ଭୁବନେଶ୍ବର: ଚିନ୍ତନ ଶିବିର ଶେଷ ହେବା ପରେ ଓଡିଶା ପିସିସିର ହେବ ନବକଳେବର । ଜନତାଙ୍କ ପାଖରେ କଂଗ୍ରେସର ନୂଆ ରୂପରେଖ ସାମ୍ନାକୁ ଆସିବ । ସଂଗଠନରେ ହେବ ଆମୂଳଚୁଳ ପରିବର୍ତ୍ତନ । ଯୁବକ ମାନଙ୍କୁ ଅଗ୍ରାଧିକାର ଦେବା ସହ ଦଳ ପାଇଁ ଦୀର୍ଘସୂତ୍ରୀ କାର୍ଯ୍ୟ ହାତକୁ ନିଆଯିବ। ଗୋଟିଏ ପରିବାରରୁ ଗୋଟିଏ ଟିକେଟ ମିଳିବା ବିଷୟ ମଧ୍ୟ ଏକ ନୂଆ ସମ୍ଭାବନା ସୃଷ୍ଟି କରିପାରେ ବୋଲି କହିଛନ୍ତି କଂଗ୍ରେସ ବିଧାୟକ ସୁର ରାଉତ ରାୟ ।
ଗୋଟିଏ ପରିବାରରେ ଜଣଙ୍କୁ ମିଳିବ ଦଳୀୟ ଟିକେଟ । 5 ବର୍ଷରୁ ଅଧିକ ସମୟ କୌଣସି ନେତା କୌଣସି ପଦପଦବୀରେ ରହିପାରିବେ ନାହିଁ । ଯୁବକ ମାନଙ୍କୁ ଆଗକୁ ନିଆଯିବ। 50 ବୟସ ଭିତର ନେତାଙ୍କ ପାଇଁ ସଂରକ୍ଷିତ ରହିବ 50 ପ୍ରତିଶତ ଆସନ। କଂଗ୍ରେସଙ୍କୁ ଜନତାଙ୍କ ପାଖରେ ପହଞ୍ଚାଇବା ପାଇଁ କଂଗ୍ରେସ ଏଭଳି ବ୍ଲୁ ପ୍ରିଣ୍ଟ ପ୍ରସ୍ତୁତ କରିଥିବା ନେଇ ଚର୍ଚ୍ଚା ହେଉଛି । ରାଜସ୍ଥାନର ଉଦୟପୁରରେ ଆୟୋଜିତ ହୋଇଥିବା ଚିନ୍ତନ ଶିବିର ଆଜି ଶେଷ ହେଉଥିବାବେଳେ ଶିବିରରେ ଏଭଳି ଆଲୋଚନା ହୋଇଥିବା ଚର୍ଚ୍ଚା ହେଉଛି ।