ଭୁବନେଶ୍ବର: ମନୀଷ ମୃତ୍ୟୁ ରହସ୍ୟ ମାମଲାରୁ ପରଦା ହଟାଇଛି ପୋଲିସ । ଭୁବନେଶ୍ଵର ଡିସିପି କହିଛନ୍ତି ମନୀଷଙ୍କୁ ଅପହରଣ ପରେ ହତ୍ୟା କରାଯାଇଥିବା ବେଳେ ଘଟଣାରେ ୩ ଅଭିଯୁକ୍ତଙ୍କୁ ଗିରଫ କରାଯାଇଛି । ଏମାନେ ମନୀଷଙ୍କର ସାଙ୍ଗ ଅମ୍ରିତ ପ୍ରିତମ ବିଶ୍ବାଳ, ମୃତ୍ୟଞ୍ଜୟ ମିଶ୍ର ଓ ଦିନେଶ ବେହେରା ବୋଲି ଡିସିପି ସ୍ପଷ୍ଟ କରିଛନ୍ତି । ସେମାନଙ୍କୁ ଅପହରଣ, ହତ୍ୟା ଓ ପରେ ପ୍ରମାଣ ଲୁଚାଇବା ସଙ୍ଗୀନ ମାମଲାରେ ଗିରଫ କରିଛି ପୋଲିସ ।
ମନୀଷଙ୍କ ଏହି ୩ଜଣ ସାଙ୍ଗଙ୍କୁ ଆଇପିସି ଧାରା 364a, 264, 201, 302 ଓ 34ରେ ଗିରଫ କରିଛି ପୋଲିସ । ଅଧିକ ତଥ୍ୟ ପାଇଁ ଅଭିଯୁକ୍ତଙ୍କୁ ରିମାଣ୍ଡରେ ପୋଲିସ ଆଣିବ ବୋଲି ଜଣାପଡ଼ିଛି । ସୂଚନା ମୁତାବକ ଗତ ୧୦ତାରିଖ ସନ୍ଧ୍ୟାରେ ଇନଫୋସିଟି ଥାନା ଅଞ୍ଚଳରୁ ମନୀଷ ଅମ୍ରିତ ସହ ଆସିଥିଲେ । ପରେ ଅନ୍ୟ ଦୁଇ ସାଙ୍ଗ ମୃତ୍ୟୁଞ୍ଜୟ ଓ ଦିନେଶ ସହ ଭେଟଘାଟ ପରେ ହୋଟେଲ ସାଉଥସିଟି ଯାଇଥିଲେ। ସେଠାରେ ହୋଇଥିବା ବିଲ ୭୪୦୦ଟଙ୍କା ପୈଠ ପାଇଁ ବାର କର୍ମଚାରୀ ମନୀଷଙ୍କ ମୋବାଇଲ ବନ୍ଧକ ରଖିଥିଲେ । ଏନେଇ ମନୀଷ ଘର ଲୋକଙ୍କ ପାଖରୁ ୮ହଜାର ଟଙ୍କା ମଗାଇ ପେମେଣ୍ଟ କରିଥିଲେ ।
ସେହି ଘଟଣାକୁ ନେଇ ଏଭଳି ଅସମୟରେ ସାଙ୍ଗମାନେ କିପରି ବିଲ ପୈଠ କଲେ ନାହିଁ ତାକୁ ନେଇ ୪ଜଣଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା । ପରେ ହୋଟେଲରୁ ବାହାରିବା ପରେ ବାଟରେ ଗଣ୍ଡଗୋଳ ଭୀଷଣ ରୂପ ନେଇଥିଲା । ଏପରିକି ଗାଡିରୁ ବାହାରି ଦୌଡାଦୌଡ଼ି ମଧ୍ୟ ହୋଇଥିଲେ । ଏହି ଠେଲାପେଲାରେ ମନୀଷଙ୍କ ଜୀବନ ଯାଇଥିଲା । ସନ୍ଦେହ ନ ହେବା ପାଇଁ ମନୀଷଙ୍କୁ ସାଙ୍ଗମାନେ ନେଇ ପାଖରେ ଥିବା ପୋଖରୀରେ ଫିଙ୍ଗି ଦେଇଥିଲେ । ଏପରିକି ମନିଷଙ୍କ ଆଖିରେ ଚଷମା ଓ ଚପଲ ସହ ପୁରା ଘଟଣାକୁ ଆତ୍ମହତ୍ୟାର ରୂପ ଦେବା ପାଇଁ ଅଭିଯୁକ୍ତମାନେ ଯୋଜନା କରିଥିଲେ ।
କିନ୍ତୁ ସେଠାରୁ ମନୀଷଙ୍କ ମୋବାଇଲ ନେଇଆସିଥିଲେ ଅଭିଯୁକ୍ତ । ଅର୍ଥାତ ତାଙ୍କର ମୃତ୍ୟୁକୁ ଲୁଚାଇବାକୁ ୩ ସାଙ୍ଗ ଉଦ୍ୟମ କରିଥିଲେ । ଏନେଇ ୩ ସାଙ୍ଗକୁ ଗିରଫ କରାଯାଇଛି ହେଲେ ପ୍ରକୃତ କାରଣ ସମ୍ପର୍କରେ କୌଣସି ସ୍ପଷ୍ଟ କରିନାହାନ୍ତି ଭୁବନେଶ୍ଵର ଡିସିପି । ଏହି ଘଟଣାର ପ୍ରତ୍ୟକ୍ଷଦର୍ଶୀଙ୍କ ସାକ୍ଷୀ ଆଧାରରେ ୩ ଜଣଙ୍କୁ ଗିରଫ କରାଯାଇଛି । ଅଧିକ ତଦନ୍ତ ପାଇଁ ରିମାଣ୍ଡରେ ଆଣିବାକୁ ଯୋଜନା କରିଛି ପୋଲିସ । ଏ ଯାଏଁ ମୋବାଇଲ ମିଳିନଥିବା ବେଳେ ଅପହରଣରେ ବ୍ୟବହୃତକାର ଜବତ କରାଯାଇଛି ।
ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ
