ଭୁବନେଶ୍ବର: ଏସଟିଏଫ ଟିମ୍ ହାତରେ ବଡ ସଫଳତା । କନ୍ଧମାଳ ବାଲିଗୁଡା ଥାନା ଅଞ୍ଚଳରୁ ବିପୁଳ ପରିମାଣର ଗଞ୍ଜେଇ ଜବତ ସହ ଦୁଇ ଜଣ ବ୍ୟବସାୟୀଙ୍କୁ ଗିରଫ କରିଛି ଏସଟିଏଫ ଟିମ୍ । ଏହି ବ୍ୟବସାୟୀ ଦୁହେଁ ହେଲେ ବାଲିଗୁଡା ଥାନା ଡୁଗେଇପୁର ଅଞ୍ଚଳର ହେମନ୍ତ ଦିଗଲ ଓ ଭାସ୍କର ମଲ୍ଲିକ । ଉଭୟ ରାଜଧାନୀରେ ଗଞ୍ଜେଇ ସପ୍ଲାଏ କରୁଥିବା ବେଳେ ଏସଟିଏଫ ଟିମ୍ ତାଙ୍କୁ ଗିରଫ କରି ସେମାନଙ୍କଠାରୁ 1 କ୍ବିଣ୍ଟାଲ 16 କିଲୋଗ୍ରାମ ଗଞ୍ଜେଇ ଜବତ କରିଛି ।
ସୂଚନା ମୁତାବକ ଲକଡାଉନ ସମରେ ଗଞ୍ଜେଇ ଚାଲାଣ ହୋଇପାରୁନଥିବାରୁ ଗ୍ରାହକଙ୍କ ଚାହିଦା ପୂରଣ ପାଇଁ ରାଜଧାନୀମୁହାଁ ହୋଇଛନ୍ତି ଗଞ୍ଜେଇ ବେପାରୀ । ଏନେଇ କନ୍ଧମାଳରୁ ଏବେ ଅନେକ ବ୍ୟବସାୟୀ ଭୁବନେଶ୍ବରରେ ସପ୍ଲାଏ ଆରମ୍ଭ କରିଥିବା ଜଣାପଡିଛି । ଗତ ଜୁଲାଇ 3 ତାରିଖରେ ଖଣ୍ଡଗିରି ଅଞ୍ଚଳରୁ 80 କିଲେଗ୍ରାମ ଗଞ୍ଜେଇ ଓ ଏକ କାର ସହ 3 ଅଭିୟୁକ୍ତଙ୍କ ଗିରଫ ହୋଇଥିଲେ ।
ଶନିବାର ମଧ୍ୟ ଏହିପରି ଏକ ସପ୍ଲାଏ ଆସୁଥିବା ସୂଚନା ପାଇ ଏସଟିଏଫ ଟିମ କନ୍ଧମାଳରେ ଚଢାଉ ଆରମ୍ଭ କରିଥିଲା । ଫଳରେ ଭୁବନେଶ୍ବର ଆସିବା ପୂର୍ବରୁ ହିଁ ବ୍ୟବସାୟୀ ଏସଟିଏଫ ହାତରେ ଧରା ପଡିଥିଲେ । ସମ୍ପୃକ୍ତ ଘଟଣାରେ ବାଲିଗୁଡା ଥାନାରେ ଏକ ମାମଲା ରୁଜୁ କରାଯାଇ ଦୁଇ ଅଭିଯୁକ୍ତଙ୍କୁ ଏନଡିପିଏସ ଧାରା 1985 ଅନୁଯାୟୀ 20(ବି)(ii)(ସି) ଆଧାରରେ ଗିରଫ କରାଯାଇଛି । ଗିରଫ ପରେ ଉଭୟଙ୍କୁ କୋର୍ଟ ଚାଲାଣ କରାଯାଇଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
