ଭୁବନେଶ୍ବର: ବାହାରିନରେ ଥିବା ଓଡ଼ିଆ ସମାଜର ସଦସ୍ୟମାନେ ରୀତି ନୀତି ଏବଂ ହର୍ଷ ଉଲ୍ଲାସ ସହ ମାଲକିଯା ବୀଚରେ ଣ୍ରୀଗଣେଶଙ୍କ ମୂର୍ତ୍ତି ବିସର୍ଜନ କରିଛନ୍ତି । ସମସ୍ତେ ଏକାଠୁ ହୋଇ ପ୍ରଭୁଙ୍କ ଆଳତୀ କରି ମଙ୍ଗଳକାମନା କରିଛନ୍ତି । ଏଥିସହ କୋଭିଡ ମହାମାରୀ କିପରି ଦୁନିଆରୁ ଲୋପ ହୋଇଯିବ ସେଥିପାଇଁ ମଧ୍ୟ କାମନା କରିଛନ୍ତି ।
ସବୁଠୁ ବଡ କଥା ହେଉଛିକି ବାହାରିନରେ ଥିବା ଓଡିଆ ଶ୍ରମିକମାନେ ପ୍ରଭୁଙ୍କୁ ମାସ୍କ ପିନ୍ଧାଇ ବିଦାୟ ଦେଇଛନ୍ତି । ସମସ୍ତଙ୍କ ଜୀବନ ପୁର୍ବ ଭଳି ସ୍ୱାଭାବିକ ହେଉ । ଭବିଷ୍ୟତରେ କାହାକୁ ଯେମିତି ମାସ୍କ ପିନ୍ଧିବାକୁ ନପଡୁ ସେଥିପାଇଁ ଏପରି କରିଛନ୍ତି । ବାହାରିନ ଓଡ଼ିଆ ସମାଜ ପ୍ରତିଷ୍ଠାତା ଅରୁଣ ପ୍ରହରାଜଙ୍କ ବାସଭବନରେ ଶ୍ରୀଗଣେଶଙ୍କ ପୂଜା କରାଯାଇଥିଲା । ଭକ୍ତଗଣ ସବୁଦିନ ସନ୍ଧ୍ୟାରେ ବସି ଆରତି ଏବଂ ଭଜନ କୀର୍ତ୍ତନ କରୁଥିଲେ । ସମୂଦ୍ରରେ ବିସର୍ଜନ ପରେ ସଦସ୍ୟ ଗଣ ସେଠାରେ ପ୍ରସାଦ ଗ୍ରହଣ କରି ନିଜ ନିଜ ଘରକୁ ଫେରିଛନ୍ତି ।
ଡକ୍ଟର ଅରୁଣ କୁମାର ପ୍ରହରାଜ କହିଛନ୍ତି ଯେ, ଆମେ କୋଭିଡ୍ ନିୟମାବଳୀ ସହିତ କୌଣସି ସାଲିସ୍ ନକରି ସୁରକ୍ଷା ନିୟମକୁ କଡ଼ାକଡ଼ି ଭାବେ ପାଳନ ପୂର୍ବକ ଆମର ସାଂସ୍କୃତିକ ମୂଲ୍ୟବୋଧକୁ ବଞ୍ଚାଇବାକୁ ଚେଷ୍ଟା କରିଛୁ । 'ବାହାରିନ୍ ହେଉଛି ପ୍ରେମ, ଶାନ୍ତି ଓ ସମନ୍ଵୟର ଦେଶ । ବାହାରିନ୍ ପରି ଏକ ଆଧୁନିକ, ଅଭିନବ ତଥା ପ୍ରଗତିଶୀଳ ରାଷ୍ଟ୍ରରେ ସମସ୍ତ ଧର୍ମର ଲୋକେ ଧାର୍ମିକ ସ୍ଵାଧୀନତା ଉପଭୋଗ କରନ୍ତି । ଏହି ସ୍ଵାଧୀନତା ବାହାରିନ୍ ପାଇଁ ବେଶ୍ ସ୍ଵତନ୍ତ୍ର ଏବଂ ଏହି ସ୍ଵାଧୀନତା ଉପରେ ବାହାରିନ୍ ରାଜାଙ୍କ ଆନ୍ତରିକ ବିଶ୍ଵାସ ଓ ପ୍ରତିବଦ୍ଧତା ପାଇଁ ଆମେ କୃତଜ୍ଞ ।'
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
