ଭୁବନେଶ୍ବର: ଆଧୁନିକ ଯୁଗରେ ପରିବେଶ ପ୍ରଦୂଷଣ ଏକ ମୁଖ୍ୟ ଓ ବଡ଼ ସମସ୍ୟା ଭାବେ ଉଭା ହୋଇଛି । ଓଡିଶାକୁ ପ୍ଲାଷ୍ଟିକ ମୁକ୍ତ ରାଜ୍ୟ କରି ଗଢିବାକୁ ଆହ୍ବାନ ଦେଇ ସ୍ଥାନୀୟ ସୂଚନା ଭବନ ଠାରେ ଆୟୋଜିତ ରାଜ୍ୟ ପ୍ରଦୂଷଣ ବୋର୍ଡର 36 ତମ ସ୍ଥାପନା ଦିବସ ପାଳନ ଅବସରରେ ରାଜ୍ୟ ଜଙ୍ଗଲ ଓ ପରିବେଶ ବିଭାଗମନ୍ତ୍ରୀ ବିକ୍ରମ କେଶରୀ ଆରୁଖ କହିଛନ୍ତି ।
ପରିବେଶ ପ୍ରଦୂଷଣ ନେଇ ଅନେକାଂଶରେ ଆମେମାନେ ଦାୟୀ ହୋଇଥିବାବେଳେ ଏହାର ନିରାକରଣ ଦିଗରେ ଜନସାଧାରଣଙ୍କ ସହଯୋଗ ଏକାନ୍ତ ଆବଶ୍ୟକ ବୋଲି ଆରୁଖ କହିଛନ୍ତି । ସରକାରଙ୍କ ପକ୍ଷରୁ ପ୍ଲାଷ୍ଟିକ ପ୍ରଦୂଷଣକୁ ହ୍ରାସ କରିବା ଲକ୍ଷ୍ୟରେ ଗତବର୍ଷ 6ଟି ସହରରେ ପ୍ଲାଷ୍ଟିକ ବ୍ୟବହାର ଉପରେ ରୋକ ଲଗାଯାଇଛି ।
ତେବେ ମୁଖ୍ୟମନ୍ତ୍ରୀଙ୍କ ନିର୍ଦେଶ ଅନୁସାରେ, ଆସନ୍ତା ଗାନ୍ଧୀ ଜୟନ୍ତୀ ଠାରୁ ସାରା ରାଜ୍ୟରେ ସିଙ୍ଗଲ ବ୍ୟବହୃତ ପ୍ଲାଷ୍ଟିକ ବ୍ୟବହାର ବ୍ୟାନ କରିବାକୁ ନିର୍ଦ୍ଦେଶ ଦିଆଯାଇଛି । ସେହିପରି ଅନ୍ୟ ଉପାୟରେ ହେଉଥିବା ପ୍ରଦୂଷଣ ମାତ୍ରାକୁ ରୋକିବାକୁ ସରକାରଙ୍କ ପକ୍ଷରୁ ଆକ୍ସନ ପ୍ଲାନ ପ୍ରସ୍ତୁତ କରାଯାଉଥିବା ମନ୍ତ୍ରୀ ଶ୍ରୀ ଆରୁଖ ପ୍ରକାଶ କରିଛନ୍ତି ।
ଏହି ଉତ୍ସବରେ ବୋର୍ଡ ପକ୍ଷରୁ ପ୍ରକାଶ ପାଉଥିବା ପରିବେଶ ସମାଚାର ପତ୍ରିକା ଉନ୍ମୋଚନ କରାଯାଇଥିବା ବେଳେ ପ୍ରଦୂଷଣ ନିୟନ୍ତ୍ରଣ କ୍ଷେତ୍ରରେ ଉଲ୍ଲେଖନୀୟ ଭୂମିକା ଗ୍ରହଣ କରିଥିବା କେତେକ ଅନୁଷ୍ଠାନକୁ ଏହି ଅବସରରେ ସମ୍ମାନିତ କରାଯାଇଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
