ନିର୍ଦ୍ଦେଶିକ ବିଶାଲ ସୁବୁଦ୍ଧି, ଶିବଦତ୍ତ ସୁବୁଦ୍ଧି ଏବଂ ସୁପର ମଡେଲ ଡାରିଆ ଉଦଘାଟନ କରିଥିଲେ ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
