ଭୁବନେଶ୍ବର: ହୁସିଆର ଲୁଟେରାଙ୍କ ଟାର୍ଗେଟରେ ଏବେ ବିବାହ ମଣ୍ଡପ । ଗୋଟିଏ ପରେ ଗୋଟିଏ ଅଭିନବ ଉପାୟରେ ରାଜଧାନୀରେ ଆତଙ୍କ ଖେଳାଇଛନ୍ତି ଏହି ଲୁଟେରା । ସମ୍ଭ୍ରାନ୍ତ ପରିବାର ଠାଣିରେ ଆସି ବିବାହ ମଣ୍ଡପରେ ବୁଲାଉଛନ୍ତି କଳାକନା । ଛୋଟ ଶିଶୁ ଦ୍ବାରା ଏପରି ଲୁଟ କରୁଥିବା ଘଟଣା ଏବେ ସହିଦନଗର ଥାନା ଅଞ୍ଚଳରୁ ସାମ୍ନାକୁ ଆସିଛି । ବରଯାତ୍ରୀ ବେଶରେ ଆସି ଲୁଟେରାମାନେ ବନ୍ଦାଣ ଗହଣା ଲୁଟ କରିଥିବା ଜଣାପଡ଼ିଛି ।
ଏମିତି ଢଙ୍ଗରେ ଗତ ୨୩ ତାରିଖରେ ସହିଦନଗର ଥାନା ଅଞ୍ଚଳରୁ ଲୁଟ କରିଛନ୍ତି ଦୁର୍ବୃତ୍ତ । କେଶୁରାରେ ଥିବା ପଲ୍ଲବୀ ମଣ୍ଡପରେ ଏପରି ନୂଆ ଢଙ୍ଗର ଲୁଟ ଦେଖିବାକୁ ମିଳିଛି । ଜଣେ ଯୁବକ ବ୍ଲାକ ସାର୍ଟ ଓ ଗ୍ରେ ପ୍ୟାଣ୍ଟରେ ବରଯାତ୍ରୀଙ୍କ ସହ ଆସୁଛନ୍ତି । ସାଙ୍ଗରେ ଜଣେ ଛୋଟ ପିଲାକୁ ବି ଆଣିଛନ୍ତି । ଫଳରେ ସହଜରେ କେହି ସନ୍ଦେହ କରିପାରିବେ ନାହିଁ । ମଣ୍ଡପରେ ବନ୍ଦାଣ ପାଇଁ ରହିଥିବା ଗହଣା ଉପରେ ନଜର ପକାଉଛନ୍ତି ।
ଏହା ବି ପଢନ୍ତୁ: Murder In Bhubaneswar: କବାଟ ନ ଖୋଲିବାରୁ ସାଙ୍ଗକୁ ହତ୍ୟା କଲା ସାଙ୍ଗ
ପରେ ସୁଯୋଗ ଦେଖି ଲୋକଙ୍କ ଆଢୁଆଳରେ ଭ୍ୟାନିଟ ନେଇ ଲୁଟେରା ଜଣକ ଚମ୍ପଟ ମାରିଥିବା ଜଣାପଡ଼ିଛି । ଅଭିଯୋଗକାରୀ ବିଶ୍ବଜିତ ମହାରଣାଙ୍କ ଅଭିଯୋଗ ଅନୁସାରେ ତାଙ୍କ ଭଉଣୀର ବାହାଘର ଥିଲା । ଜଣେ ଲୋକ ଆସି ଭ୍ୟାନିଟ ନେଇ ଚାଲିଗଲେ । ଯେଉଁଥିରେ ଗୋଟିଏ ହାର ସହ ୨ଟି କାନଫୁଲ ଓ ୫ଟା ମୁଦି ଥିଲା । ଯାହାର ଆନୁମାନିକ ମୂଲ୍ୟ ୨ ଲକ୍ଷରୁ ଊର୍ଦ୍ଧ୍ବ ଟଙ୍କା ହେବ । ଏନେଇ ସେ ସହିଦନଗର ଥାନାରେ ଅଭିଯୋଗ କରିଛନ୍ତି ।
ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ
