କେନ୍ଦୁଝର: ଜିଲ୍ଲାର ସଦର ବ୍ଲକ ମହାଦେଇଯୋଡା ପଞ୍ଚାୟତ ସଲରାପେଣ୍ଠ ଗ୍ରାମର ସୀମା ମୁଣ୍ଡାଙ୍କ ରାସନ କାର୍ଡ ସହ ଆଧାର କାର୍ଡ ଲିଙ୍କ ହୋଇ ନଥିବାରୁ ପଞ୍ଚାୟତ ତାଙ୍କ ଚାଉଳ ବନ୍ଦ କରିଥିଲା ।
ବାପାମା’ ଛେଉଣ୍ଡ ଏହି ଆଦିବାସୀ ନିରୀହ ଝିଅଟି ନିରୁପାୟ ହୋଇ ଶେଷରେ ପାଠପଢା ବନ୍ଦ କରି ଜଙ୍ଗଳରୁ କାଠ ସଂଗ୍ରହ କରି ବଞ୍ଚିବା ପାଇଁ ସଂଘର୍ଷ କଲା । ଏହି ଅଭାବନୀୟ ଘଟଣା ଗଣମାଧ୍ୟମରେ ପ୍ରସାରଣ ହେବାପରେ ମହିଳା ଏବଂ ଶିଶୁ ବିକାଶ ମନ୍ତ୍ରୀ ଟୁକୁନି ସାହୁ ତୀବ୍ର ପ୍ରତିକ୍ରିୟା ପ୍ରକାଶ କରି ତୁରନ୍ତ ନିରୀହ ଝିଅଟିକୁ ଚାଉଳ ଯୋଗାଇ ଦେବାସହ ପଦକ୍ଷେପ ନେବାକୁ ଜିଲ୍ଲାପ୍ରଶାସନକୁ ନିର୍ଦ୍ଦେଶ ଦେଇଥିଲେ ।
ମନ୍ତ୍ରୀଙ୍କ ନିର୍ଦ୍ଦେଶ ପରେ ଜିଲ୍ଲା ପ୍ରଶାସନ ପଦକ୍ଷେପ ନେବା ସହ ସୀମା ମୁଣ୍ଡାର ନିକଟସ୍ଥ କୁସୁମିତା ଆଶ୍ରମ ସ୍କୁଲରେ ତାର ଷଷ୍ଠ ଶ୍ରେଣୀରେ ନାମ ଲେଖାଇ ପାଠପଢା ବ୍ୟବସ୍ଥା କରାଇଛନ୍ତି । ସୀମା ମଧ୍ୟ ଆଜି ସ୍କୁଲ ଯାଇ ପାଠ ପଢା ଆରମ୍ଭ କରିଛି ।
ପରେ ଖାଦ୍ୟ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କେନ୍ଦୁଝର ଗସ୍ତ କରି ଝିଅଟିକୁ ସାକ୍ଷାତ କରିବା ସହ ଭଲମନ୍ଦ ବୁଝିଛନ୍ତି । ଏହାସହ ପ୍ରତିମାସ ଯେମିତି ଚାଉଳ ପାଇବାରେ ସମସ୍ୟା ନହୁଏ ପଦକ୍ଷେପ ନେବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
