ଭୁବନେଶ୍ବର: ଶରତର ଆଗମନରେ ଧରାପୃଷ୍ଟ ଉତ୍ସବ ମୁଖର । ଚତୁର୍ଦ୍ଦିଗରେ ବାଜିଳାଣି ବାଜା । ଚାରିଆଡେ କାଶତଣ୍ଡି ଫୁଲର ସମ୍ଭାର । ସତରେ ସେ ସ୍ବାଗତ କରୁଛନ୍ତି ସ୍ବର୍ଗରେ ଥିବା ଦେବତା ଗଣଙ୍କୁ । ଆଉ କିଛି ଦିନ ଅନ୍ତରାଳେ ଧରାପୃଷ୍ଠକୁ ଅବତରଣ କରିବେ ମା’ ଜଗତ ଜନନୀ ଦୁର୍ଗା । ମା’ଙ୍କ ଭବ୍ୟ ପୂଜାପାଇଁ ଧରାପୃଷ୍ଠରେ ଚାଲିଛି ଜୋରଦାର ପ୍ରସ୍ତୁତି । ଏହି ଉପଲକ୍ଷେ ରାଜଧାନୀର ବିଭିନ୍ନ ପୂଜା ମଣ୍ଡମରେ ମଧ୍ୟ ପ୍ରସ୍ତୁତି ଶେଷ ପର୍ଯ୍ୟାୟରେ ।
ତେବେ ଦୀର୍ଘ 13 ବର୍ଷ ଧରି ରାଜଧାନୀର ଜନତା ମୈଦାନରେ ଶାରଦୀୟ ଦୁର୍ଗାପୂଜା ସହ ଦାଣ୍ଡିଆ ମହୋତ୍ସବ ଆୟୋଜନ କରୁଥିବା ଓଡିଶୀ ଇଣ୍ଟରନ୍ୟାସନାଲ ସେଣ୍ଟର ଚଳିତ ବର୍ଷ ମଧ୍ୟ କିଛି ନୂତନ କରିବାକୁ ନିଷ୍ପତ୍ତି ନେଇଛି । ହେଲେ ଚଳିତ ବର୍ଷ ଉତ୍ସବ ଜନତା ମୈଦାନ ପରିବର୍ତ୍ତେ କଳିଙ୍ଗ ଷ୍ଟାଡିୟମ ନିକଟ ଲକ୍ଷ୍ମୀ ମଣ୍ଡପରେ ଆୟୋଜନ ହେବ ପୂଜା ।
ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଅକ୍ଟୋବର 3 ତାରିଖରୁ 8 ତାରିଖ ପର୍ଯ୍ୟନ୍ତ ଦାଣ୍ଡିଆ ମହୋତ୍ସବ ଆୟୋଜନ ସହ ରାଜ୍ୟର ବିଭିନ୍ନ ଶକ୍ତିପୀଠକୁ ନେଇ କୁଇଜ ପ୍ରତିଯୋଗୀତା ହେବ । ବିଜୟୀ ପ୍ରତିଯୋଗୀଙ୍କୁ ଆକର୍ଷଣୀୟ ପୁରସ୍କାର ଦିଆଯିବ । ଭକ୍ତ ମାନେ ଦାଣ୍ଡିଆ ନୃତ୍ୟରେ ଭାଗ ନେବାପାଇଁ 2ଶହ ଓ 250 ଟଙ୍କାର ଦର ଧାର୍ଯ୍ୟ କରାଯାଇଛି ।
ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି ଚଳିତ ବର୍ଷ ପ୍ରଥମଥର ପାଇଁ ଅଷ୍ଟମୀତିଥୀରେ ନିଶା ରାକ୍ଷାସ ପୋଡି ଆୟୋଜନ କରିବ ଓଡିଶୀ ଇଣ୍ଟରନ୍ୟାସନାଲ । ଏହାର ମୁଖ୍ୟ ଉଦ୍ଦେଶ୍ୟ ହେଉଛି ଯୁବପୀଢିଙ୍କୁ ନିଶା କବଳରୁ ରକ୍ଷାକରିବା ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
