ଭୁବନେଶ୍ବର: ଦକ୍ଷତା ବିକାଶର ପ୍ରାଣକେନ୍ଦ୍ର ଭାବେ ପ୍ରତିଷ୍ଠା ହୋଇଛି ୱାର୍ଲଡ଼ ସ୍କିଲ ସେଣ୍ଟର( World Skills Center) । ଓଡ଼ିଶାର ଯୁବଗୋଷ୍ଠୀଙ୍କ ଦକ୍ଷତା ବିକାଶରେ ଏହା ପ୍ରମୁଖ ଭୂମିକା ଗ୍ରହଣ କରିଛି । ବୁଧବାର ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ପ୍ରୀତିରଞ୍ଜନ ଘଡାଇ(Pritiranjan ghadai) ୱାର୍ଲଡ଼ ସ୍କିଲ୍ ସେଣ୍ଟର ପରିଦର୍ଶନ କରିଛନ୍ତି ।
ସୂଚନା ଅନୁସାରେ, ଏସୀୟ ଉନ୍ନୟନ ବ୍ୟାଙ୍କ୍ ସହାୟତାରେ ସ୍ଥାପିତ ୱାର୍ଲଡ଼ ସ୍କିଲ ସେଣ୍ଟର( World Skills Center) ନିମନ୍ତେ ସିଙ୍ଗାପୁରର ଆଇଟିଇଇଏସ୍ ସଂସ୍ଥା ନଲେଜ୍ ପାର୍ଟନର ରହିଛି । ଏହା କିଭଳି ଏସିୟା ମହାଦେଶର ସୁନାମଧନ୍ୟ ବୈଷୟିକ ସଂସ୍ଥା ଆଇଟିଇଇଏସ୍ ଢାଞ୍ଚାରେ ପରିଚାଳିତ ହେଉଛି ସେ ନେଇ ମନ୍ତ୍ରୀ ପ୍ରଶିକ୍ଷକଙ୍କ ଠାରୁ ପଚାରି ବୁଝିଛନ୍ତି । ସମଗ୍ର ଦେଶରେ ଦକ୍ଷତା ବିକାଶରେ ଓଡିଶା ଏକ ଅଗ୍ରଣୀ ରାଜ୍ୟ ଭାବେ ଉଭା ହେଉଛି । ତେଣୁ ପ୍ରଶିକ୍ଷାର୍ଥୀମାନଙ୍କର ବ୍ୟବହାରିକ ଜ୍ଞାନ ନିମନ୍ତେ ଶିଳ୍ପ ସଂସ୍ଥାରେ କାମ କରି ଅଭିଜ୍ଞତା ନେବାର ଆବଶ୍ୟକତା ରହିଛି । ଏହାଦ୍ଵାରା ସେମାନେ ସର୍ବଶ୍ରେଷ୍ଠ ସଂସ୍ଥାଗୁଡିକରେ କର୍ମନିଯୁକ୍ତି ପାଇପାରିବେ । ମନ୍ତ୍ରୀ ପ୍ରୀତିରଞ୍ଜନ ଘଡାଇ କହିଛନ୍ତି ଯେ, "ୱାର୍ଲଡ଼ ସ୍କିଲ୍ ସେଣ୍ଟରରେ କ୍ଷୁଦ୍ର ମିଆଦୀ ଦକ୍ଷତା ପ୍ରଶିକ୍ଷଣ ଦ୍ଵାରା ଯେପରି ଯୁବଗୋଷ୍ଠୀମାନେ ଉପକୃତ ହୋଇପାରିବେ ସେଥିନିମନ୍ତେ ସୁଯୋଗ ସୃଷ୍ଟି କରିବା ଆବଶ୍ୟକ ।"
ଏହା ମଧ୍ୟ ପଢନ୍ତୁ:ଆରମ୍ଭ ହେଲା World Skills Center ପ୍ରଥମ ବ୍ୟାଚ୍ ପାଠ୍ୟକ୍ରମ
ବିଶେଷଭାବେ ଏଠାରୁ ଆଇଟିଆଇ ଏବଂ ଡିପ୍ଲୋମା ଉତ୍ତୀର୍ଣ୍ଣ କରିଥିବା ଯୁବଗୋଷ୍ଠୀ ଯେଭଳି ସ୍କିଲିଂ ପାଇ ପାରିବେ ତାହା ଉପରେ ମନ୍ତ୍ରୀ ଗୁରୁତ୍ୱାରୋପ କରିଛନ୍ତି । ଏହି ଅବସରରେ ମନ୍ତ୍ରୀ ବିଲିଂ ମ୍ୟାନେଜମେଣ୍ଟ୍ ସର୍ଭିସେସ୍, କମର୍ସିଆଲ୍ ରେଫ୍ରିଜିରେସନ୍, କମର୍ସିଆଲ୍ ଏଆର୍ କଣ୍ଡିସନିଂ, ମେକାଟ୍ରନିକ୍ସ, କାଡ ଓ ମେକାନିକାଲ୍, ଇଲେକ୍ଟ୍ରିକାଲ୍, ରେସିଡେନସିଆଲ୍ କଣ୍ଡିସନିଂ, ପାଇପିଂ ଓ ପ୍ଲରିଂ, ଅଟୋମେସନ୍ ଓ ରବୋଟିକ୍ସ, ନିଉମାଟିକ୍ସ, ଡ୍ରାଇଭ ଓ ମୋଟର କଣ୍ଟ୍ରୋଲ ଲ୍ୟାବ୍ ଏବଂ ପିଏଲସି, ଇଲେକ୍ଟ୍ରିକାଲ୍ ଇନଷ୍ଟୋଲେସନ୍ ଓ ମେକାନିକାଲ୍ ଟେକ୍ନୋଲୋଜି ୱାର୍କସପ୍ ପରିଦର୍ଶନ କରିବା ସହ ପ୍ରଶିକ୍ଷକମାନଙ୍କ ସହ ଆଲୋଚନା କରିଛନ୍ତି ।
ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗର ଅତିରିକ୍ତ ସଚିବ ରେଣୁପ୍ରଭା ନାୟକ, ୱାର୍ଲଡ଼ ସ୍କିଲ ସେଣ୍ଟରର ଉନ୍ନତି ଦକ୍ଷତା ପ୍ରଶିକ୍ଷଣ ବ୍ୟବସ୍ଥା, ଭିତ୍ତିଭୂମି ଏବଂ ପାଠ୍ୟକ୍ରମ ଇତ୍ୟାଦି ବିଷୟରେ ଆଲୋକପାତ କରିଛନ୍ତି । ଅନ୍ୟମାନଙ୍କ ମଧ୍ୟରେ ୱାର୍ଲଡ଼ ସ୍କିଲ୍ ସେଣ୍ଟରର ବିଭିନ୍ନ ବିଭାଗର ନିର୍ଦ୍ଦେଶକ ଓ ଡେପୁଟି ପ୍ରିନ୍ସିପାଲ ଉପସ୍ଥିତ ଥିଲେ ।
ଇଟିଭି ଭାରତ, ଭୁବନେଶ୍ବର
