ଭୁବନେଶ୍ବର: ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି, କ୍ରୀଡ଼ା ଓ ଯୁବସେବା ମନ୍ତ୍ରୀ ତୁଷାରକାନ୍ତି ବେହେରା ଆଜି ଅଚାନକ ଓକାକ୍ ଟାୱାର ପରିଦର୍ଶନ କରି ବିଭିନ୍ନ ଭିତ୍ତିଭୂମି ଏବଂ ସରକାରୀ କାର୍ଯ୍ୟର ତଦାରଖ କରିଛନ୍ତି । ଏହି ଗସ୍ତ ସମୟରେ ଇନ୍କୁ୍ୟବେସନ୍ ସେଣ୍ଟର ପରିଦର୍ଶନ କରି ଷ୍ଟାର୍ଟ ଅପ୍ ଓଡ଼ିଶା ଜରିଆରେ ସେଠାରେ ପ୍ରତିଷ୍ଠା କରିଥିବା କମ୍ପାନୀ ଅଧିକାରୀମାନଙ୍କ ସହ ଆଲୋଚନା କରିଥିଲେ ।
ନୂଆ କରି ଆସିବାକୁ ଥିବା କମ୍ପାନୀ ଗୁଡ଼ିକ ପାଇଁ ଆବଶ୍ୟକ ସ୍ଥାନ ମଧ୍ୟ ମନ୍ତ୍ରୀ ବୁଲି ଦେଖିଥିଲେ । ଏଥିସହ ମନ୍ତ୍ରୀ ମୋ ସରକାର କଲ୍ସେଣ୍ଟର ବୁଲି ଦେଖିବା ସହ ମୁଖ୍ୟମନ୍ତ୍ରୀଙ୍କ ଦ୍ବାରା ଆରମ୍ଭ ହୋଇଥିବା ‘ମୋ ସରକାର’ କାର୍ଯ୍ୟକ୍ରମର ସଫଳ ରୂପାୟନ ଓ ଏହାର ପରିଚାଳନା ନେଇ ସନ୍ତୋଷ ପ୍ରକାଶ କରିଥିଲେ ।
ଏହି କାର୍ଯ୍ୟକ୍ରମକୁ ଅଧିକ ବ୍ୟାପକ, ଲୋକାଭିମୁଖୀ ଏବଂ ସୁଦୃଢ଼ କରିବା ଦିଗରେ ଆବଶ୍ୟକ ସମସ୍ତ ଭିତ୍ତିଭୂମି ବିଭାଗ ପକ୍ଷରୁ ଯୋଗାଇ ଦିଆଯିବ ବୋଲି ମନ୍ତ୍ରୀ ପ୍ରକାଶ କରିଥିଲେ । ଜଣେ ଉତ୍ତମ ନାଗରିକ ଭାବେ ସରକାରୀ କାର୍ଯ୍ୟାଳୟରେ ଏସି, ବିଜୁଳି ଏବଂ ବ୍ୟବହାର ଯୋଗ୍ୟ ଜଳର ସଠିକ୍ ବିନିଯୋଗ ଉପରେ କର୍ମଚାରୀଙ୍କୁ ମନ୍ତ୍ରୀ ପରାମର୍ଶ ଦେଇଥିଲେ ।
ମନ୍ତ୍ରୀ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ବିଭାଗ ସଚିବ ମନୋଜ କୁମାର ମିଶ୍ର ଏବଂ ଓକାକ୍ର ଜେନେରାଲ୍ ମ୍ୟାନେଜର ମଧୁମିତା ରଥଙ୍କ ସହ ଓକାକ୍ର କାର୍ଯ୍ୟାବଳୀ ଓ ସମସ୍ୟା ଉପରେ ଆଲୋଚନା କରିଥିଲେ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
