ଭୁବନେଶ୍ବର: ଆଗକୁ ଆସୁଛି ପଞ୍ଚାୟତ ଓ ପୌର ନିର୍ବାଚନ। ଶାସକ ବିଜେଡି ଓ ବିଜେପି ନିଜର ସଜବାଜ ଆରମ୍ଭ କରି ସାରିଥିବାବେଳେ ଆଜି ଲଢେଇ ପାଇଁ ଅଣ୍ଟା କଂଗ୍ରେସ। ଏନେଇ ଭୁବନେଶ୍ବରରେ କଂଗ୍ରେସ ଭବନରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଛି । ଆଗକୁ କିଭଳି ପଞ୍ଚାୟତରେ ତୃଣମୂଳ ସ୍ତରରୁ ଦଳର ସ୍ଥାୟିତ୍ବ ଜାହିର କରାଯିବ ସେ ନେଇ ସୋମବାର କଂଗ୍ରେସ ଭବନରେ ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ନେତୃତ୍ବରେ ସମସ୍ତ ସାଙ୍ଗଠନିକ ଜିଲ୍ଲାର ସଭାପତି ଓ ନେତୃବୃନ୍ଦ ଏକାଠି ହୋଇ ରଣନୀତି ପ୍ରସ୍ତୁତ କରିଛନ୍ତି ।
ଆସନ୍ତା ୩୧ ତାରିଖରେ ଓଡିଶା ଆସିବେ ପ୍ରଭାରୀ ଚେଲା କୁମାର । ତେବେ ପ୍ରଭାରୀଙ୍କ ଗସ୍ତ ପୂର୍ବରୁ ଏକ ଉଚ୍ଚସ୍ତରୀୟ ବୈଠକ କରି ଦାୟିତ୍ବ ବାଣ୍ଟିଛି ଦଳ । ଦଳରେ ବିଭିନ୍ନ ନେତାଙ୍କ ମଧ୍ୟରେ ଥିବା ମତଭେଦ ଓ ବୟାନ ବାଜିରୁ ନିବୃତ ରହିବା ପାଇଁ ମଧ୍ୟ ବୈଠକରେ ଅନୁରୋଧ କରାଯାଇଛି ।
ସେପଟେ କଂଗ୍ରେସ ଭବନରେ ୩୩ଟି ସାଙ୍ଗଠନିକ ଜିଲ୍ଲା ସଭାପତିମାନେ ବୈଠକରେ ଯୋଗ ଦେଇଥିବାବେଳେ କୋରାପୁଟ ଜିଲ୍ଲା ସଭାନେତ୍ରୀ ମିନାକ୍ଷୀ ବାହିନୀପତି ଆଜିର ବୈଠକକୁ ବର୍ଜନ କରିଛନ୍ତି । କୋରାପୁଟ ଜିଲ୍ଲାର ଆଭ୍ୟନ୍ତରୀଣ ଗୋଷ୍ଠୀ କନ୍ଦଳ ଉଗ୍ରରୂପ ଧାରଣ କରିଥିବାର ଚିତ୍ର ମଧ୍ୟ ସ୍ପଷ୍ଟ ଦୃଶ୍ୟମାନ ହୋଇଛି । ଜିଲ୍ଲା ସଭାପତିଙ୍କ ସ୍ବାମୀ ତଥା ଜୟପୁର ବିଧାୟକ ତାରା ପ୍ରସାଦ ବାହିନୀପତି ଖୋଲାଖୋଲି PCC ସଭାପତି ନିରଞ୍ଜନ ପଟ୍ଟନାୟକଙ୍କୁ ଗତ କିଛି ଦିନ ହେବ ଟାର୍ଗେଟ କରିଆସୁଛନ୍ତି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
