ଭୁବନେଶ୍ବର: ଆସନ୍ତାକାଲି(ବୁଧବାର) ଶପଥଗ୍ରହଣ କରିବେ ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ । ହାଇ ସିକ୍ୟୁରିଟି ଜୋନରେ ପ୍ରଦର୍ଶନୀ ପଡିଆରେ ମୁଖ୍ଯମନ୍ତ୍ରୀ ନେବେ ଶପଥ । ୫ମ ଥର ପାଇଁ ମୁଖ୍ଯମନ୍ତ୍ରୀ ଭାବେ ଦାୟିତ୍ବ ନେବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ।
ତେବେ ମୁଖ୍ଯମନ୍ତ୍ରୀଙ୍କ ସମେତ ନୂଆ ମନ୍ତ୍ରୀମଣ୍ଡଳର ସଦସ୍ଯ ମଧ୍ଯ ଶପଥ ଗ୍ରହଣ କରିବେ । ଏଥିପାଇଁ ପ୍ରାକ ପ୍ରସ୍ତୁତି ପ୍ରଦର୍ଶନୀ ପଡିଆରେ ଆୟୋଜିତ ହୋଇଛି ଶପଥ ଗ୍ରହଣ ଉତ୍ସବ ସମାରୋହ । ଯାହାକୁ ନେଇ ଶପଥ ଗ୍ରହଣର ୨୪ ଘଣ୍ଟା ପୂର୍ବରୁ କଡାକଡି ହୋଇଛି ସୁରକ୍ଷା ବ୍ଯବସ୍ଥା।
ତେବେ ପଡିଆର ପ୍ରବେଶ ପାଇଁ ୩ଟି ଦ୍ବାର କରାଯାଇଛି । ମେଟାଲ ଡିଟେକ୍ଟର ଜରିଆରେ ତନ୍ନ ତନ୍ନ ହେଉଛି ପଡିଆ ଓ ସଭାସ୍ଥଳର ସୁରକ୍ଷା ଯାଞ୍ଚ କରାଯାଉଛି । ଏହାସହ ଡଗ ସ୍କ୍ବାଡ ଓ ବମସ୍କ୍ବାଡ ଟିମ ମଧ୍ଯ ପ୍ରଦର୍ଶନୀ ପଡିଆରେ ପ୍ରସ୍ତୁତ ରହିଛନ୍ତି ।
ସୁରକ୍ଷା ଓ ଟ୍ରାଫିକ ପରିଚାଳନା ଦୃଷ୍ଟିରୁ ନିୟୋଜିତ ହୋଇଛନ୍ତି ୨୫ ପ୍ଲାଟୁନ ପୋଲିସ ଫୋର୍ସ । ଏହାସହ ତ୍ରିସ୍ତରୀୟ ସୁରକ୍ଷା ବଳୟରେ ଶପଥ ଗ୍ରହଣ ଉତ୍ସବ ପ୍ରଦର୍ଶନୀ ପଡିଆ। ୧୦୦ମିଟର ରାଡିୟସ ଭିତରେ ସିସିଟିଭି ନଜରରେ ରହିଛି ଗ୍ରାଉଣ୍ଡ । ଅସ୍ଥାୟୀ ପୋଲିସ କଣ୍ଟ୍ରୋଲ ରୁମରୁ ପରିଚାଳିତ ହେଉଛି ସୁରକ୍ଷା ବ୍ଯବସ୍ଥା।
ବିଶେଷ କରି ଆମନ୍ତ୍ରିତ ଅତିଥିଙ୍କ ସୁରକ୍ଷା ସହ ସୁବ୍ଯବସ୍ଥିତ ଆୟୋଜନକୁ ଦୃଷ୍ଟିରେ ରଖାଯାଇଛି ।
ଏଠାରେ ସୂଚନାଯୋଗ୍ୟ, ଏହି ଶପଥ ଉତ୍ସବରେ ମୁଖ୍ଯମନ୍ତ୍ରୀଙ୍କ ସହ ରାଜ୍ଯପାଳ ଓ ଭିଆଇପି ଓ ଭିଭିଆଇପି ମଧ୍ଯ ଉପସ୍ଥିତ ରହିବେ । ମୋଟାମୋଟି ପଡିଆର ଚାରିପାର୍ଶ୍ବରେ ବନ୍ଧୁକଧାରୀ ସୁରକ୍ଷାକର୍ମୀଙ୍କ ସହ ପ୍ରଦର୍ଶନୀ ପଡିଆକୁ ସୁରକ୍ଷା ଦାୟିତ୍ବ ପୋଲିସ ହେପାଜତକୁ ନିଆଯାଇଛି ।
ତେବେ ୧୦ଟା ୩୦ରେ ଶପଥ ଗ୍ରହଣ କାର୍ଯକ୍ରମ ରହିଛି । ଶପଥ ପାଠର ୨ଘଣ୍ଟା ପୂର୍ବରୁ ୪ ଘଣ୍ଟା ପାଇଁ ମଧୁସୂଦନ ମାର୍ଗର ସାଧାରଣ ଲୋକଙ୍କ ଯିବା ଆସିବା ପାଇଁ ବନ୍ଦ ରହିବ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
