ଭୁବନେଶ୍ବର: ନେପାଳର ପ୍ରସିଦ୍ଧ ପଶୁପତିନାଥ ମନ୍ଦିରରେ ପ୍ରତିଷ୍ଠା ହେବ ଜଗନ୍ନାଥ,ବଳଭଦ୍ର,ସୁଭଦ୍ରା ଓ ପ୍ରଭୁ ସୁଦର୍ଶନଙ୍କ ଚତୁର୍ଦ୍ଧା ମୂର୍ତ୍ତି । ଏନେଇ ବୁଧବାର ପୁରୀରୁ 20 ଜଣ ସେବାୟତଙ୍କ ସମେତ ଏକ 40ରୁ ଉର୍ଦ୍ଧ୍ବ ଅଭିଯାତ୍ରୀ ଦଳ ନେପାଳ ଯିବେ।
ମଙ୍ଗଳବାର ଏନେଇ ଆୟୋଜିତ ସାମ୍ବାଦିକ ସମ୍ମିଳନୀରେ ପଶୁପତିନାଥ ମନ୍ଦିରର ବରିଷ୍ଠ ଟ୍ରଷ୍ଟି ଅର୍ଜୁନ ପ୍ରସାଦ ସୂଚନା ଦେଇଛନ୍ତି । ସେ କହିଛନ୍ତି, ଓଡିଶାର ଜଗନ୍ନାଥ ମନ୍ଦିର ସହିତ ନେପାଳର ସମ୍ପର୍କ ଅନେକ ବର୍ଷ ପୂର୍ବରୁ ରହି ଆସିଛି । ସେହି ସମ୍ପର୍କକୁ ଆହୁରି ମଜବୁତ୍ କରିବା ଲକ୍ଷ୍ୟରେ ଓଡିଶା ଓ ନେପାଳ ମଧ୍ୟରେ ମୈତ୍ରୀ ଯାତ୍ରା ଆରମ୍ଭ ହୋଇଛି । ଯାହାକି ଦୁଇ ଦେଶ ମଧ୍ୟରେ ନିଜର ସାଂସ୍କୃତିକ ସମ୍ବନ୍ଧ ଆଦାନ ପ୍ରଦାନର ଏକ ଉତ୍ତମ ପ୍ରୟାସ।
ଏହାକୁ ଆଉ ପାଦେ ଆଗକୁ ନେବାକୁ ଯାଇ ପଶୁପତିନାଥ ମନ୍ଦିର ମଧ୍ୟରେ ମହାପ୍ରଭୁ ଜଗନ୍ନାଥଙ୍କ ସମେତ ଚତୁର୍ଦ୍ଧାମୂର୍ତ୍ତୀ ସ୍ଥାପନ କରାଯିବା ପାଇଁ ନିଷ୍ପତ୍ତି ନିଆଯାଇଥିବା ସେ କହିଛନ୍ତି । ଯାହାକି ଆସନ୍ତା 7 ଓ 8ତାରିଖ ଦିନ ଏଠାରୁ ଯାଉଥିବା ସେବାୟତ ଓ ସାଧୁଙ୍କ ଦ୍ବାରା କରାଯିବ।
ଏହି ଅବସରରେ ସେଠାରେ ଏକ ଆନ୍ତର୍ଜାତିକ କର୍ମକାଣ୍ଡ ସମ୍ମିଳନୀର ଆୟୋଜନ କରାଯାଇଛି। ଯେଉଁଥିରେ ନେପାଳ, ଭାରତ, ବାଂଲାଦେଶ ସମେତ ଆମରିକାର ପୁରୋହିତ ଯୋଗଦେବାର କାର୍ଯ୍ୟକ୍ରମ ରହିଛି।
ସ୍ଥାନୀୟ ଜୟଦେବ ଭବନ ପରିସରରେ ଓଡିଶା ଇଣ୍ଟର ନ୍ୟାସନାଲ ସେଣ୍ଟର ପକ୍ଷରୁ ଆୟୋଜିତ ଏହି ସାମ୍ବାଦିକ ସମ୍ମିଳନୀରେ ଓଡିଶା ଜଗନ୍ନାଥ ମନ୍ଦିରର ସେବାୟତ ଓ ଅନ୍ୟମାନେ ଉପସ୍ଥିତ ରହି ଏହି ମୈତ୍ରୀ ଯାତ୍ରା ସମ୍ପର୍କରେ ଆଲୋକପାତ କରିଥିଲେ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
