ଭୁବନେଶ୍ବର: କ୍ୟାପିଟାଲ ହସ୍ପିଟାଲରେ ଡାକ୍ତରଙ୍କ ମନମୁଖୀ ରୋଗୀ ସେବା ଅଭିଯୋଗ। ଡ୍ୟୁଟି ସରିଯିବାରୁ ରୋଗୀଙ୍କୁ ଦେଖିଲେ ନାହିଁ ଡାକ୍ତର। ଘଣ୍ଟାଘଣ୍ଟା ଧରି ଅପେକ୍ଷା ପରେ ବି ଡାକ୍ତର ନଦେଖିବାରୁ ଡାକ୍ତରଖାନାରେ ଉତ୍ତେଜନା ଦେଖିବାକୁ ମିଳିଛି।
ରାଜ୍ୟ ସରକାର ‘ମୋ ସରକାର’ ଯୋଜନା କରିଥିବାବେଳେ କ୍ୟାପିଟାଲ ହସ୍ପିଟାଲର ଏପରି ଚିତ୍ର ଯୋଜନାକୁ ପରିହାସ କରୁଥିବାର ମନେ ହେଉଛି । ସୂଚନା ଅନୁଯାୟୀ, ପୁରୀର 65 ବର୍ଷୀୟା ବାସନ୍ତୀ ସୁନ୍ଦରାୟ ଦୁଇଦିନ ତଳେ କ୍ୟାପିଟାଲ ହସ୍ପିଟାଲକୁ ଚିକିତ୍ସା ପାଇଁ ଆସିଥିଲେ । ସେହିଦିନ ସେ ଧାଡିରେ ଛିଡା ହୋଇଥିଲେ ବି ଡାକ୍ତରଙ୍କ ସହ ଦେଖା ହୋଇପାରିନଥିଲା।
ଯେଉଁଥିପାଇଁ ସେ ସୋମବାର ପୁଣି ଆସିଥିଲେ । ହେଲେ ଘଣ୍ଟା ଘଣ୍ଟା ଧରି ଧାଡିରେ ଛିଡା ହୋଇଥିବାବେଳେ ଆଜି ବି ଡ୍ୟୁଟି ସରିଯିବାରୁ ଡାକ୍ତର ଦେଖାଇ ପାରିନାହାଁନ୍ତି । ତେବେ ତାଙ୍କ ସହିତ ଅନ୍ୟ ରୋଗୀମାନେ ମଧ୍ୟ ଏପରି ଅସୁବିଧାର ସମ୍ମୁଖୀନ ହେବାରୁ ସେଠାରେ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା ।
ଉତ୍ତେଜନା ଦେଖାଦେବାରୁ କ୍ୟାପିଟାଲ ଥାନା ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରିଛି । ସେପଟେ ଏ ବାବଦରେ ବାସନ୍ତୀ ସୁନ୍ଦରାୟଙ୍କ ସମ୍ପର୍କୀୟ ହସ୍ପିଟାଲ ନିର୍ଦେଶକଙ୍କୁ ଭେଟି ଅଭିଯୋଗ କରିଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
