ଭୁବନେଶ୍ବର: ଶୁଭୁଥିଲା ମହାମନ୍ତ୍ର । ବାଜୁଥିଲା ମୃଦଙ୍ଗ ସହ ଗିନି । ସମସ୍ତଙ୍କ ମୁହଁରୁ ବାହାରୁଥିଲା ହରେକୃଷ୍ଣ ହରେ ରାମ । ପରେ ବିଧି ମୁତାବାକ ହୋଇଥିଲା ମହାମାୟାଙ୍କ ପୂଜା । ପୂଜାପରେ ମହା ଆଳତୀ ବି ହୋଇଥିଲା । ଶେଷରେ ସମସ୍ତେ ମା’ଙ୍କ ଦର୍ଶନ କରିବା ସହ ପ୍ରସାଦ ସେବନ କରିଥିଲେ । କିନ୍ତୁ ଯେଉଁଠି ଏହି ସବୁ ହୋଇଥିଲା ବୋଧହୁଏ ପ୍ରଥମ ଥର ସେହି ମାଟିରେ ଶୁଭିଥିବା ମହାମନ୍ତ୍ର । ଅବସର ଥିଲା ପବିତ୍ର ଦଶହରା । ତାହା ପୁଣି ସୂଦୁର କୁଏତରେ ।
ସୂଚନା ଅନୁସାରେ କୁଏତରେ ଥିବା ଶହଶହ ସଂଖ୍ୟାରେ ଓଡିଆ ପାଳନ କରିଛନ୍ତି ଦଶହରା । କର୍ମ ଅନ୍ବେଷଣରେ ଜନ୍ମମାଟି ଠାରୁ ଦୂରରେ ଥିଲେବି ନିଜ ସଂସ୍କୃତି ପରମ୍ପରାକୁ ଭୁଲି ନାହାଁନ୍ତି ଏମାନେ । ସେଥିପାଇଁ ଦଶହରା ଅବସରରେ ମିଳିମିଶି ଏକାଠି ହୋଇ ପାଳିଛନ୍ତି ଦଶହରା । ପୂଜିଛନ୍ତି ଦୁର୍ଗତୀ ନାଶୀନି ମା ଦୁର୍ଗାଙ୍କୁ । ମାଙ୍କ ଆରଧନା ସହ ଭଜନ ସଂକୀର୍ତ୍ତନ ଜରିଆରେ ଦଶହରା ପର୍ବ ପାଳନ କରିଛନ୍ତି ପ୍ରବାସୀ ଓଡିଆ ।
ଏଥିରେ ଯୋଗଦେଇଥିଲେ ସମାଜସେବୀ ତଥା ଭାରତ ସେବା ଦର୍ଶନର ସଭାପତି ବିଶ୍ବ ରଂଜନ ସାହୁ । ଏହାସହ ସମସ୍ତ ପ୍ରବାସୀ ଓଡିଆଙ୍କୁ ସର୍ବଦା ଏକତ୍ରିତ ହେବାକୁ ଆହ୍ବାନ ଦେଇଥିଲେ । ନିଜର ପରମ୍ପରା ନଭୁଲି ବଜାୟ ରଖିବାକୁ ଉଦବୋଧନ ଦେଇଥିଲେ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
