ଭୁବନେଶ୍ବର: ସରକାରଙ୍କ ପ୍ରତିଟି ଜନହିତକାରୀ ଯୋଜନାର ଲାଭ ଉଠାଇବାକୁ ହେଲେ ପ୍ରଥମେ ଏହି ଯୋଜନା ସବୁ ଲୋକଙ୍କ ପାଖରେ ପହଞ୍ଚିବା ଦରକାର । ଏନେଇ 2016 ମସିହା ଅଗଷ୍ଟ ମାସରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ରାଜ୍ୟରେ ପ୍ରତିଟି ଜିଲ୍ଲାରେ କମ୍ୟୁନିଟି ରେଡିଓ ସେଣ୍ଟର ଖୋଲିବା ପାଇଁ ସୂଚନା ଜାରି କରାଯାଇଥିଲା । ହେଲେ ଦୁଃଖର କଥା କି ରାଜ୍ୟବାସୀଙ୍କ ପାଇଁ ସରକାରଙ୍କର ଏହି ସ୍ବତନ୍ତ୍ର ‘ବିଜୁ ଗାଁ ରେଡିଓ’ ଯୋଜନା କାର୍ଯ୍ୟକାରୀ ହେବା ଆଗରୁ ହିଁ ବାଟବଣା ହୋଇଯାଇଛି ।
ସୂଚନା ଅନୁଯାୟୀ 2016 ମସିହା ଅଗଷ୍ଟ ମାସରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ମିଳିଥିଲା ଯେ ରାଜ୍ୟର ପ୍ରତିଟି ଜିଲ୍ଲାରେ କମ୍ୟୁନିଟି ରେଡିଓ ସେଣ୍ଟର ଖୋଲାଯିବ । ଏନେଇ 30 ଜିଲ୍ଲାର କୃଷି ବିଜ୍ଞାନ କେନ୍ଦ୍ରରୁ ପରିଚାଳିତ ହେବାକୁ ଥିବା ବିଜୁ ଗାଁ ରେଡିଓ ଷ୍ଟେସନ ପାଇଁ ବ୍ଲୁ ପ୍ରିଣ୍ଟ ମଧ୍ୟ ପ୍ରସ୍ତୁତ ହୋଇଥିଲା । ହେଲେ ଯୋଜନାକୁ 3 ବର୍ଷ ପୂରିବାକୁ ବସିଥିଲେ ମଧ୍ୟ ବାସ୍ତବତାର ରୂପ ନେଇ ପାରିନି ଏହି ସରକାରୀ ବ୍ଲୁ ପ୍ରିଣ୍ଟ ।
ଏହି ଯୋଜନା ମାଧ୍ୟମରେ ରାଜ୍ୟବାସୀଙ୍କ ପାଖରେ ସରକାରଙ୍କ ପ୍ରତିଟି ଯୋଜନା ପହଞ୍ଚାଇବା ରହିଥିଲା ମୂଳ ଉଦ୍ଦେଶ୍ୟ । ମୁଖ୍ୟତଃ ଗ୍ରାମାଞ୍ଚଳବାସୀଙ୍କ ଉଦ୍ଦେଶ୍ୟରେ ଏଠାରୁ ପ୍ରଚାରିତ ହେବାକୁ ଥିବା କାର୍ଯ୍ୟକ୍ରମରେ କୃଷି, ସମବାୟ, ଜଲସେଚନ, ସ୍ବାସ୍ଥ୍ୟ, ଶିକ୍ଷା ଓ ବିପର୍ଯ୍ୟୟ ପରିଚାଳନା ଆଦି ବିଷୟକୁ ସ୍ଥାନ ଦେବାକୁ ସ୍ଥିର ହୋଇଥିଲା । ଅନ୍ୟପଟେ ସ୍ବୟଂ ସହାୟକ ଗୋଷ୍ଠୀ ଓ କୃଷକ ସଂଗଠନ ବ୍ୟତୀତ ମହିଳା, ଯୁବକ, ଆଦିବାସୀ ଓ ସ୍କୁଲ ଛାତ୍ରଛାତ୍ରୀଙ୍କ ଆବଶ୍ୟକତାକୁ ପ୍ରାଥମିକତା ଦେବାକୁ ବିଚାର କରାଯାଇଥିଲା ।
ତିନି ବର୍ଷ ହେବ ଦିଗହରା ହୋଇଥିବା ଏହି ଯୋଜନା କାର୍ଯ୍ୟକାରୀ କରିବା ପାଇଁ ରାଜ୍ୟ ସରକାର କେନ୍ଦ୍ର ସରକାରଙ୍କୁ ଆବେଦନ କରିବା ଜରୁରୀ । ଯାହା 3 ବର୍ଷ ହେବ ଯଥାରୀତି କରାଯାଉଛି ମଧ୍ୟ । ହେଲେ କେନ୍ଦ୍ର ଓ ରାଜ୍ୟ ମଧ୍ୟରେ ତାଳମେଳର ଅଭାବ ଓ ନିୟମିତ ଫଲୋଅପ୍ ଅଭାବରୁ ଗତ 07.11.2016ରୁ ଏହି ଆବେଦନପତ୍ରଗୁଡିକ ସୂଚନା ପ୍ରସାରଣ ମନ୍ତ୍ରଣାଳୟରେ ପଡି ରହିଛି ।
ଦେଶର ପ୍ରଥମ ରାଜ୍ୟ ଭାବେ ସରକାର ଏହି ଯୋଜନାର ବ୍ଲୁ ପ୍ରିଣ୍ଟ କରିଥିଲେ ସତ ହେଲେ ଏବେ ଏହାର ବିଫଳତା ପଛରେ ରାଜନୈତିକ ଉଦ୍ଦେଶ୍ୟ ଥିବା ଚର୍ଚ୍ଚା ଜୋର ଧରିଛି । ତେବେ ଉଭୟ ସରକାରଙ୍କ ତାଳମେଳର ଅଭାବ ଯୋଗୁଁ ସ୍ବାବଲମ୍ବୀ ହେବାର କଳା ଏବେ ରାଜ୍ୟବାସୀଙ୍କ ପାଇଁ ଅପହଞ୍ଚ ବୋଲି ପ୍ରକାଶ କରିଛନ୍ତି ରେଡିଓ ଆକ୍ଟିଭିଷ୍ଟ ସୁବ୍ରତ ପତି ।
ଅନ୍ୟପଟେ ଏହି ଯୋଜନାକୁ ନେଇ ଅଶୋକ କୁମାର ପାଣିଗ୍ରାହୀ କହିଛନ୍ତି ଯେ, ଯୋଜନାକୁ ନେଇ ଯେଉଁ ପ୍ରୋଜେକ୍ଟ ରିପୋର୍ଟ ଦିଆଯାଏ, ରାଜ୍ୟ ସରକାର ବୋଧ ହୁଏ ସେହି ରିପୋର୍ଟ ଠିକ୍ ଭାବେ ଦେଇ ନାହାଁନ୍ତି । ଏହାସହ ଏହି ୩୦ଟି କମ୍ୟୁନିଟି ରେଡ଼ିଓ ପ୍ରୋଜେକ୍ଟ ପ୍ରସ୍ତୁତ କରିବା ପାଇଁ ଯେତିକି ସମୟ ଲାଗିଥାଏ ସେତିକି ସମୟ ନଦେଇ ତରବରିଆ ହେବା ଯୋଗୁଁ ଏଭଳି ସମସ୍ୟା ହେଉଛି । ଏଥିପାଇଁ ସର୍ଭେ କରି ରିପୋର୍ଟ ଦିଆଯିବା କଥା ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
