ଭୁବନେଶ୍ବର: ରାଜଧାନୀରେ ବଢୁଛି ଅପରାଧୀଙ୍କ ଉତ୍ପାତ । ଧଉଳି ଥାନାରେ ଗତ କିଛିଦିନ ପୂର୍ବରୁ ପାର୍କିଂରୁ କାର ଲୁଟ ପରେ ଏବେ ସାମ୍ନାକୁ ଆସିଛି ବାଇକ ଲୁଟର ଘଟଣା । ସହିଦନଗର ଥାନା ଅଞ୍ଚଳରୁ ଏକ ବାଇକର ହ୍ୟାଣ୍ଡେଲ ଭାଙ୍ଗି ଲୁଟ କରିଛନ୍ତି ଦୁର୍ବୃତ୍ତ । ଯାହାର ଦୃଶ୍ୟ କଏଦ ହୋଇଛି ସେଠାରେ ଲାଗିଥିବା ସିସିଟିଭି ଫୁଟେଜରେ ।
ସହିଦନଗର ପ୍ଲଟ ନମ୍ବର ୬୫୭ରେ ସ୍ବରୂପ ନିବାସରେ ରହୁଥିବା ଜୀବନଦୀପ ସ୍ବାଇଁଙ୍କ ଏକ ପଲସର ଗାଡି OD22 B 0690ର ହ୍ୟାଣ୍ଡେଲକୁ ପ୍ରଥମେ ଅତି ସହଜରେ ଭାଙ୍ଗିଥିଲେ ଦୁର୍ବୃତ୍ତ । ଏହା ପରେ କିଛି ସମୟ ଲୁଚିଯାଇ ପରେ ଗାଡି ନେଇ ଚମ୍ପଟ ମାରିଥିଲେ । ଏସମସ୍ତ ଦୃଶ୍ୟ ସିସିଟିଭରେ ରେକର୍ଡ ହୋଇଛି । ଯାହାକୁ ନେଇ ସହିଦନଗର ଥାନାରେ ଅଭିଯୋଗ ପରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ତେବେ କିଛି ଦିନ ପୂର୍ବରୁ ସମାନ ଘଟଣା ଘଟିଥିଲା । ସହିଦନଗର ଥାନା ଅଞ୍ଚଳରେ ଗୋଟିଏ ଗାଡିକୁ ଲୁଟ ପରେ ଏକ ଅଟୋ ଜରିଆରେ ଦଉଡିରେ ବାନ୍ଧି ନେଉଥିଲେ ଲୁଟେରା । ଯାହାର ଦୃଶ୍ୟ ସିସିଟିଭିରେ କଏଦ ହୋଇଥିଲା । ଏହାକୁ ନଜରରେ ରଖି ଚୋରି ହୋଇଥିବା ଗାଡିର ମାଲିକ ଗାଡି ଚୋରକୁ ଆଣି ପୋଲିସରେ ଜିମା ଦେଇଥିଲେ । ପୋଲିସ ସମ୍ପୃକ୍ତ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଥିଲା । ହେଲେ ଗାଡିକୁ ସିଜ କରିପାରିନଥିଲା କି ଅନ୍ୟ ଚୋରକୁ ଧରିପାରିନଥିଲା । ତେବେ ପୋଲିସର ଏପରି ବେପରୁଆ ତଦନ୍ତ ଓ ଅପରାଧୀଙ୍କ ଏପରି ଲୁଟପାଟ ପରେ କେବେ ମୁହଁ ଖୋଲିବେ ପୋଲିସ କମିଶନର ଏବଂ କାର୍ଯ୍ୟାନୁଷ୍ଠାନ ନେବେ ସେ ନେଇ ରାଜଧାନୀବାସୀଙ୍କ ଚିନ୍ତା ବଢିଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
