ଭୁବନେଶ୍ବର: କୁମାର ପୂର୍ଣ୍ଣିମା ଠାରୁ ଆରମ୍ଭ ହେବ ଗଜଲକ୍ଷ୍ମୀ ପୂଜା । ମା ଦୁର୍ଗାଙ୍କ ଶାରଦୀୟ ଉତ୍ସବ ଶେଷ ହେବା ପରେ ଧନର ଦେବୀ ମା ଲକ୍ଷ୍ମୀଙ୍କ ଆବାହାନର ସମୟ ଆସିଛି । ଏଥିପାଇଁ ରାଜଧାନୀରେ ପ୍ରସ୍ତୁତି ଆରମ୍ଭ ହୋଇ ସାରିଥିବାବେଳେ ନୟାପଲ୍ଲୀ ଯୁବ ପରିଷଦ ଏଥିରେ ଅଗ୍ରଣୀ ଥିବା ଦେଖିବାକୁ ମିଳିଛି। ଚଳିତବର୍ଷ ପରିଷଦର 14 ତମ ପୂଜା ଆୟୋଜନ ହେବାକୁ ଯାଉଥିବାବେଳେ ପ୍ରଥମ ମଣ୍ଡପ ଭାବେ ନୟାପଲ୍ଲୀରେ ମା ଲକ୍ଷ୍ମୀଙ୍କ ଚାନ୍ଦି ମୁକୁଟ ଓ ଅଳଙ୍କାର ଲାଗି ହେବାକୁ ଯାଉଛି।
ଏନେଇ ଆୟୋଜିତ ସାମ୍ବାଦିକ ସମ୍ମିଳନୀରେ ପରିଷଦର ସଭାପତି ନିଖିଳ କୁମାର ବଳବନ୍ତରାୟ କହିଛନ୍ତି କି, ଚଳିତଥର ପୂଜାକୁ ଆକର୍ଷଣୀୟ କରିବା ପାଇଁ ରାଜସ୍ଥାନ ମନ୍ଦିର ସଦୃଶ୍ୟ ତୋରଣ ନିର୍ମାଣ କରାଯାଉଥିବାବେଳେ 2କେଜି ଓଜନର ମାଙ୍କ ପାଇଁ ମୁକୁଟ ଓ ହାର ପ୍ରସ୍ତୁତ କରାଯାଉଛି।
ସେହିପରି ପରିବେଶକୁ ପ୍ଲାଷ୍ଟିକ ମୁକ୍ତ ରଖିବା ପାଇଁ ପରିଷଦ ପକ୍ଷରୁ ବିଭିନ୍ନ କାର୍ଯ୍ୟକ୍ରମ ସହିତ ବୃକ୍ଷରୋପଣ କରାଯିବା ପାଇଁ ଯୋଜନା ହୋଇଥିବା ସେ କହିଛନ୍ତି । ଚଳିତବର୍ଷ 10 ରୁ 12 ଲକ୍ଷ ଟଙ୍କାର ବଜେଟ ଧାର୍ଯ୍ୟ ହୋଇଥିବା ବେଳେ ଲୋକଙ୍କ ମନୋରଞ୍ଜନ ପାଇଁ ପ୍ରତି ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଓ ପ୍ରସାଦ ସେବନର ବ୍ୟବସ୍ଥା ହୋଇଥିବା ଜଣାପଡିଛି।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ,ଇଟିଭି ଭାରତ
