ଭୁବନେଶ୍ବର: ଫେସବୁକରେ ଦେଖା । ହ୍ବାଟ୍ସଅପରେ କଥାବାର୍ତ୍ତା ପରେ ନ୍ୟୁଡ ଭିଡିଓ ଚାଟ । ପ୍ରେମିକା ସହ ମତାନ୍ତର ପରେ ନଗ୍ନ ଭିଡିଓ ଭାଇରାଲ । ଏଭଳି କାଣ୍ଡ ଘଟାଇ ଥିବା ଯୁବକକୁ ଗିରଫ କଲା ସାଇବର ଥାନା ପୋଲିସ । ଅଭିଯୁକ୍ତ ଯୁବକ ହେଲା ଗଞ୍ଜାମ ଜିଲ୍ଲା ଛତ୍ରପୁରର ପୁପୁନ ସାହୁ ।
ସୂଚନାମୁତାବକ, ଗଞ୍ଜାମ ଜିଲ୍ଲାର ପୁପୁନ ସାହୁ କିଛିଦିନ ତଳେ ଜଣେ ଯୁବତୀଙ୍କ ସହ ଫେସବୁକରେ ବନ୍ଧୁତା କରିଥିଲା । ଧିରେ ଧିରେ ଉଭୟଙ୍କ ମଧ୍ୟରେ ସମ୍ପର୍କ ନିବିଡ ହେବାରୁ ଭିଡିଓ କଲ, ଚାଟିଂ କରିଥିଲେ । ତେବେ ପୁପନ ସୁଯୋଗ ନେଇ ଯୁବତୀଙ୍କ ନଗ୍ନ ଭିଡିଓର ସ୍କ୍ରିନ ରେକର୍ଡିଂ କରିଥିଲେ । ପରେ କୌଣସି କାରଣରୁ ଉଭୟଙ୍କ ମଧ୍ୟରେ ମତାନ୍ତର ହେବା କାରଣରୁ ପୁପୁନ ଫେସବୁକରେ ଏକ ଫେକ ଆଇଡିକରି ନ୍ୟୁଡ ଫଟୋ ଭାଇରାଲ କରିଥିଲା ।
ଏନେଇ ପରିବାର ଲୋକ ଥାନାରେ ଅଭିଯୋଗ କରିବା ପରେ ତଦନ୍ତ ଆରମ୍ଭ କରିଥିଲା ପୋଲିସ । ନମ୍ବର ଟ୍ରାକିଂ କରି ଗତକାଲି(ମଙ୍ଗଳବାର) ଗଞ୍ଜାମର ପୁପୁନକୁ ଗିରଫ କରିଛି ସାଇବର ଥାନା ପୋଲିସ । ଜଣେ ଯୁକ୍ତ ତିନିର ଛାତ୍ର ଏପରି ନ୍ୟୁଡ ଚାଟରେ ବ୍ଲାକ ମେଲ କରିବା ଓ ଭାଇରାଲ କରିବା ଅଭିଯୋଗ ପରେ ଆଇଟି ଆକ୍ଟରେ ଅଭିଯୁକ୍ତକୁ କୋର୍ଟ ଚାଲାଣ କରିଛି କମିଶନରେଟ୍ ପୋଲିସ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
