ଭୁବନେଶ୍ବର: ବରିଷ୍ଠ ନେତା ଦାମୋଦର ରାଉତଙ୍କ ୟୁ-ଟର୍ଣ୍ଣ । ବିଜେଡିରୁ ବହିଷ୍କାର ହେଲା ପରେ ନବୀନ ପଟ୍ଟନାୟକଙ୍କ ସରକାର ଓ ଶାସନକଳକୁ ଗାଳି ଦେଉଥିବା ଦାମ ନିଜ ବୟାନରୁ ଆଜି ପୁରା ଓଲଟି ପଡିଛନ୍ତି । ନିକଟରେ ବିଜେପି ଦଳ ଛାଡିବା ପରେ ଦାମ ଏବେ ଫୁଲ ଦମରେ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ତାଙ୍କ ଦଳ ବିଜେଡିକୁ ଭୁରି ଭୁରି ପ୍ରଶଂସା କରିଛନ୍ତି ଏହି ବରିଷ୍ଠ ନେତା ।
ସୂଚନା ଅନୁସାରେ ବିଜେପୁର ଫଳାଫଳ ନେଇ ଦାମ ରାଉତ ପ୍ରତିକ୍ରିୟା ଦେଇ କହିଛନ୍ତି ଯେ, ଆଞ୍ଚଳିକ ଦଳ ଓ ଆଞ୍ଚଳିକ ନେତାଙ୍କୁ ଲୋକ ଭଲ ପାଆନ୍ତି । ଆଉ ଏହା ପ୍ରମାଣିତ ହୋଇଛି ବିଜେପୁର ଉପ ନିର୍ବାଚନ ଫଳାଫଳରୁ । ଏହା ସହ ନବୀନ ପଟ୍ଟନାୟକ ଅପରାଜେୟ ନେତା ବୋଲି କହିଛନ୍ତି ଦାମ । ଖାଲି ଏତିକି ନୁହେଁ ଓଡ଼ିଶାର ଜନସାଧାରଣ ନବୀନ ବାବୁଙ୍କୁ ପ୍ରିୟ ନେତା ଭାବନ୍ତି ବୋଲି କହିଛନ୍ତି ଦାମ ।
ଓଡ଼ିଶାର ଭୋଟର ଜାତୀୟ ଦଳ ଓ ନେତାଙ୍କ ଅପେକ୍ଷା, ଆଞ୍ଚଳିକ ଦଳକୁ ଅଧିକ ପସନ୍ଦ କରନ୍ତି । ପୂର୍ବରୁ ୨୦୧୪ରେ ଏହା ମଧ୍ୟ ପ୍ରମାଣିତ ହୋଇଥିଲା । ଏପରିକି ସାଧାରଣ ନିର୍ବାଚନର ପୂର୍ବ ଓ ପରେ ହୋଇଥିବା 2ଟି ଉପନିର୍ବାଚନରେ ମଧ୍ୟ ବିଜେଡି ଜିତିଛି ।
ତେଣୁ ଉଭୟ ଜାତୀୟ ଦଳ କଂଗ୍ରେସ ଓ ବିଜେପି ଆତ୍ମସମୀକ୍ଷା କରିବା ଉଚିତ ବୋଲି କହିଛନ୍ତି ଦାମ । ଏହାସହ ବିଜେଡି ଆଡକୁ ଢଳୁଛନ୍ତି କି ବୋଲି ପ୍ରଶ୍ନରେ କହିଥିଲେ 'ମୁଁ କେବେ ବିଜେଡି ପ୍ରତି ବିମୁଖ ଥିଲି କି ? ମୁଁ ବିଜେଡି ଦଳ ଛାଡି ନାହିଁ ,କୌଣସି କାରଣ ନଜାଣି ମୋତେ ଦଳରୁ ବହିଷ୍କାର କରିଛନ୍ତି ବୋଲି କହିଛନ୍ତି ଦାମ ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
