ଭୁବନେଶ୍ବର: ଅନ୍ୟମାନଙ୍କ ପାଇଁ ଉଦାହରଣ ସାଜିଲେ ଇନ୍ସପେକ୍ଟର । ଚାରିଆଡେ ତାଙ୍କର କର୍ମକୁ ନେଇ ଚାଲିଛି ଚର୍ଚ୍ଚା । ଖୋଦ ମୁଖ୍ୟମନ୍ତ୍ରୀ ଏବେ ଇନ୍ସପେକ୍ଟରଙ୍କୁ ସାଧୁବାଦ୍ ଜଣାଇବା ସହ ତାଙ୍କ କାର୍ଯ୍ୟଦକ୍ଷତାକୁ ପ୍ରଶଂସା କରି ଟ୍ବିଟ୍ କରିଛନ୍ତି ।
ସୂଚନା ଅନୁଯାୟୀ, ଇନ୍ସପେକ୍ଟର ଅରୁଣ କୁମାର ସ୍ବାଇଁଙ୍କୁ ଶୁଭେଚ୍ଛା ଜଣାଇଛନ୍ତି ନବୀନ ପଟ୍ଟନାୟକ । ନୟାପଲ୍ଲୀ ପାସପୋର୍ଟ କାର୍ଯ୍ୟାଳୟ ସମ୍ମୁଖରେ ବୁଧବାର ଏକ ଦୋକାନ ଭଙ୍ଗାକୁ ନେଇ ଦୁଇ ଗୋଷ୍ଠୀ ମଧ୍ୟରେ ଦେଖାଦେଇଥିଲା ଉତ୍ତେଜନା ।
ଘଟଣାସ୍ଥଳରେ ଅଭୟ ନାୟକ ନାମକ ଜଣେ ବ୍ୟକ୍ତିଙ୍କୁ ଭୁଜାଲିରେ ଆକ୍ରମଣ ହୋଇଥିଲା । ଆକ୍ରମଣ କରିଥିବା ଦୁଇ ଯୁବକ ଘଟଣା ଘଟାଇ ଫେରାର ହୋଇଯାଇଥିଲେ ।
ଖବର ପାଇବା ପରେ ନୟାପଲ୍ଲୀ ପୋଲିସ ସେଥିମଧ୍ୟରୁ ଜଣଙ୍କୁ ଗିରଫ କରିଥିଲେ । ଏପଟେ ଡେରି ନକରି ଅଭୟଙ୍କୁ ଠିକ ସମୟରେ ମେଡିକାଲ ପହଞ୍ଚାଇଥିଲେ ଇନ୍ସପେକ୍ଟର ଅରୁଣ । ଠିକ ସମୟରେ ମେଡିକାଲ ପହଞ୍ଚିଥିବାରୁ ତାଙ୍କର ଜୀବନ ରକ୍ଷା ହୋଇପାରିଛି । ଏପଟେ ଏନେଇ କମିଶନରେଟ ପୋଲିସ ପକ୍ଷରୁ ଅରୁଣଙ୍କୁ ଶୁଭେଚ୍ଛାର ସୁଅ ଛୁଟୁଛି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
