ଭୁବନେଶ୍ବର: ଗାଢକଣ କେନ୍ଦ୍ରୀୟ ବିଦ୍ୟାଳୟରେ ଛାତ୍ରୀଙ୍କ ଆତ୍ମହତ୍ୟା ଉଦ୍ୟମକୁ ନେଇ ଅଭିଭାବକ ଓ ଶିକ୍ଷୟତ୍ରୀ ମୁହାଁମୁହିଁ ହୋଇଛନ୍ତି। ଏହି ଘଟଣାରେ କିଛି ଅଭିଭାବକ ସ୍କୁଲ ଫାଟକରେ ହୋହାଲ୍ଲା କରିଛନ୍ତି । ଏହା ସହ ମାନସିକ ଅତ୍ୟାଚାର ଅଭିଯୋଗ କରି ପିଇଟି ଶିକ୍ଷୟତ୍ରୀଙ୍କୁ ଗିରଫ କରିବାକୁ ସେମାନେ ଦାବି କରିଛନ୍ତି । ଏନେଇ ଥାନାରେ ଏତଲା ଦିଆଯାଇଥିବା ବେଳେ ପୋଲିସ ଘଟଣାର ତଦନ୍ତ ଆରମ୍ଭ କରିଛି। ଏନେଇ ମଞ୍ଚେଶ୍ବର ଥାନା ପୋଲିସ ସ୍କୁଲରେ ପହଞ୍ଚି ଅଭିଭାବକ ଓ ସ୍କୁଲ କର୍ମକର୍ତ୍ତାଙ୍କୁ ପଚରାଉଚରା କରିଛି।
ମାନସିକ ଚାପରେ ଛାତ୍ର ଛାତ୍ରୀ ରହୁଥିବା ବେଳେ ସେହି ଘଟଣାକୁ ନେଇ ଆତ୍ମହତ୍ୟା ଉଦ୍ୟମ କରିଛନ୍ତି ବୋଲି ଅଭିଭାବକଙ୍କ ଅଭିଯୋଗ। ଗତ ଦଶହରାରେ ସ୍କୁଲର ୮ଜଣ ଛାତ୍ରଛାତ୍ରୀ ବୁଲାବୁଲିକୁ ନେଇ ଫଟୋ ସୋସିଆଲ ମିଡିଆରେ ଅପଲୋଡ କରିଥିଲେ। ଯାହାକୁ ନେଇ ଛାତ୍ରଛାତ୍ରୀଙ୍କର ଏପରି ଆଚରଣ ନେଇ କିଛି ତାଗିଦ କରିଥିଲେ ଶିକ୍ଷୟତ୍ରୀ। ହେଲେ ତାହା ତାଗିଦ ନୁହେଁ ବରଂ ସ୍କୁଲରେ ସଭିଙ୍କ ସାମ୍ନାରେ ବେଜିତ କଲାପରି କହିଥିବା ଅଭିଯୋଗ ଆଣିଥିଲେ ଅଭିଭାବକ। ଘଟଣାକୁ ଗୁରୁତର ସହ ନେଇ ପୋଲିସ ତଦନ୍ତ ଆରମ୍ଭ କରିଛି। ଛାତ୍ରୀ ଜଣକ ଏବେ ସୁସ୍ଥ ଥିବା ଜଣାପଡିଛି।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
