ଭୁବନେଶ୍ବର: ସୀମାରେ ଜୋରଦାର୍ ଚାଲିଛି ମାଓ ଅପରେସନ୍ ଏବଂ ମାଓ ମୁକାବିଲା ନେଇ ପ୍ରସ୍ତୁତି । ଗୁଇନ୍ଦା ବିଭାଗର ଆଲର୍ଟ ପରେ ଘନ ଘନ ମାଓ ଇଲାକା ଗସ୍ତ କରୁଛନ୍ତି ପୋଲିସ ଡିଜି ଅଭୟ । ପ୍ରସ୍ତୁତ ହେଉଛି ବ୍ଲୁପ୍ରିଣ୍ଟ, ଲଞ୍ଚ ହେଉଛି ସ୍ପେଶାଲ ମିଶନ । ଝାଡଖଣ୍ଡର ପୂର୍ବ ସିଂହଭୂମ, ପଶ୍ଚିମ ସିଂହଭୂମ ଏବଂ ଚାଇବସାର ଲାଞ୍ଜି ପାହାଡରେ ମାଓବାଦୀ ହମଲା ପରେ ଏବେ ଆର୍ଲଟରେ ଓଡିଶା ପୋଲିସ । ରାଜ୍ୟରେ ମାଓ ସଙ୍ଗଠନ ଦୁର୍ବଳ ହୋଇଥିଲେ ମଧ୍ୟ ଚିନ୍ତା ବଢାଇଛନ୍ତି ପଡୋଶୀ ମାଓ କ୍ୟାଡର । ଚାଇବସାର ଲାଞ୍ଜି ପାହାଡ ଓ ସରେଇକେଲାରେ ୩୦୦ ମାଓବାଦୀଙ୍କ ଏକାଠି ପରେ ଓଡିଶା ଆଡକୁ ମୁହାଇଁପାରନ୍ତି ପଡୋଶୀ ମାଓବାଦୀ । ଏଥିପାଇଁ ସୀମାନ୍ତରେ ୨ ଟପ ମାଓ ଲିଡର, ଅସୀମ ମଣ୍ଡଳ ଓରଫ ଆକାଶ ଏବଂ ସଚ୍ଚିନଙ୍କ ଉପରେ ନଜର ରଖିଛି ରାଜ୍ୟ ଗୁଇନ୍ଦା ବିଭାଗ ।
ଓଡିଶାରେ ଦୁର୍ବଳ, ପଡୋଶୀ ସୀମାରେ ସକ୍ରିୟ ମାଓବାଦୀ ତେବେ କୋରୋନା ପାଇଁ ଦୁର୍ବଳ ହୋଇପଡିଥିବା ମାଓ ସଙ୍ଗଠନ ଏବେ ଅସ୍ତିତ୍ବ ଜାହିର ପାଇଁ କିଛି ବି ଘଟଣା ଘଟାଇ ପାରନ୍ତି । ଯାହାର ପୂର୍ବ ସୂଚନା ମାର୍ଚ୍ଚ ୨ ଲାଞ୍ଜି ପାହାଡରେ ୩ ଝାଡଖଣ୍ଡ ଯବାନଙ୍କ ଶହୀଦ ଘଟଣାରୁ ଅନୁମାନ କରାଯାଉଛି । ଏହାକୁ ନେଇ ଓଡିଶା ପୋଲିସ ଆଗୁଆ ସତର୍କତା ଜାରି କରିଛି । ପୋଲିସ ଡିଜିଙ୍କ ମାରାଥନ ମାଓ ଇଲାକା ଗସ୍ତ ପରେ ଦୁର୍ବଳ ହେଉଛି ଓଡିଶା ମାଓ ସଙ୍ଗଠନ । କାରଣ ଗତ ୧୮ ରେ ୩ ମାଓବାଦୀ ଆତ୍ମସମର୍ପଣ କରିଛନ୍ତି । ଏହାସାଙ୍ଗକୁ ମାଓ ସଙ୍ଗଠନର ଗୁମର ମଧ୍ୟ ଖୋଲିଛି । ଆତ୍ମସମର୍ପଣ କରିଥିବା ମହିଳା ACF କ୍ୟାଡର ଆଧୁନିକ ଅସ୍ତ୍ରଶସ୍ତ୍ର ଟ୍ରେନିଂ ନେଇଥିବା ଜଣାପଡିଛି । ଏହାର ଅର୍ଥ ମାଓବାଦୀ ବ୍ୟବହାର କରୁଛନ୍ତି LMG, AK-47, ଇନସାସ୍, ରାଇଫଲ, ଷ୍ଟେନ୍ ଗନ୍, କାର୍ବାଇନ, ୯ MM ପିସ୍ତଲ ଏବଂ SLR ଭଳି ଅତ୍ୟାଧୁନିକ ବନ୍ଧୁକ ଓ ବିସ୍ଫୋରକ । ତେବେ ନଜର ପକାନ୍ତୁ 5 ବର୍ଷର ସେହି ତାଲିକା.. ଯାହା ଦେଖିଲେ ଅନୁମାନ କରିହୁଏ, ଯେ ପ୍ରକୃତପକ୍ଷେ ଦୁର୍ବଳ ହେଉଛି ମାଓ ସଙ୍ଗଠନ । ମହିଳା ମାଓବାଦୀଙ୍କ ଆତ୍ମସମର୍ପଣ ପରେ ଅଧିକ ଖୁସି ଜାହିର କରିଛନ୍ତି ପୋଲିସ ଡିଜି । ଓଡିଶା ସରକାରଙ୍କ ଉଦାରତା କାରଣରୁ ଏସବୁ ସମ୍ଭବପର ହୋଇପାରିଛି । ଭାରତୀୟ ଗଣତନ୍ତ୍ରର ମଧ୍ୟ ଉଦାର ଧାରା ରହିଛି । ହିଂସା ଛାଡି ମୁଖ୍ୟସ୍ରୋତରେ ସାମିଲ ହୋଇ ସରକାରଙ୍କ ପ୍ୟାକେଜରୁ ଲାଭ ଉଠାଇବା ପାଇଁ ଆହ୍ବାନ ଦେଇଛନ୍ତି ପୋଲିସ ଡିଜି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ 
